Polşa Azərbaycan ilə əlaqələrin hərtərəfli inkişafında maraqlıdır

Ə.Əhmədov Azərbaycan ilə Polşa arasındakı dostluq əlaqələrinin tarixindən danışmış, müstəqilliyini bərpa etdikdən sonra münasibətlərimizin daha da dərinləşdiyini bildirmişdir. O demişdir ki, bu cür səfərlər bizi daha da yaxınlaşdırır, əməkdaşlığımızın dərinləşməsinə xidmət edir.

YAP sədrinin müavini - icra katibi daha sonra Azərbaycanda həyata keçirilən islahatlar, iqtisadi siyasət, əldə olunan uğurlardan söz açmışdır. Bildirilmişdir ki, indi ölkəmiz regionda həyata keçirilən layihələrin həm təşəbbüskarı, həm də əsas iştirakçısıdır. Azərbaycan Avropanın enerji təhlükəsizliyi məsələsində də mühüm rol oynayır.

Sonra Əli Əhmədov Ermənistan-Azərbaycan, Dağlıq Qarabağ münaqişəsi, problemin həlli ilə bağlı rəsmi Bakının ədalətli mövqeyi barədə qonaqlara ətraflı məlumat vermiş, Azərbaycanın ərazi bütövlüyünü dəstəklədiyi üçün Polşa tərəfinə minnətdarlığını bildirmişdir.

Polşa-Azərbaycan parlamentlərarası əlaqələr üzrə işçi qrupunun rəhbəri Vieslav Voda demişdir ki, Azərbaycan müstəqilliyini bərpa etdikdən sonra sürətlə inkişaf edir, regionun və Avropanın enerji təhlükəsizliyində mühüm rola malikdir. Polşada da Azərbaycana böyük maraq vardır. Səfərin əsas məqsədi ölkələrimiz, xüsusən də parlamentlər arasında münasibətləri inkişaf etdirməkdir.

Hazırda hər iki müstəqil dövlətin münasibətlərinin genişləndirilməsinə böyük ehtiyac vardır. Bunun üçün siyasi partiyalar arasında da əməkdaşlıq müsbət nəticə verə bilər.

Qonaq Azərbaycana xüsusi rəğbət bəslədiyini vurğulamış, Polşa Seymində Azərbaycan üzrə işçi qrupunun rəhbəri seçilməsinin də bununla bağlı olduğunu bildirmişdir.

Ermənistan-Azərbaycan, Dağlıq Qarabağ münaqişəsinə toxunan Vieslav Voda demişdir ki, Polşa Azərbaycanın ərazi bütövlüyünü dəstəkləyir və münaqişənin tezliklə ədalətli həllinə nail olunacağına inanır.

Görüşdə parlamentlərarası əlaqələrin inkişaf perspektivləri, deputatlarımızın beynəlxalq təşkilatlarda prinsipial məsələlərdə eyni mövqedən çıxış etmələrinin vacibliyindən söz açılmış, qarşılıqlı maraq doğuran digər məsələlər ətrafında fikir mübadiləsi aparılmışdır.

AzərTAc

Azərbaycan.- 2009.- 17 iyun.- S. 4.