Milli Qurtuluş Günündə Zaqatalada silsilə tədbirlər keçirilib

Milli Qurtuluş Günü Zaqatalada da geniş bayram tədbirləri ilə qeyd olunmuşdur. Əvvəlcə rayon ictimaiyyətinin nümayəndələri və qonaqlar Heydər Əliyev parkında ulu öndərin abidəsini ziyarət etmiş, abidənin önünə əklil və tər çiçəklər düzmüşlər.

"Milli Qurtuluş Günündən başlanan inkişaf" mövzusunda keçirilmiş elmi-praktik konfransda rayon icra hakimiyyətinin başçısı Asif Əsgərovun məruzəsi dinlənilmişdir. Məruzədə 1993-cü ilin iyun hadisələri zamanı ümummilli lider Heydər Əliyevin müstəqil Azərbaycanın parçalanma təhlükəsindən xilas edilməsi naminə fədakarlığından danışılmışdır. Qeyd edilmişdir ki, hazırda Azərbaycan ulu öndərin müəyyənləşdirdiyi inkişaf strategiyasına uyğun olaraq böyük uğurlara qovuşmaqdadır.

Milli Qurtuluş Günü ərəfəsində rayonda bir çox yeni obyektlərin açılışına həsr olunmuş mərasimlər də keçirilmişdir. Zaqatala şəhərinin mərkəzində "Azərpoçt" Dövlət Müəssisəsinin rayon filialının yeni inşa olunmuş inzibati binasının açılışı olmuşdur. Dövlət vəsaiti hesabına yeni inşa edilmiş bu ikimərtəbəli, 15 otaqdan və əməliyyat zalından ibarət binada müasir avadanlıqlar quraşdırılmış, əhaliyə yüksək səviyyədə xidmət göstərmək üçün hər cür şərait yaradılmışdır. Tədbirdə "Azərpoçt" Dövlət Müəssisəsinin baş direktoru Qəmbər Bəybalayev də iştirak etmişdir.

Rayonda Mamrux kəndində ümumi sahəsi 135 kv.metr olan, 5 otaqdan ibarət yeni istifadəyə verilmiş həkim ambulatoriyası Səhiyyə Nazirliyi tərəfindən müasir inventarlarla təmin edilmişdir.

Qımır kəndində isə dövlət büdcəsi hesabına yeni inşa olunmuş 220 şagird yerlik məktəb binasının açılış mərasimi keçirilmişdir. 1930-cu ildən fəaliyyət göstərən Qımır kənd orta məktəbinin qəzalı vəziyyətdə olan köhnə binasının yerində qısa müddət ərzində 11 sinif otağı, fizika və kimya kabinetləri, komputer otağı, idman və iclas zalları və bufeti olan müasir məktəb binası tikilmiş və hər cür lazımi avadanlıqlala təchiz edilmişdir.

Tədbir iştirakçıları büdcə vəsaiti hesabına əsaslı təmir olunmuş mərkəzi rayon xəstəxanasının açılışına da qatılmışlar. Yüksək səhiyyə xidməti üçün burada hər cür şərait yaradılmışdır. Səhiyyə naziri Oqtay Şirəliyev açılış mərasimində iştirak etmişdir.

"Tac" şadlıq sarayının və "SİTİ SENTER" ticarət mərkəzinin açılışı da zaqatalalılara sevinc bəxş etmişdir. Qeyd etmək yerinə düşər ki, bu obyektlərdə 150 nəfər işlə təmin olunmuşdur.

Bütün açılış mərasimlərindəki çıxışlarda bir fikir xüsusi vurğulanmışdır ki, Milli Qurtuluş Günündən başlanan möhtəşəm inkişaf yolu ölkə Prezidenti İlham Əliyevin rəhbərliyi ilə uğurla davam etdirilir.

T.Nəzərli

Azərbaycan.- 2009.- 17 iyun.- S. 5.