Özündən çox dostları sevinirdilər

İsmayıllı rayonundakı İ.Həsənov adına şəhər 1 saylı orta məktəbin direktoru, respublikanın əməkdar müəllimi Şəfaqət Rəsulov ləyaqətlə ömür sürənlərdəndir. 1951-ci ildə rayonun Mican kəndində doğulub. Gəncədə Pedaqoji İnstitutun kimya fakültəsini bitirib. Sonra ordu sıralarında hərbi xidmət keçib, ayrı-ayrı orta məktəblərdə kimya fənnindən dərs deyib, rayon təhsil şöbəsində müxtəlif vəzifələrdə işləyib. Ötən il ölkə Prezidentinin sərəncamı ilə onun rəhbərlik etdiyi təhsil ocağı "İlin ən yaxşı məktəbi" müsabiqəsinin qalibi olub.

Şəfaqət müəllimi insanlara sevdirən həm də xeyirdə-şərdə yaxından iştirak etməsi, davranışındakı səmimilikdir. Bir neçə ay əvvəl ürəyi onu sınağa çəkəndə, İsmayıllı şəhər xəstəxanasında müalicə olunanda bir daha yəqin etdi ki, dostları onu heç vaxt intizarda saxlamaz, darda qoymazlar.

Şəfaqət müəllim bu barədə deyir: "Dost-tanışlarımın məsləhəti ilə Mərkəzi Neftçilər Xəstəxanasında yüksək ixtisaslı, tanınmış həkim Abasəli Abasəliyevə müraciət etdim. Müayinədən sonra bəlli oldu ki, ürəyimdə üç damarın fəaliyyəti məhdudlaşır, cərrahla məsləhətləşmək lazım oldu. Xəstəxananın cərrahiyyə şöbəsinin müdiri Rəşad Mahmudov təkrar müayinələrdən sonra əməliyyatın aparılması qənaətinə gəldi. Düzü, bunun üçün xeyli ödəniş tələb olunurdu. Kiçik qardaşım Moskvada yaşayır. Analizi və ürəyin fəaliyyətini əks etdirən diskləri ona göndərdim ki, moskvalı həkimlərlə də məsləhətləşsin. Bu faktı deməkdə məqsədim odur ki, Moskvadakı təcrübəli və məşhur ürək-damar cərrahları Azərbaycan kardioloqlarının çox bacarıqlı olduqlarını bildirmiş və Bakıda müalicəyə üstünlük vermişdilər. Bu sözləri eşidəndə ümidim xeyli artdı və nəhayət, aprel ayında İsmayıllı rayon xəstəxanasının baş həkimi Aftandil Rəhimov mənə bildirdi ki, qonşu Qəbələ rayonunda istifadəyə verilmiş Diaqnostika Mərkəzində Neftçilər Xəstəxanasının həkimləri Dövlət Neft Şirkətinin vəsaiti hesabına ürək-damar əməliyyatı edəcəklər.

Həmin xəstəxanada hərtərəfli müayinə edilərək əməliyyata hazırlandım. Aprelin 21-də Qəbələ Diaqnostika Mərkəzində mənimlə birlikdə üç nəfər (Füzuli rayonundan qaçqın Tərxan Bayramov və Qəbələ sakini, 21 yaşlı Rəhman Xəlilov) üzərində açıq ürək əməliyyatı aparıldı. Əməliyyat uğurla keçdi və aprel ayının 30-da evə buraxıldıq.

Mənim təhsil sektorunun inkişafı ilə əlaqədar Azərbaycan Prezidentinin və hökumətin həyata keçirdiyi tədbirlərdən kifayət qədər məlumatım var idi. İndi isə səhiyyə sahəsində görülən qlobal işlərin şahidi oldum. Ən müasir tibbi avadanlıqlarla təchiz edilmiş, hər cür şəraiti olan, dünya standartlarına cavab verən diaqnostika mərkəzlərimiz var. Lənkəranda, Naxçıvanda, Gəncədə, Yevlaxda, Zaqatalada inşa edilən belə tibb ocaqlarında ən ağır xəstəliklər müalicə olunur.

Mənim müalicəmə kömək edən həkimlərin, dostların adlarını çəksəm, uzun siyahı alınar. Fürsətdən istifadə edib onların hamısına dərin minnətdarlığımı bildirirəm. Məni ən çox sevindirən bir də odur ki, dövlətimiz vətəndaşının qayğısına qalır. Onun fiziki cəhətdən sağlam olması üçün vəsait əsirgəmir. Necə deyərlər, hətta mənim kimi xəstələnənləri də dağa-daşa düşməyə qoymur.

Mənim Şəfaqət müəllimlə bu söhbətimdə iştirak edən dostları Valeh Salehov və Hafiz Rəhimov onun sağlam həyata qayıtmasına özündən çox sevinirdilər.

Telman NƏZƏRLİ

Azərbaycan.- 2009.- 19 iyun.- S. 7.