SETA Vəqfi İstanbulda Türkiyə-Azərbaycan əlaqələrinə dair müzakirələr keçirir

İstanbuda Türkiyənin Siyasət, İqtisadiyyat və Cəmiyyət Araşdırmaları Vəqfinin (SETA) təşkilatçılığı ilə Türkiyə-Azərbaycan əlaqələrinə dair konfrans keçirilir.

Milli Məclisin İnsan hüquqları komitəsinin sədri Rəbiyyət Aslanova, SETA vəqfinin baş əlaqələndiricisi Taha Özhan və Türkiyə Nazirlər Kabinetinin baş məsləhətçisi Savaş Barkçın açılış nitqlərində bildirmişlər ki, tədbirin məqsədi Cənubi Qafqazda baş verən son proseslər fonunda Türkiyə ilə Azərbaycan arasında əməkdaşlığın perspektivlərini müzakirə etməkdir.

Savaş Barkçın demişdir ki, "bir millət, iki dövlət" olan Türkiyə və Azərbaycanın birliyi əbədidir. Təsadüfi deyildir ki, türk iş adamlarının Azərbaycana qoyduqları sərmayənin məbləği 6 milyard dollara çatmışdır. Türkiyədən Azərbaycana ildə 12 min yük maşını müxtəlif mallar daşıyır. İki ölkənin birlikdə həyata keçirdiyi nəhəng enerji və kommunikasiya layihələri bölgə və dünya üçün çox önəmlidir.

Rəbiyyət Aslanova da Türkiyə-Azərbaycan əlaqələrinin böyük siyasi gələcəyi olduğunu bildirmiş, bu qardaşlıq əlaqələrinin daha da güclənməsində ziyalıların üzərinə böyük vəzifə düşdüyünü qeyd etmişdir. Bu cür yaxın əlaqələrin 200 milyonluq türk dünyası ilə qurulmasının da zəruri olduğunu vurğulayan komitə sədri, digər türk dövlətləri ilə də belə müzakirələrin keçirilməsinin faydalı olacağını demişdir.

Azərbaycan nümayəndələri - Prezident yanında Strateji Araşdırmalar Mərkəzinin rəhbəri Elxan Nuriyev, AMEA-nın İqtisad İnstitutunun direktoru İsa Əliyev, siyasi icmalçı Vəfa Quluzadə, Azərbaycan Dövlət İqtisad Universitetinin müəllimi Zahid Məmmədov müzakirələrdə iştirak edirlər.

Oqtay BAYRAMOV,

AzərTAc-ın xüsusi müxbiri

Ankara

Azərbaycan.- 2009.- 28 iyun.- S. 6.