Dövlət qulluqçusu xalqın xidmətçisidir, insanların qayğıları ilə yaşamaq onun əsas vəzifəsidir

Müsahibimiz Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın sədri Bəhram Xəlilovdur

- Bəhram müəllim, rəhbərlik etdiyiniz qurum 2006-cı ildən fəaliyyət göstərir. Və təbii ki, komissiya yaradılarkən onun qarşısında müəyyən vəzifələr qoyulmuşdur. İstərdik öncə bu vəzifələrin yerinə yetirilməsi barədə danışasınız...

- Komissiyanın hansı vəzifələri həyata keçirməsi barədə danışmazdan öncə onun yaranmasını şərtləndirən amilləri qeyd etmək lazımdır. Bildiyiniz kimi, ümummilli lider Heydər Əliyev çox ağır bir dövrdə hakimiyyətə gəlmişdir. Ölkəmiz parçalanmaq üzrə idi, dövlət hakimiyyəti iflic olmuşdu. Dövlət qulluğunda çalışanlar xalqın gözündən düşmüş, dövlət rəhbərliyinə inamsızlıq yaranmışdı. Məhz ulu öndərin zəngin dövlətçilik təcrübəsi və gərgin əməyi nəticəsində dövlətimiz təhlükədən qurtara bildi. Dövlət qulluğuna və dövlət qulluğunda çalışanlara xalqın inamının bərpa edilməsi, habelə milli və müasir dövlət qulluğu sisteminin qurulması məqsədilə Heydər Əliyevin siyasəti bu istiqamətləri əhatə edirdi: ölkəmizdə səmərəli, məsuliyyətli və demokratik idarəçiliyin yaradılması, dövlət orqanlarının fəaliyyətində çevikliyin və şəffaflığın gücləndirilməsi, vətəndaşların qayğı və ehtiyaclarının daha dolğun təmin edilməsi və dövlət orqanlarının üzərinə düşən funksiyaların səmərəli şəkildə yerinə yetirilməsinə xidmət edən təcrübəli və peşəkar dövlət qulluqçusu korpusunun formalaşdırılması.

Cənab İlham Əliyevin dövlət başçısı seçilməsi Böyük Azərbaycançı Heydər Əliyevin bütün sahələrdə başladığı işlərin uğurlu inkişafını sürətləndirdi. Respublikamızda dövlət qulluğunun daha yaxşı təşkili və idarə olunması məqsədi ilə məhz Prezident İlham Əliyevin 2005-ci il 19 yanvar tarixli fərmanı əsasında Azərbaycan Respublikasının Prezidenti yanında Dövlət Qulluğu Məsələləri üzrə Komissiya yaradılmışdır. Komissiya bilavasitə Azərbaycan Respublikasının Prezidentinə tabedir və onun qarşısında hesabat verir.

2006-cı ilin oktyabrından fəaliyyətə başlayan komissiyanın əsas məqsədləri dövlət qulluğu sahəsində qəbul edilmiş normativ hüquqi aktların tətbiqinin təşkil edilməsi, dövlət qulluğu üçün kadrların müsabiqə və şəffaflıq əsasında seçilməsi, dövlət qulluqçularının əlavə peşə təhsilinin əsaslarının müəyyən edilməsi, həmçinin dövlət qulluğu ilə bağlı digər məsələlər barədə qanunvericilikdə nəzərdə tutulmuş siyasətin həyata keçirilməsini təmin etməkdən ibarətdir.

Bundan əlavə, dövlət qulluqçuları üçün təlim tələbatlarının müəyyənləşdirilməsi və təlim strategiyasının hazırlanması kimi vəzifələr də komissiyanın məsul olduğu məsələlərdəndir.

- Bu vəzifələrin həyata keçirilməsi üçün komissiya hansı işləri görür?

- Bu vəzifələrin həyata keçirilməsi ilə əlaqədar komissiya dövlət qulluğu və kadr məsələləri sahəsində fəaliyyətin təkmilləşdirilməsi üçün tələb olunan normativ hüquqi aktların layihəsini hazırlayır, dövlət qulluqçularının peşə hazırlığı və ixtisasının artırılması sahəsində dövlət orqanlarının fəaliyyətini əlaqələndirir, bu sahədə işlərin vəziyyətini təhlil edir və təkliflər hazırlayır, mərkəzləşdirilmiş qaydada vətəndaşların dövlət qulluğuna qəbulunu müsabiqə və şəffaflıq əsasında həyata keçirilməsini təmin edir, dövlət qulluqçularının idarə edilməsinə dair mərkəzləşdirilmiş məlumat bazasını inkişaf etdirir və Azərbaycan Respublikasının qanunvericiliyi ilə komissiyaya həvalə olunmuş digər vəzifələri yerinə yetirir.

Komissiya qarşısına qoyulan əsas məqsədlərdən birinə çatıb. Belə ki, 2007-ci ildən başlayaraq vətəndaşların dövlət qulluğuna qəbulu şəffaflıq və müsabiqə əsasında keçirilir. Bu gün biz qətiyyətlə deyə bilərik ki, dövlət qulluğuna qəbulda əksər neqativ halların qarşısı alınmışdır. Artıq dövlət qulluğuna vətəndaşlar yalnız və yalnız öz bilik və bacarıqları sayəsində qəbul olunurlar. Nəticədə bu da, həm dövlət qulluğunda təcrübəli və peşəkar dövlət qulluqçusu korpusunun formalaşmasına, həm də bu sahədə aparılan dövlət siyasətinə ictimai etimadın artırılmasına xidmət edir. Bu, istər vakant dövlət qulluğu vəzifələrinin tutulması üçün müsabiqənin keçirilməsi məqsədi ilə komissiyaya müraciət edən dövlət orqanlarının və onların təqdim etdiyi vəzifələrin, istərsə də bu müsabiqələrdə iştirak etmək üçün qeydiyyatdan keçən namizədlərin sayında özünü göstərir. Belə ki, birinci müsabiqədə 15 dövlət orqanı iştirak edirdisə, bu gün biz 40 mərkəzi icra hakimiyyəti orqanı üzrə vakant vəzifələri müsabiqə və ya müsahibəyə təqdim edirik. Namizədlərə gəldikdə isə birinci müsabiqədə 930 namizəd iştirak edirdisə, sonuncu, altıncı müsabiqədə 2862 namizəd sənəd vermişdir. Namizədlərin sayının 3 dəfə artması elə ictimai etimadın bariz nümunəsidir.

- Bu günə qədər komissiyanın təşkil etdiyi müsabiqə və müsahibələr əsasında neçə nəfər dövlət qulluğuna qəbul edilmişdir?

- İndiyədək komissiyanın keçirdiyi 5 müsabiqə və 5 müsahibə əsasında 622 nəfər vakant dövlət qulluğu vəzifəsinə təyin olunmuşdur. Onların 343 nəfəri müsabiqə, 222 nəfəri müsahibə nəticəsində, 57-si isə ehtiyat kadrlar siyahısından dövlət orqanlarında işlə təmin olunmuşlar. Bu gün ehtiyat kadrlar siyahısında 85 namizəd var. Onlar yüksək potensiala malik və dövlət qulluqçusu olmağa tam hazır olan namizədlərdir. Biz yeni müsabiqə elan etməmişdən öncə ehtiyat kadrlar siyahısında olan namizədlərin şəxsi işlərini onların uyğun gəldiyi vakant vəzifənin tutulması üçün dövlət orqanına təqdim edirik. İnzibati vəzifələrin 6-9-cu təsnifatına uyğun olan vakant vəzifəsi olan dövlət orqanları bu namizədlərin potensialından yararlana bilərlər.

Oxucularınızla bir məsələni də bölüşmək istəyirəm. "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" üzrə təhsil almış vətəndaşlar birbaşa ehtiyat kadrlar siyahısına daxil edilirlər. Komissiyanın gördüyü tədbirlər nəticəsində indiyə qədər xaricdə bu proqram əsasında təhsil alan 5 namizəddən 3-ü müvafiq dövlət orqanında vakant vəzifəyə qəbul edilmişdir.

- Biz müşahidə etmişik ki, test imtahanı mərhələsində uğur qazanan namizədlərin yalnız 30 faizi müsahibədə uğur əldə edir...

- Komissiyanın indiyə qədər təşkil etdiyi 5 müsabiqə üzrə qeydə alınmış 7772 namizəddən 1543-ü test imtahanı mərhələsində uğur qazana bilmişdir. Bu da namizədlərin orta hesabla 20 faizini təşkil edir. Bunların da orta hesabla 31 faizi müsahibə mərhələsini uğurla adlamışdır. Mart ayında elan olunmuş 6-cı müsabiqənin ikinci mərhələsi hələ davam etdiyindən neçə namizədin uğur qazanacağını öncədən demək mümkün deyil. Amma 6-cı müsabiqədə də iştirak edən 2862 namizəddən təxminən 19 faizi, yəni 539 namizəd test imtahanı mərhələsindən uğurla keçmişdir. Göründüyü kimi, müsabiqələrdə iştirak edən namizədlərin sayı artsa da, test mərhələsini keçənlərin statistik göstəriciləri o qədər də dəyişmir.

- Test imtahanında uğur qazananların cəmi 20 faiz olmasını nə ilə izah edərdiniz?

- Dəfələrlə bildirmişik ki, müsabiqələrdə iştirak edən namizədlərin təhsil səviyyəsi bizi tam qane etmir. Bir çox vakant vəzifə müsabiqə və yaxud müsahibədən sonra boş qalır. Bu, namizədlərin təhsil səviyyəsi ilə bağlıdır. Qeyd etdiyim kimi, test imtahanı mərhələsində iştirak edən namizədlərin təxminən 19-20 faizi uğur qazana bilir. Nəzərə alsaq ki, biz namizədlərin test imtahanına hazırlığını təmin etmək üçün test bankı və onların tərtibində istifadə edilmiş ədəbiyyat siyahısını elan verdiyimiz gündən öz internet səhifəmizdə yerləşdirməklə bütün namizədlərə bərabər şərait yaradırıq, bu, olduqca zəif göstəricidir. Baza təhsili yaxşı olan namizəd üçün bu şərtlər içində 100 sualdan 80-nə düzgün cavab vermək elə də çətin olmamalıdır.

Bunu ali məktəblərə bir siqnal kimi də qiymətləndirmək olar. Çünki namizədlərin əksəriyyətini ali məktəbləri yeni bitirmiş şəxslər təşkil edir.

- Bəzən belə fikirlər səslənir ki, namizəd test imtahanını uğurla keçibsə, müsahibəyə nə lüzum var. Sizin buna münasibətiniz necədir?

- Komissiya müsabiqələrin müsahibə mərhələsinə xüsusi önəm verir. Yalnız test imtahanı ilə namizədlərin dövlət qulluğuna yararlı olub-olmamasını müəyyən etmək mümkün deyil, bu heç doğru da olmazdı. Çünki dövlət qulluğuna gələn abituriyent deyil ki, hələ 4-6 il ali təhsil ocağında bilik və təcrübə toplasın. Dövlət qulluğuna gələn vətəndaş bu şərəfli və məsuliyyətli işə hazır olmalıdır. Bunun üçün onun bilik və təcrübəsi ilə yanaşı, şəxsi keyfiyyətləri də çox yüksək olmalıdır. Çünki dövlət qulluğunda o, dövlətin adından vətəndaşlarımıza xidmət göstərəcəkdir.

Test imtahanı mərhələsində namizədlərin zəruri peşə-ixtisas, qanunvericilik və kompüter bilikləri, habelə məntiqi düşünmə qabiliyyəti yoxlanılır. Müsahibədə isə müsahibə qrupu namizədlərin müvafiq vəzifəyə yararlılığını dörd meyara əsasən qiymətləndirir. Bunlar namizədin bilik səviyyəsi, peşə hazırlığı, ümumi dünyagörüşü və müvafiq vəzifə üçün lazım olan digər keyfiyyətlərdir. Sözsüz ki, müsahibə qrupu namizədlərin şəxsi keyfiyyətlərini, yəni vətənpərvərlik duyğularını, səmimilik, özünütənqid hisslərini, ünsiyyət qurmaq, analitik təhlil, problem həlletmə qabiliyyətlərini də qiymətləndirir. Bu keyfiyyətləri də yalnız namizədlə birbaşa müsahibə əsasında qiymətləndirmək olar.

- Adi bir müsahibədə namizədin şəxsi keyfiyyətlərini necə təyin edirsiniz?

- Müsahibənin aparılma texnologiyaları var. Komissiyanın əməkdaşları həm xaricdə, həm də Bakıda müsahibənin aparılması üçün hazırlıq keçiblər. Qiymətləndirmə formaları işləyib hazırlamışıq. Dövlət orqanlarının müsahibə komissiyasına təqdim etdiyi üzvləri üçün də müsahibə aparılması texnologiyalarını öyrətmək üçün bir neçə dəfə treninqlər keçirmişik.

- Müsahibədə 3-4 namizəddən birinin keçməsini namizədlərə qarşı subyektiv yanaşma kimi qiymətləndirənlər də var. Bu mərhələnin şəffaflığını təmin etmək məqsədilə hansı tədbirlər görülür?

- Doğrudan da, müsabiqənin ikinci mərhələsi olan müsahibəyə gələn namizədlərin təxminən 3-də biri keçir. Müsahibədən keçməyənlər də, təbii ki, narazı qalır. Komissiyanın fəaliyyəti tam açıqdır. Kimin əlində hər hansı bir fakt varsa, buyursun müraciət etsin. Komissiya müraciət edənin iştirakı ilə hər bir faktı araşdırmağa hazırdır.

Müsahibə mərhələsində subyektivliyin aradan qaldırılması üçün komissiya işini tam şəffaflıq əsasında qurub. Birincisi, biz, istisnasız olaraq, bütün namizədlərin elektron ünvanlarına hansı mövzularda müsahibənin gedəcəyi barədə email vasitəsi ilə geniş məlumat göndəririk. Bu, subyektivliyin qarşısını almaqla yanaşı, həm də namizədlərin start vəziyyətində bərabərliyini saxlayır. İkincisi, obyektivlik və şəffaflığı təmin etmək məqsədilə müsahibələrin video çəkilişləri aparılır və 1 il komissiyada saxlanılır. Video yazılışlar aparıldıqdan sonra namizədlərin özlərinə verdiyi qiymətlə müsahibə qrupu üzvlərinin qiymətləndirməsi demək olar ki, tam üst-üstə düşür.

Eyni zamanda, bu mərhələdə şəffaflığı tam təmin etmək üçün müsahibələri açıq elan etdik. KİV, QHT və beynəlxalq təşkilatların nümayəndələri komissiyada qeydiyyatdan keçməklə müsahibələrdə müşahidəçi kimi iştirak edə bilərlər. Üçüncüsü, müsahibə qrupu üzvlərinin namizədin vakant vəzifəyə uyğun olub-olmaması barədə verdikləri qiymətlərdə 3 baldan artıq fərq yaranarsa, bu müsahibənin nəticəsi ləğv edilir və yeni müsahibə keçirilir. Bu halda müsahibə qrupunun üzvləri tam dəyişir. İndiyə qədər keçirilən müsahibələrdə bir neçə belə hal baş vermişdir. Həmin müsahibələrin nəticəsi ləğv edilmiş, yeni müsahibə qrupu təşkil olunmuş, yenidən müsahibə keçirilmişdir. Dördüncüsü, komissiyada müsahibələri qiymətləndirmək üçün yaradılan daxili nəzarət qrupu həmin müsahibənin video çəkilişinə baxır və müsahibə qrupu üzvlərindən hansının subyektivliyə yol verdiyini araşdırır. Subyektivliyə yol verən müsahibə qrupunun üzvü müsahibələrdən tamamən kənarlaşdırılır. Müsahibədə keçid balı 16-dır. Daxili nəzarət qrupu hətta 15 və artıq bal qazanan, amma keçid balı toplamayan namizədlərin də müsahibəsini araşdırır.

- Bəs müsahibələrdə iştirak etmək hüququ əldə etmiş namizədlərin belə zəif göstəricilərinin səbəbi nədir?

- Komissiyanın apardığı araşdırma nəticəsində bunun bir neçə səbəbi üzə çıxmışdır: Birinci səbəb kimi namizədlərin komissiyanın saytında yerləşdirilən və müsabiqə qaydalarını tam əhatə edən "Dövlət qulluğuna qəbul və inzibati vəzifələrin tutulması üçün müsahibənin keçirilməsi Qaydaları" ilə maraqlanmamalarını göstərmək olar. Bu qaydalarda isə namizədin hansı meyarlar əsasında qiymətləndiriləcəyi dəqiq qeyd olunur. İkinci səbəb namizədlərin iddia etdikləri vakant dövlət qulluğu vəzifəsinin qulluq funksiyalarını öyrənməmələridir. Baxmayaraq ki, komissiya həm kütləvi informasiya vasitələrində yerləşdirdiyi elanda, həm də özünün internet səhifəsində bu barədə ətraflı məlumat yerləşdirir. Üçüncü səbəb namizədlərin işləmək istədikləri dövlət orqanı barədə məlumatlarının olmamasıdır. Bu da namizədin işləmək istədiyi dövlət orqanına etinasızlığı kimi dəyərləndirilə bilər. Dördüncü səbəb kimi namizədlərin ümumi dünyagörüşünü qeyd etmək olar. Bəzi namizədlər əsasən ölkədə və dünyada baş verən ən önəmli hadisələrdən ya xəbərsiz olurlar, ya da çox zəif məlumatlıdırlar. Beşinci səbəb kimi bəzi namizədlərin vətənpərvərlik duyğularını və şəxsi keyfiyyətlərini göstərmək olar. Onların müsahibə zamanı dövlətimizə qarşı biganəliyi, qeyri-səmimiliyi, analitik qabiliyyətinin zəif olması üzə çıxır.

- Komissiyanın fəaliyyətindən kənar işə götürmə halları olurmu?

- Bir neçə belə faktlar olub, lakin qarşısını almışıq. Biz həmişə açıq bir qurum olmuşuq.

Kimdə elə faktlar varsa, bizə məlumat verməyi tövsiyə edirik. Əmin edirik ki, biz həmin faktları araşdırıb nəticəsi barədə ictimaiyyətə məlumat verəcəyik.

- Müsahibələrinizin birində bildirmişdiniz ki, dövlət qulluqçularının etik davranış qaydaları ilə bağlı problemlər hələ də qalmaqdadır. Bunlar hansı problemlərdir?

- Problemlər olmasaydı, "Dövlət qulluqçularının etik davranış qaydaları haqqında" qanunun qəbul edilməsinə də ehtiyac olmazdı. Həmin qanunun icrasına nəzarəti həm dövlət orqanları, həm də komissiya həyata keçirir. Etik davranış qaydalarının pozulması barədə komissiyaya bir neçə müraciət olub. Komissiya bu müraciətləri qanunvericiliyə uyğun olaraq araşdırmış və müvafiq tədbirlərin görülməsi üçün dövlət orqanı rəhbərinə təqdimat vermişdir. Əsas problemlərdən biri dövlət qulluqçularının vətəndaşlarla davranışındadır.

Bundan başqa, bütün dövlət orqanlarından etik davranış qaydalarına riayət edilməsi barədə hesabatlar almışıq. Avropa Şurasının Korrupsiyaya qarşı mübarizə üzrə AZPAC layihəsi var. Həmin layihə çərçivəsində xarici ekspertləri cəlb etməklə dövlət qulluqçuları üçün treninq-seminarlar keçirmişik. Bizdə olan məlumata görə, bu tədbirlərin faydası olub.

- Komissiyanın əsas vəzifələri barədə danışarkən dövlət qulluqçularının əlavə peşə təhsilinə cəlb edilməsini də qeyd etdiniz. Bu barədə nə deyə bilərsiniz?

- Komissiya dövlət qulluqçularının peşə və ixtisas artımını daim diqqətdə saxlayır. Dövlət qulluqçuları üçün təlimlərin keçirilməsinin əsas məqsədi dövlət qulluqçularının qarşısına qoyulan vəzifələrə nail olunmasıdır.

Komissiya Almaniya Texniki Əməkdaşlıq Cəmiyyəti (GTZ) ilə birgə həyata keçirdiyi layihə çərçivəsində dövlət orqanlarının kadr qurumları rəhbərləri üçün 2008-ci ilin may-iyul aylarında Litva Respublikasının paytaxtı Vilnüs şəhərində "Kadrların idarəedilməsi" mövzusunda təlim kursları təşkil etmişdir. Bundan əlavə, komissiya Birləşmiş Millətlər Təşkilatının İnkişaf Proqramı ilə regionlarda fəaliyyət göstərən dövlət qulluqçuları üçün silsilə təlimlər keçirir.

Komissiya qanunvericiliyin tətbiqi zamanı meydana çıxan problemləri müəyyən edərək və dövlət qulluğu sahəsində beynəlxalq təcrübəni öyrənərək "Dövlət qulluğu haqqında" qanuna dəyişikliklər və əlavələr edilməsi barədə qanun layihəsi hazırlamışdır. Həmin layihə Milli Məclis tərəfindən qəbul edilmiş 2008-ci ilin sonlarında qüvvəyə minmişdir. Qanunda dövlət qulluqçularının peşəkarlığının inkişaf etdirilməsi məqsədi ilə əlavə peşə təhsili keçmə, dövlət qulluğunda rotasiya sisteminin tətbiq edilməsi və digər məsələlər nəzərdə tutulmuşdur. Dövlət qulluqçularının əlavə peşə təhsilinə cəlb ediməsi, təcrübə keçməsi, yenidən hazırlanması və ixtisasartırması üçün dövlət sifarişinin hazırlanması Nazirlər Kabinetinin 19 mart 2009-cu ildə qəbul etdiyi "Dövlət qulluqçularının əlavə peşə təhsilinin növü, forması, müddəti və maliyyə təminatı qaydaları" ilə komissiyaya həvalə olunmuşdur. Bu qaydalar 2010-cu il yanvarın 1-dən qüvvəyə minir.

- Bildirdiniz ki, dövlət qulluqçularının idarə edilməsinə dair mərkəzləşdirilmiş məlumat bazasının yaradılması da komissiyanın əsas fəaliyyət istiqamətlərindəndir. Bu sahədə nə kimi tədbirlər görülür?

- Komissiya bu sahədə görülən işlərin genişləndirilməsi, beynəlxalq standartlara uyğun idarə olunması və səmərəli istifadə edilməsi üçün səlahiyyətləri daxilində bütün zəruri işləri görür. Bilirsiniz ki, dövlət qulluqçuları reyestrinin aparılması Azərbaycan Respublikasının Prezidentinin fərmanı ilə komissiyaya həvalə edilmişdir. Dövlət reyestrinin məqsədi dövlət qulluqçuları haqqında məlumatları əhatə edən vahid informasiya sisteminin yaradılmasıdır.

Hazırda reyestrin məlumat bazasında 7000-dən artıq dövlət qulluqçusu barədə məlumat toplanmışdır. Bu məlumatlar hər ayın 1-dən gec olmayaraq yenilənir. 2008-ci ilin sonundan başlayaraq yerli icra hakimiyyəti orqanlarında çalışan dövlət qulluqçuları ilə bağlı məlumatların da reyestrə daxil edilməsinə başlanılmışdır.

Dövlət reyestri bizə hər bir dövlət qulluqçusu barədə dolğun məlumat əldə etmək imkanı verir. Dövlət reyestrinin ən önəmli xüsusiyyətlərindən biri də onun dövlət qulluğunda çalışan kadr resurslarının idarə edilməsində oynadığı roldur. Belə ki, reyestr dövlət qulluğunda kadrların hərəkətinin idarə olunması ilə yanaşı, dövlət qulluqçusunun qulluqda yüksəlişinin də şəffaflıq və ədalətlilik prinsiplərinə uyğun həyata keçirilməsini təmin edir.

- Dövrümüz İKT dövrüdür. Komissiya bu sahədə hansı tədbirlər keçirir?

- Bu gün Prezident İlham Əliyevin siyasəti dövlətimizdə "elektron hökumət"in qurulmasına yönəlib. Bunu nəzərə alan komissiya dövlət qulluğuna qəbulla bağlı keçirilən test imtahanlarında 10 sualı məhz İKT sahəsinə aid edib. Bundan başqa, keçirilən müsahibələr zamanı da namizədlərin İT sahəsində bilikləri yoxlanılır. Yəni İKT-nin dövlət idarəedilməsində, "elektron hökumət"in və "informasiya cəmiyyəti"nin təşəkkül tapmasında önəmini nəzərə alan komissiya dövlət qulluğuna kompüter və əsas ofis proqramlarını bilən, habelə internetlə işləmək bacarığı olan vətəndaşların qəbulunda maraqlıdır. Bu da karyerasını dövlət qulluğunda qurmaq istəyən vətəndaşların İKT sahəsini daim diqqətdə saxlamasına xidmət edir.

Bundan başqa, komissiya vətəndaşlarla münasibətini əsasən İT-nin yaratdığı imkanlar vasitəsi ilə qurur. Bu da komissiya ilə vətəndaşlar arasında yaranmış qarşılıqlı etibar və güvənin göstəricisidir.

Komissiya özünün rəsmi internet saytını "İnformasiya əldə etmək haqqında" qanununa uyğun olaraq ictimai informasiyaların ilkin mənbəyi kimi qiymətləndirərək həmin qanunun 29-cu maddəsinin tələblərinə uyğun olaraq tərtib etmişdir. İnternet səhifəsində komissiyaya birbaşa müraciət etmək üçün imkan yaradılmışdır.

Müsabiqə və müsahibələrin elan mərhələsindən tutmuş namizədin vakant vəzifəyə uyğun olub-olmaması barədə yekun qiymətləndirməyədək bütün informasiyalar komissiyanın rəsmi internet səhifəsində gündəlik yerləşdirilir. Müsabiqə və müsahibələr zamanı sənəd qəbulu prosesinin gedişi və müsabiqə vəziyyəti haqqında gündəlik məlumat internet istifadəçiləri olan namizədlərin nəzərinə çatdırılır. Bu həm də imkan verir ki, vakant dövlət qulluğu vəzifəsi seçən namizədlər bir yerə neçə nəfərin iddia etdiyini bilsinlər. Yəni seçim edərkən rəqabətlilik vəziyyətini də bilsinlər. Bu ildən başlayaraq elektron ünvanı olan bütün namizədlərə müsabiqənin gedişi ilə bağlı gündəlik statistik məlumatlar çatdırılır.

Sonda bir vacib məqama da toxunmaq istərdim. Azərbaycan Respublikasında demokratik, hüquqi və dünyəvi dövlət qurulması prosesində dövlət qulluğunun rolunu və Birləşmiş Millətlər Təşkilatının Baş Assambleyasının tövsiyəsini nəzərə alan Azərbaycan Respublikasının Prezidenti hər il iyunun 23-nün Azərbaycan Respublikasında Dövlət qulluqçularının peşə bayramı kimi qeyd olunması barədə 2006-cı il 26 may tarixində sərəncam imzalamışdır. Həmin ildən də dövlət qulluqçuları iyunun 23-də peşə bayramlarını qeyd edirlər.

Bu bayram münasibətilə bütün dövlət qulluqçularını ürəkdən təbrik edir, onların hər birinə gördükləri şərəfli və məsuliyyətli işdə uğurlar arzu edirəm. Hər bir dövlət qulluqçusunun uğuru ümumilikdə dövlətimizin uğurudur. İstərdim ki, hər bir dövlət qulluqçusu dövlət qulluğuna qəbul olunarkən təntənəli şəraitdə Azərbaycan Respublikasının Dövlət bayrağı altında Azərbaycan Respublikasının Konstitusiyasına əl basmaqla içdiyi dövlət qulluqçusu andına daim sadiq qalsın, Azərbaycan dövlətinin onun qarşısında qoyduğu vəzifələri layiqincə yerinə yetirsin. Azərbaycan Respublikasının Prezidenti cənab İlham Əliyevin dediyi kimi, "...müstəqil Azərbaycan Respublikasında dövlət qulluğunda çalışmaq hər bir insan üçün son dərəcə şərəfli işdir. Bu o deməkdir ki, həmin vətəndaşa müstəqil, demokratik dövlət və vətəndaş cəmiyyəti quruculuğunun ön sıralarında olmaq imkanı etibar edilmişdir. Hər bir şəxs bilməlidir ki, dövlət qulluğunda olmaq imtiyaz deyil, məsuliyyətdir, insanlara xidmət imkanıdır. Tutduğu vəzifənin səviyyəsindən və əhəmiyyətindən asılı olmayaraq, dövlət qulluqçusu həmişə xatırlamalıdır ki, o, xalqın xidmətçisidir, insanlara xidmət, onların qayğıları ilə yaşamaq onun əsas vəzifəsidir".

Rəşad CƏFƏRLİ

Azərbaycan.- 2009.- 24 iyun.- S. 5.