Mətbuatın İnkişafına Dövlət Dəstəyi Fondu ilkin sənədləri hazırlayaraq fəaliyyətə başladı

Vətəndaş cəmiyyəti quruculuğunu özünün inkişaf modeli kimi qəbul edən Azərbaycan 1993-cü ildən insan hüquqları, söz və mətbuat azadlığının təmin edilməsi ilə bağlı bir sıra beynəlxalq konvensiyalara və sazişlərə qoşulmuşdur. Ölkə Konstitusiyasının 50-ci maddəsi ilə hər kəsin informasiya əldə etmək hüququ təsbit edilir. Demokratik inkişafın qarantı kimi mətbuatda özünütənzimləmə funksiyasını həyata keçirən Mətbuat Şurasının yaradılması mətbuat nümayəndələrinin öz öhdəsinə buraxılmışdır.

Ölkə Prezidenti İlham Əliyevin 2008-ci il 31 iyul tarixli "Azərbaycan Respublikasında kütləvi informasiya vasitələrinə birdəfəlik maliyyə yardımı göstərilməsi haqqında", eləcə də "Azərbaycan Respublikasında kütləvi informasiya vasitələrinin inkişafına dövlət dəstəyi konsepsiyasının təsdiq edilməsi haqqında" sərəncamları bir daha təsdiq etdi ki, Azərbaycanda mətbuata göstərilən dövlət qayğısı davamlı və sistemli səciyyə daşıyır. Qəbul edilmiş konsepsiyaya əsasən, dövlət başçısının 3 aprel 2009-cu il tarixli Sərəncamı ilə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu yaradıldı. Dövlət başçısının müvafiq sərəncamına əsasən isə 22 may 2009-cu il tarixdə fondun icraçı direktoru və 9 nəfərdən ibarət Müşahidə Şurası təyin edilmişdir. Məqsəd dövlət orqanları ilə KİV arasında səmərəli əməkdaşlıq münasibətlərinin inkişaf etdirilməsi, KİV-in iqtisadi müstəqilliyinin və peşəkarlığının artırılmasına və vətəndaş cəmiyyəti quruculuğunda KİV-in rolunun gücləndirilməsinə nail olmaqdır.

Ötən gün fond müsabiqə layihələrini elan etdi. Bu münasibətlə jurnalistlər üçün keçirilən mətbuat konfransında Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli bildirdi ki, sərəncam veriləndən sonra fondun fəaliyyətə başlaması üçün bir sıra texniki və digər məsələlər həll olunmuş, fondun fəaliyyəti üçün lazım olan sənədlər qəbul edilmişdir: "Həmin sənədlər Müşahidə Şurasının iclasında müzakirə olunub. Bu il fondun fəaliyyəti üçün 1 milyon 300 min manat vəsait ayrılıb. Vəsaitin 200 min manatı fondun saxlanılmasına və digər xərclərə, qalan 1 milyon 100 mini isə müsabiqə layihələrinin maliyyələşdirilməsinə sərf olunacaq. Düzdür, konsepsiyada digər sahələr, məsələn, subvensiya və subsidiyaların, uzunmüddətli kreditlərin verilməsi də nəzərdə tutulub. Lakin bu il maliyyə vəsaiti az ayrıldığından həmin məbləğin yalnız müsabiqə layihələrinə sərf olunması nəzərdə tutulub. İlk növbədə ən zəruri sənədləri hazırlamışıq. Artıq layihələrin istiqamətləri və mövzular müəyyənləşdirilib. Bu il üçün 11 istiqamət nəzərdə tutulub və hər istiqamətdə 2-3 mövzu var. Layihələrin hər biri maksimum 20 min manat dəyərində qiymətləndirilmişdir".

Fondun rəhbəri onu da qeyd etdi ki, layihələrin necə və hansı formada hazırlanması üçün Mətbuat Şurasında iyulun 1-dən 7-dək bir həftəlik kurslar keçilməsi nəzərdə tutulub: "Ora cəlb olunan mütəxəssislər müsabiqədə iştirak etmək istəyən KİV nümayəndələrinə layihələrin hazırlanması barədə müvafiq təlimlər keçəcək. Layihələr iyulun 1-dən 30-na qədər hər gün qəbul olunacaq. Qəbul edilən sənədlər avqust ayında kodlaşdırılmış formada ekspertlərə təqdim olunacaq və həmin sənədi üç ekspert qiymətləndirəcək. Burada layihənin kimə və hansı mətbuat orqanına aid olduğu tam məxfi saxlanacaq. Məqsəd odur ki, proses tam obyektiv və şəffaf keçirilsin. Sentyabrın əvvəllərində ilk qaliblər müəyyən olunacaq".

Konfransın sonunda jurnalistlərin sualları da cavablandırıldı.

R.RZALI

Azərbaycan.- 2009.- 26 iyun.- S. 10.