Bölgələrin hərtərəfli inkişafı Azərbaycanın tərəqqisinin təməlini təşkil edir

Azərbaycan Prezidenti İlham Əliyev regionlara səfəri çərçivəsində martın 3-də Mingəçevir şəhərinə gəlmişdir.

Azərbaycanın sürətli sosial-iqtisadi inkişafı Mingəçevir şəhərinin timsalında da özünü göstərir. Şəhər getdikcə abadlaşır, sənaye potensialı artır. 2003-cü ilə nisbətən 2008-ci ildə ümumi məhsul istehsalının həcmi 1,7 dəfə artaraq 275 milyon manata, o cümlədən sənaye məhsulunun həcmi 1,3 dəfə artaraq 192 milyon manata çatmışdır. Əsas kapitala yönəldilən investisiyalar 29 dəfə artaraq 41,3 milyon manat, tikinti-quraşdırma işlərinin həcmi 26 dəfə artaraq 34,2 milyon manat təşkil etmişdir.

Şəhərdə ulu öndərin adını daşıyan muzey tikilmiş, parklar salınmış, yeni istehsal müəssisələri fəaliyyətə başlamışdır. 2003-2008-ci illərdə Mingəçevir şəhərində 191 müəssisə yaradılmış və 6421 daimi olmaqla, 7215 yeni iş yeri açılmışdır.

Təhsil və səhiyyənin inkişafı diqqət mərkəzində olmuş, yeni məktəb və xəstəxana binaları tikilmişdir. Dövlət başçısının "Əhalinin ekoloji cəhətdən təmiz su ilə təminatının yaxşılaşdırılması ilə əlaqədar bəzi tədbirlər haqqında" Sərəncamının icrasına uyğun olaraq, uzun müddət su problemi olan yaşayış massivlərinə yeni su kəməri çəkilmişdir.

Dövlətimizin başçısı və xanımı Mehriban Əliyeva əvvəlcə şəhərin Heydər Əliyev meydanında ümummilli liderin abidəsini ziyarət edərək gül dəstələri qoydular.

Energetiklər şəhərinin mərkəzi meydanında geniş abadlıq-quruculuq işləri aparılmış, sakinlərin istirahəti üçün lazımi şərait yaradılmışdır. Burada musiqili fəvvarə quraşdırılmış, yaşıllıq zolağı salınmış, 10 minə qədər müxtəlif növ ağac və gül kolları əkilmiş, gediş-gəlişi asanlaşdırmaq üçün yerüstü piyada keçidi tikilmişdir.

AzərTAc

Azərbaycan.-2009.- 4 mart.-S.1.