Dağ şəhərində gözəl ünvanların sayı artır

Hər dəfə Şahbuza - təbiətin əsrarəngiz gözəllikləri ilə dolu olan, hər qayasına, daşına min bir naxış vurulan sərhəd rayonuna yolum düşəndə xalqımızın ümummilli lideri Heydər Əliyevin bu sözlərini xatırlayıram: "Şahbuzun xüsusiyyəti odur ki, gözəl iqlimi var, gözəl havası, yamacları, çəmənləri var. Bu qayalara baxanda elə bil dünyanı görürsən...". Ulu öndər rayon sakinləri ilə görüşlərində, söhbətlərində onu da vurğulayıb ki, bu dağların, qayaların arxasında yaşamaq və yaşatmaq üçün şərait yaratmaq heç də asan məsələ deyildir. Burada qadir insan əlləri ilə görülən işlər, həyata keçirilən tədbirlər, yaradılan gözəlliklər də az deyil. Əks-təqdirdə uzun illər iqtisadi cəhətdən rentabelsiz sayılan bölgədə yeni quruculuğa başlamaq asan olmazdı. Aqrar sahədə qazanılan indiki nailiyyətlər də bu deyilənləri təsdiqləyir.

Ötən il əkin sahələrindən ilk dəfə olaraq 2823 ton taxıl, 4616 ton kartof yığılıb. Meyvə bağlarının da məhsuldarlığı yüksək olub - 5374 ton. Halbuki rayonda ən yaxşı halda taxıl istehsalı 1440, kartof istehsalı 229, meyvə isə 440 tondan yuxarı qalxmayıb. Mütəxəssislərin fikrincə, cari ildə nəticələr daha yüksək olacaq. Zəmilərin, tarlaların indiki görünüşü bu cür düşünməyə əsas verir. Torpaq mülkiyyətçiləri bu mövsüm 1213 hektar sahədə taxıl, 400 hektarda isə kartof yetişdirirlər.

Son beş ildə 243 hektar sahədə meşəsalma və meşə-bərpa işləri görülüb. Ötən il 51,5 hektar sahəyə 23 min 590 ədəd müxtəlif tinglər əkilib. Bu ilin yazında isə 36 hektar sahədə yaşıllaşdırma tədbirləri həyata keçirilib. Yeni yaşıllıq zolaqlarının xeyli hissəsi magistral yol kənarlarında salınıb, sututarlarda meyvə ağacları əkilib.

Aqrar sahənin inkişafına göstərilən dövlət qayğısı heyvandarlığın inkişafına, onun gəlirli sahəyə çevrilməsinə səbəb olub. Fərdi təsərrüfatlarda 120 mindən çox mal-qara saxlanılır. Statistik rəqəmlərə görə, ötən əsrin səksəninci illərində burada ictimai, dövlət və şəxsi təsərrüfatlarda cəmi 72 min başa yaxın mal-qara var idi. Əvvəlki illərlə müqayisədə arı ailələrinin sayı da xeyli artıb.

Regionların sosial-iqtisadi inkişafının Dövlət Proqramı çərçivəsində rayonda quruculuq və abadlıq işləri də geniş vüsət alıb. Rayon mərkəzində və kənd yaşayış məskənlərində onlarca müasir tipli sosial obyektlər inşa olunub. Yeni tikililərin hər biri əsasən iki-üç mərtəbəlidir.

2007-ci ilin dekabr ayında Şahbuza şəhər statusu verilib. Əvvəllər burada sadə, primitiv binalar üstünlük təşkil edirdi. O vaxtlar Şahbuzun daxili yollarının, kücələrinin gözəlliyindən, abadlığından danışmaq da qeyri-mümkün idi. Uzun illər boyu bu yaşayış məskənində bazar, avtovağzal, sosial təyinatlı digər obyektlər mövcud deyildi. Son illər rayon mərkəzi böyük inkişaf yolu keçib. İnfrastruktur tədbirləri həyata keçirilib, yeni və müasir tipli sosial obyektlər inşa olunub. Onların sırasında dörd və beşmərtəbəli binalar da var. Salınan yeni parklar, bağlar rayon mərkəzinin simasını xeyli dəyişib. 15 hektardan artıq sahədə yeni meyvə bağları salınıb. Ərik, badam və cəviz bağları da şəhərin ümumi gözəlliyinə yeni çalarlar gətirir. Ötən il 5 hektar ərik bağından nubar məhsullar dərilib.

"N" saylı hərbi hissənin zabitləri üçün inşa olunan beşmərtəbəli yaşayış binası ötən ilin iyun ayında öz qapılarını sakinlərinin üzünə açıb. Prezident İlham Əliyev Naxçıvana səfəri çərçivəsində burada olub, yaradılan şəraiti yüksək qiymətləndirərək deyib: "Bu gün bu gözəl binanın açılışı rəmzi xarakter daşıyır. Bu, Azərbaycan dövlətinin öz ordusuna olan münasibətinin əlamətidir".

Rayon mərkəzində gözoxşayan, könülaçan binalardan biri də Heydər Əliyev prospektində inşa olunan 630 şagird yerlik dördmərtəbəli orta məktəb binasıdır. 2007-ci ildə tikilib. Həmin ilin sentyabr ayından da müəllim və şagirdlərin ixtiyarına verilib. Burada tədrisin normal səviyyədə təşkili üçün lazımi şərait yaradılıb. Geniş və işıqlı sinif otaqları, fənn kabinetləri, laboratoriyalar, elektron lövhə, kitabxana və idman zalı vardır. Məktəb 16 dəst kompüterlə də təmin olunub.

Ötən il məktəbi bitirən məzunlardan 14 nəfəri ali məktəblərə qəbul olunub. Bu il isə orta məktəbi bitirən 41 şagird arasında daha yüksək nəticə gözlənilir. Təhsil ocaqlarından söz düşmüşkən, regionların sosial-iqtisadi inkişafı Dövlət Proqramı çərçivəsində son illər rayonda mövcud olan 23 məktəbdən 16-sı təzə, müasir binalarla təmin olunub. Bölgənin ən ucqar və sərhəd kəndlərindən sayılan Gömür, Ayrınc, Yuxarı Qışlaqda isə hər birində 144-156, Şada kəndində isə 80 yerlik ikimərtəbəli məktəb binası tikilib. Ötən il Şahbuzkənddə istifadəyə verilən təhsil ocağı isə 216 şagird yerlikdir. Təbii mineral bulaqları ilə adı dillər əzbəri olan Badamlı kəndində də bu cür məktəb inşa olunur. Şahbuz şəhərində inşa edilən rayon mərkəzi xəstəxanası da müasir tələblərə uyğun olacaqdır. Burada terapiya, pediatriya, doğum, cərrahiyyə, poliklinika şöbələri fəaliyyət göstərəcəkdir. 32 həkim və 44 orta tibb işçisinin çalışacağı xəstəxana müasir tibb avadanlıqları və rentgen aparatı ilə təmin olunacaq. Artıq yeni yaradılan laboratoriyalarda biokimyəvi və ümumi analizlərin aparılması üçün avadanlıqlar quraşdırılıb.

Yeni tipli mədəniyyət ocaqlarının tikintisi də diqqət mərkəzindədir. Onlardan biri "Gənclik mərkəzi"dir. Burada adamların asudə vaxtlarının səmərəli təşkili üçün müxtəlif tədbirlər keçirilir. "Araz" kino-klubunda yaradılan şərait də yaxşıdır. Müasir tipli mərkəzləşdirilmiş kitabxana sisteminin fəaliyyətə başlaması isə mütaliə həvəskarlarını sevindirib. Tarix-diyarşünaslıq muzeyində toplanan zəngin eksponatlar qədim oğuz-türk yurdunun dünəni ilə yanaşı, bugünkü inkişafından söz salır. Hər bir şahbuzlu qürur hissi keçirir ki, rayon ərazisində onlarca arxeoloji abidə var və bu yerlərdə insanlar tariximizin erkən dəmir dövründən yaşayıblar. 600 tamaşaçı yeri olan stadionun inşa olunması şahbuzlu gənclərin ürəyincə olub. "Batabat" futbol komandası muxtar respublika çempionatında uğurla çıxış edir.

Rayon prokurorluğu, əhalinin sosial müdafiəsi mərkəzi, DSMF-nin rayon şöbəsi, rabitə idarəsi, vergilər şöbəsi, YAP-ın rayon təşkilatı, 5 saylı dairə seçki komissiyası, hərbi komissarlıq üçün inşa olunan obyektlər də müasir dövrün quruculuq ərmağanlarındandır.

Şahbuz şəhəri indi də tikinti meydançasını xatırladır. Hazırda şəhərin yuxarı hissəsində yeni avtovağzal tikilir. Bu obyekt istifadəyə veriləndən sonra Naxçıvan şəhəri ilə yanaşı, Sədərək və Ordubad rayonları istiqamətində də avtobus marşrutu xətlərinin açılması nəzərdə tutulub.

Rayon mərkəzində inşa olunan yeni obyektlərdən biri tutumu 300 ton olan meyvə-soyuducu anbardır. 3 kameradan ibarət olacaq soyuducu müasir texnoloji avadanlıqlarla təmin olunacaq. Avadanlıqlar artıq xarici ölkələrdən alınıb. İstehsalçılar burada meyvə və tərəvəz məhsullarını qoruyub saxlaya biləcəklər.

Ahıllar üçün inşa olunan 100 yerlik pansionat ölkə əhəmiyyətli obyektlərdən biridir. Aparılan əsaslı təmir və yenidənqurma işləri obyektə yeni görkəm bəxş edib. Burada ölkəmizin ayrı-ayrı bölgələrindən 50-yə yaxın ahıl məskunlaşıb. Pansionatın həyətində 2 hektar sahədə gözəl meyvə bağı salınıb. Şahbuz şəhərinin gözəlliyini artıran cəhətlərdən biri də yaşıllıq və gülzarlıq sahələrinin çoxluğu, magistral yol kənarındakı su arxlarının çaylaq daşları ilə hörülməsi, avtomobil yollarının, səkilərin genişliyidir. Çinarla yanaşı Eldar şamı, ardıc, şərq tuyası kimi dekorativ ağaclar küçə və parklara xüsusi gözəllik bəxş edir. "Batabat" bulaq-abidə kompleksi də artıq şəhərin gözəl ünvanlarından birinə çevrilib. 23-25 kilometr məsafədən bulaq suyunun borular vasitəsi ilə buraya çəkib gətirmək asan olmayıb.

Amma insanlar görürlər ki, çəkilən zəhmət bu gözəlliyə dəyər.

Məmməd MƏMMƏDOV

Azərbaycan.- 2009.- 18 iyun.- S. 4.