PanARMENİAN.net agentliyinin "xarab olmuş telefonu"

Martın 2-də Ermənistanın PanARMENİAN.net informasiya agentliyi öz saytında Almaniyadakı Azərbaycan icmasının Ermənistanın AFR-dəki səfirliyi qarşısında Xocalı soyqırımının 17-ci ildönümü ilə əlaqədar etiraz aksiyası keçirməsi barədə guya Azərbaycan KİV-lərinin yaydığı məlumatları təkzib edən xəbər yerləşdirmişdir. Agentlik Ermənistan səfirliyinin məsul işçisi Karen Mkrtıçyanın dediklərini misal gətirir. Almaniyanın erməni icmasının AFR-in erməni əsilli bəzi vətəndaşlarının azərbaycanlıların etiraz aksiyası zamanı təxribat törətməsi faktını təkzib edən Mkrtıçyan erməni auditoriyasını "sakitləşdirərək" bildirmişdir ki, azərbaycanlılar hansısa aksiya keçirsələr də, alman KİV-ləri bu barədə heç bir məlumat verməmişdir.

Görünür, heç yerdə yayılmayan məlumatı vəcdlə təkzib edən PanARMENİAN.net agentliyi "xarab olmuş telefon" xəstəliyindən əziyyət çəkir. Almaniyanın Azərbaycan icması Berlinin gediş-gəlişdən uzaq ucqarında yerləşən Ermənistan səfirliyi qarşısında heç bir aksiya keçirməyi planlaşdırmamışdı. Azərbaycan KİV-lərinin heç biri erməni diplomatik missiyası qarşısında nəzərdə tutulan və ya keçirilən piket barədə xəbər yaymamışdır. PanARMENİAN.net agentliyinin tələm-tələsik təkzib etdiyi bu yalan informasiyanı haradan götürdüyü məlum deyildir.

Ermənilərin Xocalıda törətdiyi cinayətlərlə əlaqədar başqa kütləvi tədbirlərin planlaşdırılması barədə isə əvvəlcədən KİV-lərdə məlumat verilmiş və bu tədbirlər uğurla keçirilmiş, mətbuatda geniş işıqlandırılmışdır. Məsələn, fevralın 26-da saat 15:00-da Almaniya paytaxtının mərkəzindəki Kayzer Vilhelm kirxası qarşısında, gediş-gəliş çox olan Kurfürstendamm prospektində Xocalı soyqırımının ildönümü ilə əlaqədar ikisaatlıq mitinq keçirilmişdir. Tədbiri Almaniya Azərbaycanlılarını Əlaqələndirmə Mərkəzi, Almaniya-Azərbaycanın həmrəyliyi cəmiyyəti və "Almaniyada Azərbaycan evi" təşkil etmişdi. Erməni silahlı dəstələrinin insanlığa qarşı törətdiyi cinayət və Ermənistanın 1949-cu il Cenevrə Konvensiyasının müddəalarını pozduğunu alman ictimaiyyətinin diqqətinə çatdırmaq məqsədi ilə şəhər sakinlərinə sənədli sübutlar - amansızcasına qətlə yetirilmiş uşaqların, qadınların və qocaların fotoşəkilləri təqdim olunmuşdur. Masalarda müxtəlif dillərdə çap olunmuş və "miatsum" ideyasının təhrikediciləri və icraçılarının cinayətlərindən bəhs edən çoxsaylı mətbu materialları düzülmüşdü.

Mitinqdə Almaniya Azərbaycanlılarını Əlaqələndirmə Mərkəzinin icraçı direktoru Samirə Patser-İsmayılova, Almaniyada Azərbaycan evinin rəhbəri Tofiq Qarayev çıxış edərək, ermənilərin zaman-zaman Azərbaycanda törətdiyi vəhşiliklərdən danışmışlar.

Berlin sakinləri piketçilər qarşısında dayanaraq plakatları oxuyur, qətlə yetirilmiş xocalılı qadınların, qocaların və uşaqların fotoşəkillərinə baxır, kitabçaları və mətbu materialları götürür, Ermənistan-Azərbaycan, Dağlıq Qarabağ münaqişəsinin mahiyyəti, Avropada "Azərbaycan Srebrenisası" kimi tanınan Xocalı soyqırımı ilə əlaqədar suallar verirdilər. Xeyli kənarda dayanıb aksiya iştirakçılarına etiraz etməyə cəhd göstərən üç erməni də baş verənlərə maraq göstərirdi, lakin onlar Krılovun təmsilinin qəhrəmanı olan qızcığazı xatırladırdılar.

Elə həmin günün axşamı Almaniya Azərbaycanlılarını Əlaqələndirmə Mərkəzində Xocalı faciəsinin ildönümünə həsr edilmiş daha bir tədbir keçirilmişdir. Əvvəlcə "Xocalı soyqırımı" sənədli filmi göstərilmişdir. Azərbaycanın AFR-dəkı səfiri Pərviz Şahbazov, Bundestaqın deputatı Eduard Lintner, Azərbaycan Respublikasının Diaspor ilə İş üzrə Dövlət Komitəsi sədrinin birinci müavini Valeh Hacıyev tədbirdə çıxış etmişlər. Tədbirin aparıcısı S.Patser-İsmayılova İslam Konfransı Təşkilatının Dialoq və Əməkdaşlıq Naminə Beynəlxalq Forumunun mədəniyyətlərarası dialoq üzrə baş əlaqələndiricisi Leyla Əliyevanın təşəbbüsü ilə həyata keçirilən "Xocalıya ədalət" informasiya kampaniyasının yeni saytını təqdim etmişdir.

Nəhayət, Almaniya KİV-lərinin Xocalı ilə bağlı tədbirlərə "etinasız yanaşması" barədə. Martın 2-də Diaspor ilə İş üzrə Dövlət Komitəsi sədrinin birinci müavini Valeh Hacıyev və Azərbaycan-Almaniya Forumunun prezidenti Otto Hauzer Almaniyanın "Kanal Avropa" telekanalının birbaşa efirində çıxış etmişlər. V.Hacıyev çıxışında Almaniya auditoriyasına erməni silahlı birləşmələrinin Xocalının dinc əhalisinə qarşı törətdiyi qanlı cinayətlərdən danışmışdır.

Həmin gün V.Hacıyev Almaniyanın populyar "FOX" telekanalı ilə yarım saatlıq çıxışında Ermənistanın Azərbaycana qarşı təcavüzündən və münaqişənin yalnız təcavüzkar dövlətin Azərbaycanın işğal olunmuş ərazilərini dərhal azad etməsi yolu ilə həllinin vacibliyindən danışmışdır.

Almaniyadakı Azərbaycan diasporunun ermənilərin Xocalıdakı cinayətlərinin ildönümü ilə əlaqədar təşkil etdiyi tədbirlər bunlardır. Tədbirlər ilbəil daha geniş miqyas alacaqdır. Deməli, ermənilərin də özlərinin yaydıqları yalanları təkzib etmək üçün "imkanları geniş" olacaqdır.

Vüqar Seyidov,

AzərTAc-ın xüsusi müxbiri

Berlin

Azərbaycan.-2009.-5 mart.-S.6.