Ölkədə 9200-ə yaxın idman qurğusu var

Sağlam nəslin yetişməsində idman və bədən tərbiyəsinin rolu əvəzsizdir. Ölkə iqtisadiyyatında baş verən sürətli inkişaf prosesi bütün sosial sferaları, o cümlədən idman və bədən tərbiyəsini də əhatə edir və nəticədə bu sahədə qazanılan nailiyyətlər ilbəil artır.

Dövlət Statistika Komitəsinin məlumatına görə, son beş ildə müxtəlif beynəlxalq yarışlarda idmançılarımız tərəfindən ümumilikdə 1693, o cümlədən, 569 qızıl, 449 gümüş, 675 bürünc medal qazanılmışdır. Ən böyük uğurlar ötən il Çində keçirilmiş Yay Olimpiadasında əldə edilmişdir. Pekin Yay Olimpiya Oyunlarında idmançılarımız 7 medal, Paralimpiya Oyunlarında isə 10 medala nail olmuşlar.

İdmanda əldə olunan bütün nailiyyətlər məhz dövlətin bu sahəyə olan dəstəyi nəticəsində baş verir. Qeyd etmək kifayətdir ki, təkcə 2009-cu ildə bədən tərbiyəsi və idmanın inkişafına dövlət büdcəsindən ayrılmış vəsaitin məbləği 12,8 milyon manata çatdırılmışdır.

İdman və bədən tərbiyəsinin maddi-texniki bazası ildən-ilə möhkəmlənir. Ölkənin müxtəlif bölgələrində çoxsaylı idman qurğuları tikilib istifadəyə verilir, mövcud idman qurğuları, stadionlar və digər idman meydançaları təmir edilir, günün tələblərinə uyğun yenidən qurulur. Cari ilin əvvəlinə ölkədə idman qurğularının sayı 9200-ə yaxın, idmanla məşğul olanların sayı isə 520 min nəfərdən çox olmuşdur. İdman seksiyalarında məşğul olanların sayı da müntəzəm olaraq artır. Əhali arasında daha çox futbol, voleybol, şahmat, yüngül atletika və basketbol kimi idman növlərinə maraq göstərilir.

Bu il ölkədə bir sıra beynəlxalq idman yarışlarının, o cümlədən bədii gimnastika üzrə Avropa çempionatının, boks üzrə "Böyük İpək Yolu", kikboksinq üzrə "Qızıl əlcək" turnirlərinin, zorxana və taekvando idman növləri üzrə dünya kuboklarının keçirilməsi nəzərdə tutulmuşdur.

Azərbaycan.-2009.-5 mart.-S.7.