Astanada Avratlantik Tərəfdaşlıq Şurasının təhlükəsizlik məsələlərinə dair 3-cü forumu keçirilmişdir

Forumda NATO-nun üzvü olan 28, tərəfdaşı olan 22 ölkənin yüksək səviyyəli nümayəndələri iştirak etmişlər.

Ölkəmizi bu tədbirdə Milli Məclis Sədrinin birinci müavini, NATO Parlament Assambleyasındakı Azərbaycan nümayəndə heyətinin rəhbəri Ziyafət Əsgərovun başçılığı ilə deputat Jalə Əliyeva və NATO yanında Azərbaycan nümayəndəliyinin başçısı Kamil Xasıyevdən ibarət nümayəndə heyəti təmsil etmişdir.

Tədbirdə Mərkəzi Asiyada və Qafqazda təhlükəsizlik problemləri, Əfqanıstanda vəziyyətin sabitləşməsi məsələləri, problemin həllində dünya ölkələrinin və qonşu dövlətlərin rolu, enerji təhlükəsizliyi, Qara dəniz regionunda əməkdaşlığın genişləndirilməsi, insan hüquqları və digər məsələlər müzakirə edilmişdir.

Forumda "Enerji təhlükəsizliyi: Xəzər dənizi və Qara dəniz regionunda əməkdaşlıq" mövzusunda məsələ müzakirə olunan qrupda Ermənistanın NATO-dakı nümayəndəsi "regionun enerji layihələrindən kənarda qaldıqlarını və bundan əziyyət çəkdiklərini" bildirmişdir. O demişdir: "Ermənistan bütün neft və qaz layihələrindən kənarda qalmışdır və çox istərdik ki, bu layihələrdə iştirak edək".

Ziyafət Əsgərov cavab olaraq bildirmişdir ki, Ermənistanın bütün regional layihələrdən kənarda qalmasında Azərbaycan deyil, məhz bu ölkənin özü günahkardır. Ermənistan özünün işğalçılıq siyasətinin girovuna çevrilib və ona görə də layihələrdə iştirak edə bilmir. Siz işğalçı dövlətsiniz, torpaqları azad edin, işğaldan əl çəkin, ondan sonra sizinlə əməkdaşlığı müzakirə edə bilərik.

Z.Əsgərov Ermənistan-Azərbaycan, Dağlıq Qarabağ münaqişəsi, problemin həllində Azərbaycanın sülh təşəbbüsləri barədə də məlumat vermişdir.

Qazaxıstanın energetika və mineral ehtiyatlar nazirinın müavini Aset Maqauov, ABŞ-dan olan politoloq Zeyno Baran Avropanın enerji təminatında Azərbaycanın rolundan danışmışlar.

Forumun "Regional perspektivlər: Qafqazda həll olunmayan münaqişələrin həllinin perspektivləri" mövzusundakı seminarda Türkiyənin NATO-dakı nümayəndəsi Ünal Çevikgöz Dağlıq Qarabağ münaqişəsinə toxunaraq demişdir ki, münaqişə həll olunmayınca, Türkiyə Ermənistanla hər hansı diplomatik danışıqların aparılmasına razılıq verməyəcəkdir.

Kamil Xasıyev isə çıxışında bildirmişdir ki, Ermənistan-Azərbaycan, Dağlıq Qarabağ münaqişəsi yalnız və yalnız Azərbaycanın ərazi bütövlüyü çərçivəsində həllini tapa bilər.

Jalə Əliyeva enerji layihələrinin icrasında Azərbaycanın rolundan danışmışdır.

Qulu KƏNGƏRLİ,

AzərTAc-ın xüsusi müxbiri

Astana

Azərbaycan.- 2009.- 26 iyun.- S. 6.