Səhiyyə sahəsi dövlət qayğısı ilə əhatə olunmuşdur

Ölkə başçısı cənab İlham Əliyev tibb işçiləri günü münasibətilə iyunun 3-də "Azərbaycan Respublikasının səhiyyə işçilərinə fəxri adların verilməsi haqqında" və "Azərbaycan Respublikasının səhiyyə işçilərinin "Tərəqqi" medalı ilə təltif edilməsi haqqında" sərəncamlar imzalamışdır. Sərəncamlara əsasən 10 nəfər əməkdar həkim, 2 nəfər əməkdar elm xadimi adına layiq görülmüş, 11 nəfər isə "Tərəqqi" medalı ilə təltif edilmişdir.

Azərbaycanda bütün sahələrlə yanaşı, səhiyyə sistemi, həkimlər də daim dövlətin diqqət və qayğısı ilə əhatə olunmuşdur. Son illərdə respublika Prezidentinin təşəbbüsü ilə ən vacib sahələr üzrə - "Qanın, qan komponentlərinin donorluğu və qan xidmətlərinin inkişafına dair Dövlət Proqramı", "Hemofiliya və talassemiya irsi qan xəstəliyi üzrə Dövlət Proqramı", "Xroniki böyrək çatışmazlığı üzrə Tədbirlər Proqramı", "Yoluxucu xəstəliklərin immunoprofilaktikasına dair Tədbirlər Proqramı", "Onkoloji xəstələrin həyati vacib şiş əleyhinə preparatlarla təminatı üzrə Tədbirlər Proqramı", "Ana və uşaqların sağlamlığının qorunması haqqında Tədbirlər Proqramı" hazırlanmış və təsdiq edilmişdir. Respublikada bir sıra səhiyyə ocaqlarının, o cümlədən Bakıda Zərifə Əliyeva adına Elmi-Tədqiqat Oftalmologiya İnstitutunun, psixiatriya xəstəxanasının adi rejimli məcburi müalicə şöbəsinin Göygöl Mərkəzi rayon xəstəxanasının açılışı olmuşdur.

Bundan başqa, Şəmkir rayonunun Zəyəm qəsəbəsində, Goranboy rayonunun Saroğlu kəndində, Şəki rayonunda Cəfərabad və Turan həkim məntəqələri fəaliyyətə başlamışdır. Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə irimiqyaslı layihələrin, o cümlədən "Diabetli uşaqlara ən yüksək qayğı", "Talassemiyasız həyat naminə", "Uşaq Kardiocərrahiyyə Mərkəzinin yaradılması" və başqalarının həyata keçirilməsi, ən ağrılı problemlərdən biri olan böyrək çatışmazlığından əziyyət çəkən xəstələrin pulsuz (bilavasitə fondun maddi dəstəyi və təşəbbüsü ilə) hemodializ seansları alması, habelə yeni tikilmiş və əsaslı təmirdən çıxmış, ən müasir texniki avadanlıqla təchiz edilmiş yeni xəstəxana və poliklinikaların açılması bütövlükdə tibb sahəsinə, burada çalışan insanlara göstərilən diqqətin bariz nümunələridir. Dövlətimizin başçısının səhiyyə sahəsində imzaladığı sənədlər, aparılan genişmiqyaslı islahatlar səhiyyə işçilərinə lazımi şəraitin yaradılmasına və onların rifah halının yaxşılaşdırılmasına yönəldilmişdir. Prezident İlham Əliyevin tibb işçiləri günü ilə əlaqədar imzaladığı hər iki sərəncam da bu istiqamətdə atılan addımlardandır.

Adilə QOCAYEVA

Azərbaycan.- 2009.- 20 iyun.- S. 6.