Ombudsman parlamentə hesabat verdi

Martın 6-da Milli Məclisin növbəti iclası keçirildi. İclası açan Milli Məclisin Sədri Oqtay Əsədov qadınları qarşıdan gələn 8 Mart Beynəlxalq Qadınlar Günü münasibətilə təbrik etdi. Cari məsələlərin müzakirəsi zamanı deputatlar Məmmədəmin Rəsulzadənin vəfatının ildönümü münasibətilə onun xatirəsini bir dəqiqəlik sükutla yad etdilər.

Sonra Milli Məclisin Sədri Oqtay Əsədov cari məsələlərin müzakirəsi zamanı söylənilən fikirlərə münasibətini bildirdi və gündəlikdəki sənədlərin müzakirəsinə başlandı. Deputatlar əvvəlcə Azərbaycan-İrlandiya parlamentlərarası işçi qrupunun yaradılmasına, həmçinin Azərbaycan-İsrail parlamentlərarası işçi qrupunun tərkibinə dəyişiklik edilməsinə razılıq verdilər.

Sonra Azərbaycan Respublikasının İnsan hüquqları üzrə müvəkkilinin(ombudsmanın) məruzəsi dinlənildi. Ombudsman Elmira Süleymanova bildirdi ki, artıq yeddi illik fəaliyyətinə yekun vurmaqda olan Müvəkkil ötən dövrdə insan hüquqlarının məhkəmədənkənar müdafiəsi və pozulmuş hüquqların bərpası məqsədi ilə bir çox əhəmiyyətli tədbirlər həyata keçirmişdir.

Digər dövlət orqanlarının səlahiyyətlərini məhdudlaşdırmadan və onları əvəz etmədən, mövcud hüquq müdafiə vasitələrini tamamlayan Müvəkkil bu müddət ərzində öz fəaliyyətini müstəqillik, aşkarlıq, şəffaflıq, qanunçuluq, ədalət və qərəzsizlik prinsipləri əsasında qurmuş, səlahiyyətləri daxilində tədbirlər görməklə bir çox hallarda pozulmuş hüquqların bərpasına nail olmuşdur.

Bütün fəaliyyəti dövründə istər dövlət qurumları, istərsə də vətəndaş cəmiyyəti təsisatları, o cümlədən qeyri-hökumət təşkilatları, habelə kütləvi informasiya vasitələri, həmçinin beynəlxalq qurumlar və xaricdəki həmkarları ilə konstruktiv əməkdaşlıq şəraitində fəaliyyət göstərmiş Müvəkkil həm paytaxtda, həm də regionlarda əhali ilə müntəzəm görüşlər və qəbullar, ictimai dinləmələr keçirmiş, öz məsələhətləri, məsələlərə bilavasitə müdaxiləsi və aydınlıq gətirməsi, habelə yerli icra strukturlarını pozulmuş hüquqların bərpası işinə cəlb etməklə bu hüquqların müdafiəsinə, bununla da dövlətçiliyin möhkəmlənməsinə xidmət etmişdir.

Elmira Süleymanova bildirdi ki, Müvəkkilin fəaliyyəti dövründə onun ünvanına ümumilikdə 42.260, o cümlədən 2008-ci ildə 8.600 müraciət daxil olmuşdur.

Bu müraciətlərin ümumilikdə 93 faizi, o cümlədən 2008-ci ildə 86,6 faizi şikayətlərdən ibarət olmuşdur.

Sonra Elmira Süleymanova vətəndaş və siyasi hüquqların müdafiəsi, iqtisadi, sosial hüquqların müdafiəsi, əhalinin müxtəlif qruplarının hüquqlarının müdafiəsi, insan hüquqları sahəsində maarifləndirmə, elmi-analitik iş, ictiamiyyətlə, kütləvi informasiya vasitələri ilə əməkdaşlıq, beynəlxalq əlaqələr və digər sahələrdə Müvəkkilin gördüyü işlər barədə ətraflı məlumat verdi.

Məruzə dinlənildikdən sonra deputatlar məruzə ətrafında çıxış edərək müvəkkilin hesabatı ilə bağlı rəy və təkliflərini bildirdilər. Sonra məruzə səsə qoyularaq nəzərə alındı.

Axşam iclasında deputatlar “Kütləvi informasiya vasitələri haqqında” Qanuna təklif olunan əlavə və dəyişikliyi müzakirə etdilər. Sənəddə Qanunun “Kütləvi informasiya vasitəsinin istehsalının və yayımının dayandırılması və ya ona xitam verilməsi” adlanan 19-cu maddəsinə əlavələr edilməsi nəzərdə tutulur, mətbu nəşrin redaktoru vəzifəsini daşıyacaq şəxsin ali təhsilli olması tələb edilir.

Deputatların fikirləri dinlənildikdən sonra qanun layihəsi səsə qoyularaq qəbul edildi.

Bununla da Milli Məclisin iclası başa çatdı.

Azərbaycan.-2009.-7 mart.-S.2.