Qırğızıstanın Çolpon-Ata şəhərində TRASEKA Hökumətlərarası Komissiyasının 7-ci illik iclası olmuşdur

Qırğızıstanın İsık Kul vilayətinin Çolpon-Ata şəhərində TRASEKA Hökumətlərarası Komissiyasının 7-ci illik iclası keçirilmişdir.

İclasda TRASEKA proqramının iştirakçısı olan dövlətlərin - Azərbaycan, Bolqarıstan, Gürcüstan, Qazaxıstan, Rumıniya, Moldova, Tacikistan, Türkmənistan, Ukrayna, Özbəkistan, Ermənistan və Qırğızıstanın milli katibləri, həmçinin TRASEKA Hökumətlərarası Komissiyası daimi katibliyinin, maliyyə institutlarının nümayəndələri iştirak etmişlər.

Avropa Komissiyasının nümayəndəsi Conatan Şili demişdir ki, TRASEKA nəqliyyat dəhlizi beynəlxalq nəqliyyat xəttinin əsas bağlayıcı hissəsi kimi Avropa ilə Asiyanı birləşdirən ən mühüm infrastrukturlardan biridir.

İclasda iştirakçı dövlətlər arasında əməkdaşlığın daha da dərinləşdirilməsi, yükdaşımaların artırılması məsələləri müzakirə edilmiş, İran İslam Respublikası TRASEKA-nın tamhüquqlu üzvü seçilmiş, quruma sədrlik Qazaxıstandan Qırğızıstana keçmişdir.

Deyilmişdir ki, 1993-cü ildən 2008-ci ilədək proqram çərçivəsində 120,13 milyon avro dəyərində 58 layihə həyata keçirilmişdir.

Qulu KƏNGƏRLİ,

AzərTAc-ın xüsusi müxbiri

Çolpon-Ata

Azərbaycan.- 2009.- 19 iyun.- S. 5.