Azərbaycan ilə İndoneziya arasında əməkdaşlığın perspektivləri müzakirə olunmuşdur

İyunun 22-də Milli Məclis Sədrinin birinci müavini Ziyafət Əsgərov ölkəmizdə səfərdə olan İndoneziya-Azərbaycan parlamentlərarası dostluq qrupunun üzvləri ilə görüşmüşdür.

Z.Əsgərov qonaqlara Milli Məclisin fəaliyyəti, qanunvericilik bazasının yaradılması prosedurları barədə ətraflı məlumat vermişdir. Bildirmişdir ki, Azərbaycan dövlət müstəqilliyini bərpa etdikdən sonra Milli Məclisdə iqtisadi, siyasi, mədəni, elm, təhsil, sosial, müdafiə, təhlükəsizlik və ölkə həyatının digər məsələlərinə dair minlərlə qanun qəbul edilmişdir.

Milli Məclis Sədrinin birinci müavini demişdir ki, İndoneziya Azərbaycanın özünə strateji tərəfdaş bildiyi çox mühüm dövlətlərdən biridir. Ölkəmizə belə bir geniş tərkibdə nümayəndə heyətinin gəlməsi onu göstərir ki, İndoneziyada da Azərbaycana maraq böyükdür. Ölkəmizin İndoneziyada səfirliyinin fəaliyyət göstərdiyini deyən Z.Əsgərov, yaxın vaxtlarda dost dövlətin də Azərbaycanda diplomatik missiyasının açılacağına ümid etdiyini demişdir.

Azərbaycan ilə İndoneziya arasında müxtəlf sahələri əhatə edən əməkdaşlıq əlaqələrinə toxunan Z.Əsgərov illik ticarət dövriyyəsinin 1,5 milyard dollar təşkil etdiyini bildirmiş, bu rəqəmin mövcud potensial imkanlarla müqayisədə çox az olduğunu vurğulamışdır.

Z.Əsgərov parlamentin beynəlxalq əlaqələrindən söhbət açaraq demişdir ki, Milli Məclis NATO, ATƏT, Avropa Şurası, Avropa İttifaqı, İslam Konfransı Təşkilatı və digər beynəlxalq təşkilatlar, eləcə də onların parlament assambleyaları ilə sıx əməkdaşlıq edir.

Milli Məclis Sədrinin birinci müavini Ermənistan-Azərbaycan, Dağlıq Qarabağ münaqişəsi barədə ətraflı məlumat vermiş, Ermənistanın təcavüzü nəticəsində bir milyondan çox insanın doğma yurd-yuvalarından didərgin düşdüyünü, 200 mindən artıq azərbaycanlının isə işğalçı dövlətin ərazisindən deportasiya edildiyini diqqətə çatdırmış, İndoneziya tərəfinə bu münaqişədə Azərbaycanın ədalətli mövqeyini daim dəstəklədiyinə görə təşəkkürünü bildirmişdir.

İndoneziya parlamenti nümayəndə heyətinin başçısı Hənif İsmayıl Bin M.Rıdvan Azərbaycana səfərlərdən və aldıqları məlumatlardan məmnun qaldığını bildirmişdir.

Azərbaycanın daha parlaq gələcəyi olduğunu vurğulayan qonaq, təmsil etdiyi dövlətin ölkəmizlə əməkdaşlığı daha da genişləndirməyə böyük maraq göstərdiyini qeyd etmişdir. Qonaq İndoneziyanın bundan sonra da Azərbaycanın ərazi bütövlüyünün bərpası istiqamətində diplomatik səylərini davam etdirəcəyini vurğulamışdır.

Daha sonra görüşdə Azərbaycanın Cənubi Qafqazdakı rolu, İndoneziya iş adamlarının ölkəmizə investisiya qoymaq imkanları, qanunvericilik sahəsində təcrübə mübadiləsi və əməkdaşlığın perspektivləri müzakirə olunmuşdur.

Görüşdə Azərbaycanın İndoneziyadakı səfiri İbrahim Hacıyev iştirak etmişdir.

* * *

Ölkəmizdə səfərdə olan İndoneziya parlamentində İndoneziya-Azərbaycan parlamentlərarası dostluq qrupunun üzvləri iyunun 22-də Milli Məclisə gəlmişlər.

Qonaqlar əvvəlcə Milli Məclisin iclas salonuna baxmış, burada deputatlar üçün yaradılmış iş şəraitini yüksək qiymətləndirmişlər. Parlamentin binasındakı Heydər Əliyev Xatirə zalı ilə də tanış olan indoneziyalı deputatlar xalqımızın ümummilli lideri Heydər Əliyevin həyat və fəaliyyətini, dünyanın tanınmış siyasətçilərinin Azərbaycana səfərlərini və ulu öndərlə görüşlərini əks etdirən fotoşəkilləri, tarixi sənədləri maraqla izləmişlər.

Sonra qonaqlar Milli Məclisdə Azərbaycan-İndoneziya parlamentlərarası dostluq qrupunun üzvləri ilə görüşmüşlər.

Azərbaycan-İndoneziya parlamentlərarası dostluq qrupunun rəhbəri Bəxtiyar Əliyev ölkəmizdə parlamentin yaranması tarixi barədə məlumat verərək demişdir ki, 1918-ci ildə müsəlman Şərqində ilk olaraq Azərbaycanda demokratik respublika qurulmuşdur. O vaxtlar ABŞ və Avropanın bir çox inkişaf etmiş ölkələrində qadınların seçib-seçilmək hüququ tanınmadığı halda, müstəqil Azərbaycanın parlamenti bu demokratik prinsipi qanunla təsbit etmişdir.

Bugünkü Milli Məclisin Azərbaycanda 91 il əvvəl yaradılmış parlamentin xələfi olduğunu qonaqların diqqətinə çatdıran B.Əliyev Milli Məclisin iş prinsipi, burada qəbul olunan qanun və qərarlar, Azərbaycan-İndoneziya parlamentlərarası dostluq qrupunun fəaliyyəti haqqında danışmış, ölkələrimiz və ali qanunverici orqanlar arasında əlaqələrin daha da genişləndirilməsinin vacibliyini vurğulamışdır.

İndoneziya parlamenti nümayəndə heyətinin rəhbəri Hənif İsmayıl Bin M. Rıdvan dost Azərbaycan torpağında səmimiyyətlə qarşılandıqlarını qeyd edərək bildirmişdir ki, səfərin əsas məqsədi ölkələrimiz arasında əlaqələrin, o cümlədən parlamentlərarası əməkdaşlığın daha da genişləndirilməsinə nail olmaqdır. Qonaq bunun üçün potensial imkanların mövcud olduğunu vurğulamış, İndoneziya-Azərbaycan parlamentlərarası dostluq qrupunun bu məqsədin reallaşması üçün əlindən gələni edəcəyini bildirmişdir.

Görüşdə hər iki ölkənin parlamentlərası dostluq qrupları arasında əməkdaşlığı daha da genişləndirmək və qarşılıqlı maraq doğuran digər məsələlər ətrafında işgüzar fikir mübadiləsi aparılmışdır.

* * *

Ölkəmizdə səfərdə olan İndoneziya parlamentinin nümayəndə heyəti iyunun 22-də Milli Məclisin Beynəlxalq münasibətlər və parlamentlərarası əlaqələr komitəsinin üzvləri ilə görüşmüşdür.

Beynəlxalq münasibətlər və parlamentlərarası əlaqələr komitəsinin üzvü Asim Mollazadə ölkələrimizin, habelə eyni dinə mənsub olan xalqlarımızın tarixi əlaqələrindən söz açaraq xarici təcavüzün və onun nəticələrinin nə olduğunu yaxşı bilən dost İndoneziyanin bütün beynəlxalq təşkilatlarda, o cümlədən BMT və İslam Konfransı Təşkilatı çərçivəsində ardıcıl surətdə Azərbaycanın ərazi bütövlüyünü dəstəkləməsini minnətdarlıq hissi ilə qeyd etmişdir.

Görüşdə Milli Məclisin deputatları bildirmişlər ki, Azərbaycan dünyanın ən böyük müsəlman dövləti olan və mənəvi cəhətdən özünə ən yaxın tərəfdaş bildiyi İndoneziya ilə əməkdaşlığın inkişafına böyük önəm verir. Bu işdə parlamentlərin, o cümlədən parlamentlərarası dostluq qruplarının da üzərinə mühüm vəzifələr düşür. Şübhəsiz ki, dost İndoneziyadan belə bir geniş tərkibli nümayəndə heyətinin Azərbaycana səfəri münasibətlərimizin yeni pilləyə qalxmasında mühüm rol oynayacaqdır.

İndoneziya-Azərbaycan parlamentlərarası dostluq qrupu nümayəndə heyətinin rəhbəri Hənif İsmayıl Bin M. Rıdvan Azərbaycanda iqtisadiyyatın inkişafı, xalqın həyat səviyyəsinin yüksəlməsi istiqamətində qazanılan nailiyyətlərdən, ölkənin beynəlxalq aləmdə nüfuzunun gündən-günə artmasından xəbərdar olduqlarını və bu uğurlara sevindiklərini bildirmişdir. Dağlıq Qarabağ münaqişəsinin tezliklə beynəlxalq hüquq normaları əsasında, Azərbaycanın ərazi bütövlüyü çərçivəsində həllinə ümid etdiyini bildirən indoneziyalı qonaqlar təmsil etdikləri dövlətin bundan sonra da respublikamızın ədalətli mövqeyini dəstəkləyəcəyini vurğulamışlar.

Görüşdə hər iki parlamentin nümayəndələri əməkdaşlığın inkişafına dair fikir və mülahizələrini bölüşmüşlər. Qeyd olunmuşdur ki, parlamentlərarası əlaqələr qanunvericilik fəaliyyətini də əhatə etsə, daha faydalı olar, xalqlarımızın bir-birini daha yaxşı tanıması üçün turizm əlaqələrinin inkişafı xeyli səmərə verər.

Görüşdə qarşılıqlı maraq doğuran bir sıra məsələlərə toxunulmuşdur.

AzərTAc

Azərbaycan.- 2009.- 23 iyun.- S. 6.