Azərbaycan alimi Beynəlxalq Təltiflər İttifaqının "I dərəcəli Hippokrat" ordeninə layiq görülmüşdür

Azərbaycan Tibb Universitetinin insan anatomiyası kafedrasının müdiri, Rusiya Federasiyası Tibb Elmləri Akademiyası və Türk Dünyası Araşdırmaları Uluslararası Elmlər Akademiyasının akademiki, akademik Yusif Məmmədəliyev və Hacı Zeynalabdin Tağıyev adına mükafatlar laureatı, tibb elmləri doktoru, professor Vaqif Şadlinski daha bir beynəlxalq mükafata layiq görülmüşdür.

Beynəlxalq Təltiflər İttifaqının prezidenti M.Pekelisin imzası ilə göndərilmiş sənəddə bildirilir ki, Azərbaycan alimi tibb elminin inkişafı sahəsində xidmətlərinə görə bu qurumun "I dərəcəli Hippokrat" ("Xilaskarlıq və şəfqət") ordeninə layiq görülmüşdür.

Anadan olmasının 70, elmi fəaliyyətinin 45 illiyi ərəfəsində orden professor V.Şadlinskiyə təqdim edilmişdir. Bu mükafat onun elmi fəaliyyətinə və tibbi kadrlar hazırlanması işindəki uğurlarına verilmiş layiqli qiymətdir.

AzərTAc

Azərbaycan.- 2009.- 17 iyun.- S. 7.