Avropa ədliyyə nazirlərinin 29-cu konfransı keçirilmişdir

İyunun 17-19-da Norveçin Tromso şəhərində Avropa Şurasının və Norveç hökumətinin təşkilatçılığı ilə Avropa ədliyyə nazirlərinin 29-cu konfransı keçirilmişdir. "Sükutu pozaq - məişət zorakılığına qarşı birləşək" mövzusuna həsr olunmuş tədbirdə Azərbaycanı ədliyyə naziri Fikrət Məmmədov təmsil etmişdir.

Ədliyyə Nazirliyinin mətbuat xidmətindən bildirmişlər ki, Avropanın 40-dan çox ölkəsinin ədliyyə orqanları rəhbərlərinin iştirak etdiyi konfransda Avropa Şurası Baş katibinin müavini Mod de Bur-Bukikkio, Norveçin ədliyyə naziri Knut Storberqet və BMT Baş katibinin müavini Aşa-Rouz Migiro çıxış etmişlər.

Vurğulanmışdır ki, gender bərabərliyi dünyada xüsusi əhəmiyyət kəsb edən məsələlərdən biridir. Məişət zorakılığı insan hüquqlarının pozulmasıdır və bu məsələ uzun müddət qapalı, qadağan olunmuş mövzu idi. Halbuki statistikaya əsasən, dünyada hər üç qadından biri zorakılığın qurbanı olur. Avropa Şurası bu problemin aradan qaldırılması məqsədilə xüsusi konvensiya layihəsi hazırlayır.

Ölkəmizin ədliyyə naziri tədbirdə çıxış edərək ümummilli lider Heydər Əliyevin gender probleminə xüsusi diqqəti nəticəsində Azərbaycanda qadınların cəmiyyətdə rolunun artırılması, bu sahədə dövlət siyasətinin gücləndirilməsi, ayrı-seçkiliyin aradan qaldırılması istiqamətində mühüm tədbirlərin görüldüyünü diqqətə çatdırmışdır.

Nazir vurğulamışdır ki, bu siyasətin davamı olaraq Azərbaycan Prezidenti İlham Əliyev tərəfindən mühüm qərarlar, o cümlədən məişət zorakılığı ilə mübarizənin gücləndirilməsini nəzərdə tutan İnsan hüquqlarının müdafiəsi üzrə Milli Fəaliyyət Planı, Demokratik cəmiyyətdə gündəlik zorakılıqla mübarizə üzrə Respublika Kompleks Proqramı qəbul edilmiş, beynəlxalq təcrübə nəzərə alınmaqla hazırlanmış "Məişət zorakılığına qarşı mübarizə haqqında" qanun layihəsinin Milli Məclisin müzakirəsinə verilmişdir.

Tədbir iştirakçılarının diqqəti Ermənistanın təcavüzü nəticəsində 1 milyona yaxın soydaşımızın qaçqın və məcburi köçkün vəziyyətinə düşməsi faktına, 250 min ailənin üzləşdiyi sosial, mənəvi və məişət problemlərinə və bundan irəli gələn psixoloji gərginliyə cəlb edilmişdir.

Çıxışda məişət zorakılığına qarşı mübarizənin gücləndirilməsinə dair bir sıra təkliflər irəli sürülmüşdür.

Maraqla qarşılanmış ingilis dilində çıxışın rus dilində mətni, habelə məişət zorakılığının qarşısının alınması ilə bağlı xüsusi broşürlər və videoçarxlar yazılmış DVD-lər tədbir iştirakçılarına paylanmışdır.

Tədbirdə məişət zorakılığına qarşı mübarizənin gücləndirilməsi, beynəlxalq hüquqi yardımın səmərəliliyinin artırılması, qanunun aliliyinin möhkəmləndirilməsinə dair 3 qətnamə qəbul olunmuş, Avropa Şurasının bir sıra konvensiyaları imzalanmaq üçün açıq elan edilmişdir.

Konfrans çərçivəsində Azərbaycan ədliyyə naziri Avropa Şurası Baş katibinin müavini, insan hüquqları üzrə Avropa komissarı və digər rəsmi şəxslərlə görüşmüş, əməkdaşlığa dair danışıqlar aparmışdır.

Səfər çərçivəsində bir sıra dövlətlərin, o cümlədən Türkiyə, Niderland, Macarıstan, Slovakiya, Avstriya və digər ölkələrin ədliyyə nazirləri ilə işgüzar görüşlər keçirilmiş, qarşılıqlı fəaliyyət barədə faydalı fikir mübadiləsi olmuşdur.

AzərTAc

Azərbaycan.- 2009.- 23 iyun.- S. 7.