Azərbaycan-Polşa münasibətləri inkişaf edir

İyunun 16-da Milli Məclisdə Azərbaycan-Polşa parlamentlərarası əlaqələr üzrə işçi qrupun və beynəlxalq münasibətlər və parlamentlərarası əlaqələr komitəsinin üzvləri ölkəmizdə səfərdə olan Polşa Seyminin nümayəndə heyəti ilə görüşmüşlər.

Beynəlxalq münasibətlər və parlamentlərarası əlaqələr komitəsinin sədri, Azərbaycanın Avropa Şurası Parlament Assambleyasındakı nümayəndə heyətinin rəhbəri Səməd Seyidov ölkələrimizin tarixi əlaqələrindən söz açaraq demişdir ki, azadlığın dəyərini yaxşı bilən Polşa deputatları bütün beynəlxalq təşkilatlarda Azərbaycanın mövqeyini, ərazi bütövlüyünü dəstəkləyirlər. Bu gün Azərbaycan ilə Polşanı bir-birinə bağlayan tellər yalnız enerji resursları ilə əlaqədar deyil, daha dərin köklərə malikdir. Mənəvi cəhətdən yaxın olan xalqlarımız bir-birinin ədəbiyyatına, incəsənətinə böyük maraq göstərir, tanınmış ədiblərimizin dəyərli bədii əsərləri tərcümə edilir. Bakı Slavyan Universitetində polyak dili fakültəsi fəaliyyətdədir.

Görüşdə Polşa Seymi nümayəndə heyətinin rəhbəri Vieslav Voda Azərbaycanda keçirdikləri görüşlər barədə xoş təəssüratlarını bölüşmüş, paytaxt Bakının arxitekturasında həmvətənlərinin dəst-xəttinin duyulduğunu qürurla qeyd etmişdir. O bildirmişdir ki, Polşa dövləti Azərbaycanla daha möhkəm, daha yaxşı əlaqələr qurmaqda maraqlıdır. Rəsmi Varşava Azərbaycanın qarşılaşdığı problemə - Ermənistan-Azərbaycan, Dağlıq Qarabağ münaqişəsinə həssaslıqla yanaşır və münaqişənin Azərbaycanın ərazi bütövlüyü çərçivəsində həllinə tərəfdardır.

Görüş zamanı hər iki parlamentin nümayəndələri əməkdaşlığın inkişafına dair fikir və mülahizələrini bölüşmüşlər. Qeyd olunmuşdur ki, parlamentlərarası əlaqələr qanunvericilik fəaliyyətini də əhatə etsə daha faydalı olar, həmvətənlərimizin bir-birini daha yaxşı tanıması üçün turizm əlaqələrinin inkişafı xeyli səmərə verər.

Söhbət zamanı qarşılıqlı maraq doğuran bir sıra məsələlərə toxunulmuşdur.

AzərTAc

Azərbaycan.- 2009.- 17 iyun.- S. 3.