Yeni amnistiya layihəsi parlamentin müzakirəsinə çıxarılır

Martın 11-də Milli Məclisin Hüquq siyasəti və dövlət quruculuğu məsələləri daimi komissiyasının iclası keçirildi. İclasın gündəliyinə "Novruz bayramı münasibətilə amnistiya elan edilməsi haqqında" qərar layihəsinin müzakirəsi çıxarılmışdı. Komissiya sədri Əli Hüseynov bildirdi ki, Milli Məclisin deputatı, Heydər Əliyev Fondunun prezidenti Mehriban xanım Əliyeva Novruz bayramı münasibətilə amnistiya elan edilməsi təklifi ilə parlamentə müraciət etmişdir.

Komissiya sədri Ə.Hüseynovun sözlərinə görə, mayın 10-da 5-ci ildönümünü qeyd edəcək Fond ümummilli lider Heydər Əliyevin sosial-iqtisadi tərəqqiyə, mədəni inkişafa, dünya birliyinə inteqrasiyaya yönəlmiş siyasətinin öyrənilməsinə və bu ideyaların həyata keçirilməsinə hər zaman dəstək verir və bu istiqamətdə məqsədyönlü iş apararaq cəmiyyətin həyatında önəmli yer tutmağa çalışır. Qayğıya və yardıma ehtiyacı olan insanlara kömək göstərmək ümummilli liderin insanpərvərlik və humanizm ideallarının daşıyıcısı olan Heydər Əliyev Fondunun fəaliyyətində əsas qayələrdən biridir. Heydər Əliyev Fondu məhkum edilmiş şəxslərin və onların ailə üzvlərinin çoxsaylı müraciətlərini nəzərə alaraq, həmin insanlara münasibətdə də mərhəmət göstərilməsi zəruriliyini önə çəkərək belə bir layihəni parlamentin müzakirəsinə təqdim edib. Sənəddə ümummilli liderin humanist siyasətinə sədaqət nümayiş etdirilərək Azərbaycan xalqının firavanlıq, əmin-amanlıq və mərhəmət rəmzi olan milli bayramı - Novruz bayramı münasibətilə amnistiyanın elan edilməsi təşəbbüsü irəli sürülür.

Komissiya sədri Əli Hüseynov qərar layihəsinin mükəmməl hazırlandığını bildirdi və deputatları müzakirəyə dəvət etdi.

Qərar layihəsi barədə ətraflı danışan Milli Məclis Aparatının İnzibati və hərbi qanunvericilik şöbəsinin müdiri Nizami Səfərov bildirdi ki, amnistiya aktının layihəsində böyük ictimai təhlükə törətməyən və bir sıra az ağır cinayətlərə görə məhkum edilmiş qadınların, cinayət törədərkən 18 yaşına çatmayanların, birinci və ya ikinci qrup əlillərin, 60 yaşına çatmış kişilərin, öhdəsində yetkinlik yaşına çatmayan, yaxud birinci və ya ikinci qrup əlil övladı olanların və bəzi digər kateqoriyadan olan şəxslərin azadlıqdan məhrumetmə cəzasından azad ediləcəyi nəzərdə tutulur. N.Səfərov əlavə etdi ki, qərar layihəsində həmçinin azadlıqdan məhrum edilmiş və cəzalarının bitməsinə bir il qalmış qadınlara və kişilərə, islah işləri, ictimai işlər cəzasına məhkum edilmiş bütün şəxslərə, habelə cərimə cəzasına məhkum edilmiş, cəzasının çəkilməsi təxirə salınmış, şərti məhkum edilmiş və digər qruplara daxil olan bir sıra məhkumlara amnistiya tətbiq etməklə, onların cəzadan azad olunmaları təklif edilir.

Aparılan təhlillərə əsasən təqribən 9 min şəxsə amnistiya aktının şamil olunacağı ehtimal edilir. Bunlardan təqribən 1700 məhkumun azadlıqdan məhrumetmə yerlərindən azad edilməsi gözlənilir. N.Səfərov qeyd etdi ki, bu dəfə amnistiya aktının təsiri altına düşən insanların sayı əvvəlki amnistiya aktının şamil olunduğu şəxslərin sayından çoxdur.

Deputat Azay Quliyev Milli Məclisin deputatı, Heydər Əliyev Fondunun prezidenti Mehriban xanım Əliyevanın humanizm və mərhəmət prinsiplərini rəhbər tutaraq, Novruz bayramı münasibətilə amnistiya elan edilməsi ilə bağlı təşəbbüsünü yüksək dəyərləndirdi. Təqribən 9 min şəxsin amnistiya aktının təsiri altına düşməsi böyük hadisədir. Qərar layihəsində böyük ictimai təhlükə törətməyən və az ağır bir sıra cinayətlərə görə məhkum edilmiş qadınlar, eləcə də birinci və ikinci qrup əlillərin azadlıqdan məhrumetmə yerlərindən azad ediləcəkləri nəzərdə tutulub. Bayram ərəfəsində bu humanizm aktının həyata keçirilməsi həmin şəxslərin ailə üzvləri və qohumları tərəfindən böyük sevinclə qarşılanacaqdır.

Milli Məclisin deputatı Qüdrət Həsənquliyev Novruz bayramı ərəfəsində belə bir təşəbbüsün irəli sürülməsini insanpərvərlik ənənələrinin təcəssümü kimi dəyərləndirdi və qərar layihəsini təqdir etdi. Amnistiya tətbiq edilən şəxslərin əhatə dairəsinin geniş olduğunu deyən deputat 1700 məhkumun azadlıqdan məhrumetmə yerlərindən azad edilməsini onların yaxınlarının sevincinə səbəb olacağını bildirdi. Qərar layihəsində amnistiya tətbiq edilən şəxslərin dairəsinə Azərbaycan Respublikasının suverenliyinin və ərazi bütövlüyünün qorunması uğrunda döyüşlərdə iştirak etmiş, Azərbaycan Respublikasının, habelə keçmiş SSRİ-nin Silahlı Qüvvələri tərkibində beynəlmiləl borcunu yerinə yetirmiş şəxslər, həmçinin bu döyüşlərdə həlak olmuş və ya xəbərsiz itkin düşmüş şəxslərin yaxın qohumları, 1990-cı ilin 20 Yanvar faciəsində əlil olmuş şəxslər və şəhid olmuş şəxslərin yaxın qohumları da daxildir. Deputat sənədin mükəmməl hazırlandığını diqqətə çatdırdı və parlamentin plenar iclasına çıxarılmasını vacib saydı.

Milli Məclisin deputatı Rafael Cəbrayılov bildirdi ki, humanizm Azərbaycan Respublikası qanunlarının əsas prinsiplərindən biridir və bu, mərhəmət hissini ifadə edir. Milli Məclisin deputatı, Heydər Əliyev Fondunun prezidenti Mehriban xanım Əliyevanın humanizm və mərhəmət prinsiplərini rəhbər tutaraq növbəti dəfə parlamentə belə bir qərar layihəsi təqdim etməsi ictimaiyyət tərəfindən də böyük rəğbətlə qarşılanır. Bu amnistiya aktı birinci amnistiya aktından daha geniş dairəni əhatə edir və 9 min şəxsin onun təsiri altına düşməsi ehtimal edilir. Amnistiya aktı dövlətin cəza siyasətinə uyğun olmaqla yanaşı, Cinayət Məcəlləsinin 41-ci maddəsinə də uyğundur.

Deputat R.Cəbrayılov qərar layihəsinin 5.8-ci maddəsinə toxundu. 1991-ci il oktyabrın 18-də Müstəqillik aktı qəbul edildikdən sonra barəsində amnistiya və ya əfvetmə tətbiq olunan şəxslər yenidən cinayət törətdiyi təqdirdə amnistiyaya düşmürlər. Bu, əvvəlki amnistiya aktlarında da var və belə şəxslərin amnistiyaya göz dikərək cəzalarının yüngülləşməsinin və ya cəzadan xilas olmasının qarşısını alır.

Deputatlardan Nizami İsgəndərov, Ülvi Quliyev, Madər Musayev "Novruz bayramı münasibətilə amnistiya elan edilməsi haqqında" qərar layihəsini təqdir etdilər, parlamentin plenar iclasına çıxarılmasını təklif etdilər. Müzakirələrin sonunda deputatlar qərar layihəsinin Milli Məclisin iclasının müzakirəsinə çıxarılmasını tövsiyə etdilər.

Azərbaycan.-2009.-12 mart.-S.4.