Regional məsələlər komitəsinin iclası keçirilmişdir

İyunun 24-də Milli Məclisin Regional məsələlər komitəsinin iclası keçirilmişdir.

Komitənin sədri Arif Rəhimzadə bildirmişdir ki, gündəliyə iki məsələ - "Azərbaycan Respublikasının Hacıqabul, Salyan, Sabirabad rayonlarının və Şirvan şəhərinin inzibati ərazi bölgüsündə qismən dəyişiklik edilməsi haqqında" və "Azərbaycan Respublikasının İsmayıllı rayonunun inzibati ərazi bölgüsündə qismən dəyişiklik edilməsi haqqında" qanun layihələri daxil edilmişdir.

A.Rəhimzadə birinci məsələ barədə məlumat verərək bildirmişdir ki, Şirvan şəhərinin ərazisinin genişləndirilməsi məqsədi ilə şəhəri əhatə edən Hacıqabul, Salyan və Sabirabad rayonlarının inzibati ərazi bölgüsündə qismən dəyişiklik edilməsi nəzərdə tutulmuşdur. Bu dəyişikliklərin həyata keçirilməsi Şirvan şəhərinin inkişafına öz müsbət təsirini göstərəcəkdir.

İclasda müzakirə edilən ikinci məsələ İsmayıllı rayonunun inzibati ərazi bölgüsünə təklif olunan dəyişikliklərlə bağlı olmuşdur. Bildirilmişdir ki, sənədə əsasən Qalacıq kənd inzibati ərazi dairəsində yerləşən yaşayış məntəqələri Çəmənli və Elabad kəndləri adlandırılır. İstisu, Çayqovuşan və Elabad kəndlərinin bazasında İstisu kənd inzibati ərazi dairəsi yaradılır.

Sənəddəki digər dəyişikliyə əsasən, Xanagah və Bizlan kəndləri (Zərgəran kəndi ilə birlikdə) ayrıca kənd inzibati ərazi dairələri kimi dövlət reyestrinə daxil edilir.

İclasda komitə üzvləri hər iki məsələ barədə fikirlərini açıqlamışlar. Sənədlər parlamentin geniş iclasında müzakirəyə tövsiyə olunmuşdur.

AzərTAc

Azərbaycan.- 2009.- 25 iyun.- S. 5.