Azərbaycan Respublikası və İordaniya Haşimilər Krallığı arasında ticarət, iqtisadi və texniki əməkdaşlıq üzrə hökumətlərarası komissiyasının birinci iclası keçirilmişdir

İqtisadi İnkişaf Nazirliyinin mətbuat xidmətindən bildirmişlər ki, fevralın 25-26-da İordaniyanın paytaxtı Əmman şəhərində Azərbaycan Respublikası və İordaniya Haşimilər Krallığı arasında ticarət, iqtisadi və texniki əməkdaşlıq üzrə Hökumətlərarası Komissiyanın birinci iclası keçirilmişdir.

Azərbaycan tərəfdən komissiyanın həmsədri, iqtisadi inkişaf naziri Şahin Mustafayevin rəhbərlik etdiyi nümayəndə heyətinə Xarici İşlər, Səhiyyə, Rabitə və İnformasiya Texnologiyaları nazirliklərinin, Milli Bankın, Dövlət Mülki Aviasiya Administrasiyasının və ölkəmizin İordaniyadakı səfirliyinin əməkdaşları daxil idi.

İordaniya tərəfdən komissiyanın həmsədri, sənaye və ticarət naziri Əmir Hədidinin rəhbərlik etdiyi nümayəndə heyətində bu ölkənin müvafiq dövlət qurumlarının nümayəndələri təmsil olunurdu.

Tədbirdə iqtisadi inkişaf naziri Şahin Mustafayev hökumətlərarası komissiyanın iclasının keçirilməsini Azərbaycan Prezidenti İlham Əliyev və İordaniya Kralı II Abdullahın ölkələrimiz arasında əməkdaşlığın daha da genişləndirilməsinə göstərdikləri diqqətin təzahürü olduğunu vurğulamışdır. Bildirilmişdir ki, 2006-cı ilin avqustunda və 2008-ci ilin mayında İordaniya Kralının Azərbaycana, 2007-ci ilin iyulunda Azərbaycan Prezidentinin İordaniyaya rəsmi səfərləri ölkələrimiz arasında yüksək səviyyəli siyasi münasibətlərin formalaşmasına səbəb olmuş, iqtisadi əməkdaşlıqda yeni mərhələnin başlanğıcını qoymuşdur. Şahin Mustafayev iqtisadi əlaqələri siyasi münasibətlər səviyyəsinə yüksəltməyin, bununla bağlı ölkələrimizin mövcud potensialını reallaşdırmağın başlıca vəzifə olduğunu qeyd etmişdir. Müasir Azərbaycan dövlətinin banisi, ümummilli lider Heydər Əliyevin müəyyənləşdirdiyi sosial-iqtisadi inkişaf strategiyasının Prezident İlham Əliyev tərəfindən uğurla davam etdirilməsi nəticəsində ölkəmizdə qazanılmış iqtisadi uğurlar barədə İordaniya tərəfinə məlumat verilmişdir.

İordaniyanın sənaye və ticarət naziri Əmir Hədidi Azərbaycan və İordaniya arasında iqtisadi əməkdaşlığın daha da inkişafı üçün səylərin birləşdirilməsinin məqsədəuyğunluğunu vurğulamış, İordaniyanın ölkəmizlə iqtisadi əlaqələrin genişlənməsində maraqlı olduğunu qeyd etmişdir.

İclasda Azərbaycan və İordaniya arasında ticarət-iqtisadi, sənaye və energetika, rabitə və informasiya texnologiyaları, kənd təsərrüfatı, gömrük işi, hava və dəniz nəqliyyatı, mədəniyyət və turizm, təhsil, səhiyyə və digər sahələrdə əməkdaşlığın istiqamətləri müzakirə olunmuş, konkret məsələlərlə bağlı razılaşmalar əldə edilmişdir.

İclasın yekunlarına dair protokol imzalanmışdır. Sənədi komissiyanın həmsədrləri - Şahin Mustafayev və Əmir Hədidi imzalamışlar.

Səfər çərçivəsində Şahin Mustafayev İordaniyanın Baş naziri Nadir Dahabi ilə görüşmüşdür. Tərəflər ölkələrimiz arasında iqtisadi əməkdaşlığın inkişaf perspektivlərini müzakirə etmişlər.

Səfər çərçivəsində iş adamlarının iştirakı ilə İordaniya-Azərbaycan biznes forumu keçirilmişdir. Azərbaycanın informasiya texnologiyaları, kimya, kənd təsərrüfatı məhsullarının istehsalı və emalı, inşaat, səhiyyə, ticarət və digər sahələrdə fəaliyyət göstərən 10-dan çox şirkətinin təmsil olunduğu tədbirdə hər iki ölkənin investisiya mühiti və iqtisadi imkanları barədə məlumatlar verilmişdir. Forum çərçivəsində iş adamları arasında ikitərəfli işgüzar görüşlər, azərbaycanlı iş adamlarının İordaniyanın sənaye və ticarət müəssisələrinə səfərləri təşkil edilmişdir.

Bu cür tədbirlərin müntəzəm olaraq hər iki ölkədə keçirilməsi qərara alınmışdır.

AzərTAc

Azərbaycan.-2009.-1 mart.-S.2.