Həqiqətin zəfər çalması üçün bütün qüvvə və vasitələr səfərbər olunmalıdır

Erməni təbliğatı daim bizi hədəfdə saxlayır. Biz hücuma keçməliyik, onların yalan, iftira üzərində qurulmuş təbliğatını darmadağın etməliyik və bütün səyləri birləşdirib, həqiqəti bərpa etməliyik.

İlham Əliyev,

Azərbaycan Respublikasının Prezidenti

1991-ci ildən dövlət müstəqilliyini bərpa edən Azərbaycan hüquqi və demokratik dövlət quruculuğu yolunda çoxsaylı çətinliklərlə üzləşmişdir. Ermənilərin əzəli torpaqlarımıza qarşı ərazi iddialarından alovlanan münaqişə Azərbaycan dövlətçiliyi üçün əsl sınağa çevrilmişdi. Ulu öndər Heydər Əliyev 1993-cü ildə qurtuluş missiyası ilə ikinci dəfə hakimiyyətə gələrək mahir siyasi-diplomatik fəaliyyəti ilə Azərbaycanı parçalanmaq, bir dövlət olaraq dünya xəritəsindən silinmək təhlükəsindən xilas etmiş, ölkədə yaratdığı dönməz ictimai-siyasi sabitlik nəticəsində respublikanın dünya birliyinə inteqrasiya xəttini, regional və beynəlxalq əhəmiyyətli transmilli layihələrdə fəal iştirakını təmin etmişdir. Azərbaycan tam mənada müstəqillik yoluna məhz dahi rəhbər Heydər Əliyevin sayəsində qədəm qoymuş, müvafiq institutların yaradılmasına, beynəlxalq norma və standartlara uyğun formalaşmasına, təkmilləşdirilməsinə və möhkəmləndirilməsinə başlanılmışdır. Xalqımızın ümummilli lideri Heydər Əliyevin müdrik sözləri bu baxımdan çox ibrətamizdir: "Müstəqilliyin əldə olunması nə qədər çətindirsə, onun saxlanılması, daim əbədi olması bundan da çətindir".

Asiya və Avropanın, Şərq və Qərb sivilizasiyalarının qovşağında yerləşən, Transxəzər enerji layihələrinin həyata keçirildiyi və tarixi İpək Yolunun üzərində tranzit əhəmiyyətinə malik ölkəmiz nəqliyyat-kommunikasiya sahəsində tərəfdaşlıq baxımından mühüm regional lider dövlətə çevrilmişdir. Müharibə şəraitində olmasına baxmayaraq, bu gün Azərbaycan tək MDB məkanında deyil, Şərqi Avropada da ən sabit ölkələrdəndir. Ölkəmizin paytaxtı Bakı şəhəri də ictimai asayişin səviyyəsinə görə ön sıralardadır.

Azərbaycan Respublikası artıq nəinki Cənubi Qafqaz, hətta daha geniş coğrafi və siyasi məkanda nüfuz qazanmışdır. Göstərilənlər Azərbaycanda hərtərəfli, düşünülmüş və uzun müddətə hesablanmış dövlət quruculuğu siyasətinin böyük uğurla həyata keçirildiyini nümayiş etdirir. Məhz bu siyasətin nəticəsidir ki, bu gün Azərbaycan iqtisadiyyatı dünyada gedən böhran proseslərindən etibarlı şəkildə qorunur. Dövlət başçısı İlham Əliyevin dediyi kimi: "Həm siyasi, həm iqtisadi böhran, bütün dünyanı silkələyən bu böhranlar Azərbaycana heç bir təsir göstərmədi, biz ölkəmizi qorumuşuq və bundan sonra da qoruyacağıq".

Böyük karbohidrogen ehtiyatlarına malik olan Azərbaycan Respublikası müəyyən dövlətlərdən enerji asılılığından azad olmağa və alternativ enerji mənbələri axtarmağa səy göstərən Qərb üçün cəzbedici tərəfdaş rolunu oynayır. Lakin bir məqamı qeyd etmək lazımdır ki, ölkəmizin əlverişli coğrafi məkanda yerləşməsi rəqib və düşmən qüvvələrin də, transmilli cinayətkar birləşmələrin də diqqətini çəkir. Bu mənada Milli Təhlükəsizlik Nazirliyinin üzərinə mühüm vəzifələr düşür. Azərbaycan Respublikasının milli təhlükəsizlik naziri Eldar Mahmudov bununla bağlı demişdir: "Son vaxtlar Milli Təhlükəsizlik Nazirliyində bütün istiqamətlər üzrə işlər daha da canlanmış, terror-təxribat fəaliyyətlərinin qarşısının alınması, narkotik vasitələrin qanunsuz dövriyyəsi, qeyri-qanuni miqrasiya, insan alveri, mütəşəkkil cinayətkarlığın digər təzahürlərinə qarşı mübarizədə uğurlu nəticələr əldə edilmişdir. Müvafiq tədbirlərin vaxtında görülməsi xarici xüsusi xidmət orqanlarının kəşfiyyat-pozuculuq və terror-təxribat fəaliyyətinin aşkarlanması, qabaqlanması və ifşa edilməsi istiqamətində səmərəli nəticələrin əldə olunmasına imkan vermişdir".

Son illər ölkədə gedən proseslər göstərir ki, Azərbaycan tam müstəqil siyasət yeritməyə və qarşıya çıxan bütün problemləri həll etməyə qadirdir. Əsas, daha doğrusu isə yeganə problem Ermənistan-Azərbaycan, Dağlıq Qarabağ münaqişəsinin həllidir. Azərbaycan Respublikasının Prezidenti İlham Əliyev çıxışlarının birində söyləmişdir: "Bu gün Azərbaycan, Ermənistan-Azərbaycan, Dağlıq Qarabağ münaqişəsi istisna olmaqla, qarşısında duran bütün problemləri həll etmişdir". Ermənistan-Azərbaycan, Dağlıq Qarabağ münaqişəsinin xeyli müddət həllini tapmamasının başlıca səbəblərindən biri Azərbaycanın məkrli düşmənlə üzbəüz dayanmasıdır. Uzun illərdən bəridir ki, erməni lobbisinin beynəlxalq ictimaiyyətin gözü qarşısında "əzabkeş erməni xalqı", "vəhşi azərbaycanlı", "vəhşi türk" obrazı yaratmaq istiqamətində məqsədyönlü, iftira və böhtan dolu kampaniyasının niyyəti törətmiş olduqları və gələcəkdə törədəcəkləri cinayətlərə bəraət qazandırmaq və özlərini sığortalamaqdan başqa bir şey deyildir. XIX əsrin sonlarından başlayaraq dünyanın müxtəlif ölkələrinə kütləvi surətdə səpələnmiş ermənilər "Böyük Ermənistan" xülyası uğrunda mübarizə məqsədilə xarici dövlətlərin siyasi elitalarına yol tapmış, həmin ölkələrdə elektoratın alınması, vəzifəli şəxslərə yol tapılması, terrorçuluq, diplomatların qətlə yetirilməsi kimi üsullardan istifadə etmişlər.

1988-ci ildən Azərbaycana qarşı başlayan ekspansiya, ermənilərin Dağlıq Qarabağda apardıqları işğalçı müharibə və etnik təmizləmə, əsl soyqırımı cinayətləri bir müddət dünya ictimaiyyətinə lazımi səviyyədə çatdırılmamışdır. Fəlakətin, vandalizmin, soyqırımının miqyası isə ölçüsüz olmuşdur. Azərbaycan Respublikasının ərazisinin 20 faizi işğal olunmuş, 18 mindən çox azərbaycanlı həlak olmuş, 4 mindən çox vətəndaşımız itkin düşmüş, minlərlə əsir-girov götürülmüş, 4 mindən çox sənaye və kənd təsərrüfatı müəssisəsi, 600 məktəb və uşaq bağcası, 250 xəstəxana və tibb müəssisəsi dağıdılmış, azərbaycanlıların doğma yurdu olan yaşadıqları 724 şəhər, kənd və qəsəbə qarət edilmiş, dağıdılmış və yandırılmışdır. On minlərlə qədim mədəniyyət abidəsi, azərbaycanlıların bu yerləri avtoxton əhalisi olduqlarını sübut edən tarixi mənbələr məhv edilmışdir. Bütün bunların nəticəsində təkcə XX əsrdə iki milyondan çox azərbaycanlı bu və ya digər şəkildə şovinist erməni dairələrinin və onların havadarlarının yürütdükləri soyqırımı siyasətinin qurbanı olmuşdur. Onu da demək lazımdır ki, indiki dövrdə Azərbaycanda erməni millətçi zülmündən bu və ya başqa şəkildə zərər çəkməyən ailə yoxdur. Münaqişənin Daqlıq Qarabağla məhdudlaşdığını və Ermənistanla Azərbaycan arasında deyil, Dağlıq Qarabağla Azərbaycan arasında baş verdiyini iddia edən erməni millətçiləri sonuncu 200 min azərbaycanlını Ermənistandakı dədə-baba torpaqlarından didərgin salmışlar. Qərbi Azərbaycan torpaqları hesabına Ermənistan dövləti yaradan və öz müqəddəratlarını artıq bir dəfə təyin etmiş ermənilərin xaricdəki havadarları indi də Azərbaycan ərazisində ikinci erməni dövləti yaratmağa səy göstərirlər. Bununla bağlı dövlət başçısı İlham Əliyev demişdir: "Biz hücum etməliyik, çünki həqiqət bizim tərəfimizdədir... onların yalan, iftira üzərində qurulmuş təbliğatını darmadağın etməliyik və bütün səyləri birləşdirib, həqiqəti bərpa etməliyik. Azərbaycan heç vaxt öz torpağında ikinci erməni dövlətinin yaranmasına icazə verməyəcəkdir. Azərbaycan bütün imkanlarını səfərbər edib, diplomatik, siyasi, iqtisadi, hərbi - bütün imkanlardan istifadə edib, öz doğma torpaqlarını azad edəcəkdir".

Məhz dövlət başçısının qarşımıza qoyduğu bu proqram xarakterli vəzifələri yerinə yetirərək Milli Təhlükəsizlik Nazirliyi digər dövlət qurumları ilə əlaqəli şəkildə Ermənistanın Azərbaycana qarşı uzun illər davam edən informasiya blokadasının yarılmasına, təcavüzkar dövlət kimi tanıdılmasına, erməni terrorunun ifşasına xidmət edən materialların hazırlanmasında fəal iştirak edir. Azərbaycan Respublikasının milli təhlükəsizlik naziri general-leytenant Eldar Mahmudov çıxışlarında dəfələrlə Ermənistan xəttinin, Ermənistan-Azərbaycan, Dağlıq Qarabağ münaqişəsinin həlli istiqamətində ölkə rəhbərliyinin siyasi kursu üçün əlverişli şəraitin yaradılmasının həmişəki kimi bütün fəaliyyət istiqamətlərimiz üzrə prioritet təşkil etdiyini vurğulamışdır. O, demişdir: "Biz gələcəkdə də bütün vasitələrdən istifadə etməklə təcavüzkar Ermənistana qarşı fəaliyyətin səfərbər edilməsinə, əlaqələndirilməsi və gücləndirilməsinə nail olmalıyıq. İndi düşmənə qarşı informasiya mübarizəsinin daha düşünülmüş, planlı, müvafiq dövlət orqanları ilə əlaqəli şəkildə aparılması buna əlavə imkanlar yaradır".

Ermənistandan fərqli olaraq Azərbaycanın təbliğatı qərəzli xarakter daşımır, "vəhşi erməni" obrazının yaradılmasına xidmət etmir. Öz xalqını da yalana söykənən siyasətinin qurbanı etmiş Ermənistan kimi uydurmalara əsaslanan tarixi hadisələri geosiyasi mübarizə üçün predmetə çevirməyən Azərbaycan, beynəlxalq hüquq normalarına hörmətlə yanaşaraq, hazırda üzərində Ermənistan Respublikası kimi dövlət yaradılmış tarixi Azərbaycan torpaqlarına iddialar irəli sürmür, sadəcə olaraq, mövcud vəziyyət barədə əsl həqiqətləri dünya ictimaiyyətinə çatdırmağa çalışır.

Məhz ulu öndər Heydər Əliyev Azərbaycan həqiqətlərinin dünyaya çatdırılması istiqamətində işlərin sistemli şəkildə aparılması, xaricdəki Azərbaycan diasporunun təşkilatlanması və informasiya təbliğatının lazımi şəkildə qurulması istiqamətində dövlət siyasətinin əsaslarını yaratmış və bu işə daim diqqət yetirmişdir. Heydər Əliyevin 1948-1952-ci illərdə Ermənistandan deportasiya olunaraq Kür-Araz ovalığında məskunlaşdırılmış azərbaycanlılar barədə, 31 martın Azərbaycanlıların Soyqırımı Günü kimi əbədiləşdirilməsi haqqında sərəncamları tarixi həqiqətin bərpasına yönəldilmiş addımlar olmaqla dövlət orqanlarının erməni təbliğatının yalanlarının ifşasına yönəldilmiş məqsədyönlü siyasətinin məhək daşını təşkil edir. Ümummilli lider Heydər Əliyevin dünya azərbaycanlıları arasında həmrəyliyin möhkəmləndirilməsinə yönəlmiş yorulmaz və ardıcıl fəaliyyəti sahəsində 2001-ci ildə Bakıda dünya azərbaycanlılarının birinci qurultayı keçirilmiş, Dünya Azərbaycanlılarının Konqresi təşkil olunmuşdur. Bütün bu tarixi qərarlar azərbaycanlıların milli mənlik şüurunun formalaşmasında mühüm əhəmiyyət kəsb etmişdir. Ulu öndər Heydər Əliyev konkret və lakonik olaraq demişdir: "Mənim üçün hər şeydən üstün mənim milli mənliyimdir". Türkiyədə və Azərbaycanda saysız-hesabsız qırğınlar törətmiş, "gəmidə oturub gəmiçiylə dava edən" ermənilər hər iki dövlətə qarşı mənfur siyasətlərini davam etdirir, yeni-yeni qondarma iddialar irəli sürürlər. Tale oxşarlığı, eyni aqressiv separatizm və terrorçuluq siyasətinə məruz qalmaları baxımından mənəvi səylərin birləşdirilməsi üçün "Biz bir millət iki dövlətik" - deyən ulu öndər Heydər Əliyev, eləcə də bu çox dəyərli fikri inkişaf etdirərək, "bir millətin iki diasporu ola bilməz" - söyləyən cənab İlham Əliyev əslində dərin mənalı və proqram xarakterli ideyalar irəli sürmüşlər.

Hər iki lider daim mübariz olmağa, qüvvələri səfərbər etməyə, müdafiədən hücuma keçməyə çağırmışlar. Necə deyərlər: "Qələbə hücumda qazanılır". Özü də bu hücum təcavüz, işğal üçün yox, azadlıq, həqiqətin və ədalətin zəfər çalması naminə edildikdə.

Milli Təhlükəsizlik Nazirliyinin digər struktur bölmələri ilə birlikdə Azərbaycanın reallıqlarının, Qarabağ həqiqətləri ilə bağlı təbliğat-informasiya işinin gücləndirilməsində Əsir və itkin düşmüş, giröv götürülmüş vətəndaşlarla əlaqədar Dövlət Komissiyası fəal iştirak edir. Bu baxımdan, Əsir və itkin düşmüş, girov götürülmüş vətəndaşlarla əlaqədar Dövlət Komissiyası ilə bağlı ümummilli lider tərəfindən verilmiş 1 mart 2001-ci il tarixli sərəncam Azərbaycan tarixinin daim təqdir olunacaq səhifələrindəndır. Məhz göstərilən sərəncamda Ermənistanın Azərbaycana təcavüzü nəticəsində törədilmiş cinayət faktlarının toplanaraq beynəlxalq aləmdə yayılması Dövlət Komissiyasının qarşısında vəzifə kimi müəyyənləşdirilmişdir. Sərəncamda deyilir: "Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyasına tapşırılsın: Ermənistan tərəfindən azərbaycanlılara qarşı həyata keçirilən soyqırımı və etnik təmizləmə siyasətini əks etdirən hüquqi-tarixi sənədlərin, əsir və itkin düşmüş, girov götürülmüş şəxslərlə bağlı materialların dünya ictimaiyyətinə çatdırılması üçün ardıcıl və məqsədyönlü iş aparsın".

Sərəncamdan irəli gələn müqəddəs, humanitar vəzifənin həyata keçirilməsi üçün görülən işlər 2004-cü ildə milli təhlükəsizlik naziri Eldar Mahmudov Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyasının sədri təyin olunduqdan sonra daha böyük vüsət, məqsədyönlü və intensiv xarakter almışdır.

Qısaca olaraq qeyd etmək lazımdır ki, ilk növbədə Ermənistanın Azərbaycana təcavüzü nəticəsində İtkin düşmüş və əsir-girovluqdan azad olunmuş şəxslərə aid Dövlət Komissiyasında mövcud olan siyahılar ətraflı təhlil edilmiş, və dəqiqləşmə işi aparılmışdır. Hazırda Dövlət Komissiyasında 4210 nəfər Azərbaycan vətəndaşı (01.01.2009-cu il tarixə olan məlumat) itkin düşmüş şəxs kimi qeydiyyatdadır.

Bir məqamı da xatırlatmaq zəruridir. 2004-2008-ci illərdə 18 Azərbaycan vətəndaşı erməni əsir-girovluğundan azad olunmuş, qoşunların təmas xəttini və dövlət sərhədini pozduğu üçün saxlanılmış 20 erməni qarşı tərəfə qaytarılmışdır. Münaqişə başlanandan hazırkı dövrə qədər isə 1396 nəfər (01.01.2009-cu il tarixə olan məlumat) Azərbaycan vətəndaşı azad edilmişdir.

Bu illərdə Əsir və itkin düşmüş, girov götürülmüş vətəndaşlarla əlaqədar Dövlət Komissiyasının beynəlxalq əlaqələri də nəzərəçarpacaq dərəcədə inkişaf etmiş, komissiya sədri Eldar Mahmudov tərəfindən bir sıra önəmli görüşlər keçirilmiş, danışıqlar və müzakirələr aparılmışdır.

Beynəlxalq Qızıl Xaç Komitəsi tərəfindən irəli sürülmüş Ermənistan-Azərbaycan, Dağlıq Qarabağ münaqişəsi ilə bağlı itkin düşmüş şəxslər haqqında Ante Mortem məlumatların toplanması və mərkəzləşdirilmiş şəkildə idarə olunması üzrə çərçivə sazişi ilə bağlı 2005-ci ildən başlanmış müzakirələr başa çatdırılmış 14 aprel 2008-ci il tarixdə Əsir və itkin düşmüş, girov götürülmüş vətəndaşlarla əlaqədar Dövlət Komissiyası ilə Beynəlxalq Qızıl Xaç Komitəsi arasında imzalanmışdır.

Dövlət Komissiyasının tərkibinə daxil olan şəxslərin bilavasitə mənsub olduqları dövlət qurumları, habelə Diasporla İş üzrə Dövlət Komitəsi, Xarici İşlər Nazirliyi, Mədəniyyət və Turizm Nazirliyi ilə qarşılıqlı fəaliyyətin səmərəli şəkildə əlaqələndirilməsi informasiya mübarizəsinin effektivliyini artırmışdır. Bu məqsədlə Azərbaycan Respublikasının xaricdəki səfirliklərinə, diaspor təşkilatlarına, tərəfdaş dövlətlərə, tanınmış alim və ictimai-siyasi xadimlərə, konfliktoloqlara kitab və disklərin göndərilməsi prosesi davam etdirilmiş və daha da genişləndirilmişdir. Xeyli sayda, özü də müxtəlif dillərdə münaqişə ilə bağlı dünya alimlərinin əsl reallığı, obyektiv vəziyyəti əks etdirən yeni nəşrləri və habelə müvafiq filmlər hazırlanaraq xarici ölkələrdə yayılmışdır. Bu təbliğat vasitələri arasında Azərbaycanda hökm sürən əlverişli investisiya iqlimini, ölkəmizin turizmin inkişafı üçün cəlbedici olduğunu dolğun faktlar əsasında əks etdirən nəşrlər və filmlər də vardır. Xarici kütləvi informasiya vasitələrində təbliğat xarakterli ardıcıl materiallar yerləşdirilmişdir.

Komissiya eyni zamanda, qlobal informasiya şəbəkəsi olan internetin çoxşaxəli imkanlarından yararlanaraq onun istifadəçilərini sistemli şəkildə erməni cinayətləri, o cümlədən öz fəaliyyəti barədə məlumatlandırılır. Bu məqsədlə komissiya tərəfindən yaradılmış iki sayt - www.human.az və www.human.gov.az fəaliyyətdədir. Bu saytlardan biri - www.human.az 2005-ci ilin avqust ayında Rabitə və İnformasiya Texnologiyaları Nazirliyinin və BMT-nin "Milli İdarəetmə şəbəkələri" adlı inkişaf proqramı çərçivəsində təşkil edilmiş Azerbaijan EContent Award-2005 müsabiqəsində "E-hökumət" nominasiyası üzrə qalib elan edilmişdir.

Təbliğat sahəsində komissiya tərəfindən aparılan işlər 2006-cı ildə yeni inkişaf mərhələsinə qədəm qoymuşdur. Ölkə rəhbəri cənab İlham Əliyev tərəfindən 2006-cı ildə "Azərbaycan Respublikasının diplomatik xidmət orqanları rəhbərlərinin ikinci müşavirəsində", "Türkdilli dövlətlərin 10-cu dostluq, qardaşlıq və əməkdaşlıq qurultayında" və Milli Məclisin 2006-cı il payız sessiyasının açılışında bütün soydaşlarımız üçün erməni iddialarına qarşı dünya ictimaiyyətində obyektiv fikrin formalaşdırılması məqsədilə aparılan təbliğat sahəsində hücum xarakterli strateji xətt müəyyənləşdirildikdən sonra Dövlət Komissiyası öz fəaliyyətini bu vəzifələrin icrası istiqamətində daha da artırmışdır.

Dövlət Komissiyası Ermənistanın Azərbaycana təcavüzü ilə bağlı törədilmiş cinayət faktlarının beynəlxalq ictimaiyyətə çatdırılması ilə yanaşı, bu faktların istintaqının aparılmasını da vacib vətəndaşlıq vəzifəsi saymışdır. Bu faktların araşdırılması üçün Respublika Prokurorluğu, Milli Təhlükəsizlik və Daxili İşlər nazirliklərinin birgə istintaq-əməliyyat qrupu yaradılmış, ermənilər tərəfindən törədilmiş soyqırımı, müharibə və insanlıq əleyhinə olan cinayətlər ciddi şəkildə araşdırılır. Dövlət Komissiyasının arxivində toplanmış və istintaq nöqteyi-nəzərindən mühüm əhəmiyyət kəsb edən materiallar - siyahılar, şahid ifadələri, ümumiləşdirilmiş arayışlar, foto, video faktlar və digər zəruri məlumatlar da sistemləşdirilərək istintaq-əməliyyat qrupuna göndərilmişdir. Təsadüfi deyil ki, bu günə olan məlumata görə, Xocalı, Qaradağlı, Meşəli, Bağanis-Ayrım hadisələri zamanı əsir-girov götürülmüş azərbaycanlılara verilmiş işgəncələrdə iştirak etmiş 279 erməninin cinayət əməli ilkin istintaq prosesində sübuta yetirilmiş və bəzilərinin barəsində İnterpolun xətti ilə beynəlxalq axtarış elan olunmuşdur.

Azərbaycan Respublikasının Prezidenti cənab İlham Əliyevin proqram xarakterli nitqlərindən irəli gələn vəzifələrin həyata keçirilməsi hər bir azərbaycanlının vətəndaşlıq borcu olduğu kimi, Dövlət Komissiyasının bu sahədə göstərdiyi fəaliyyətin ana xəttini təşkil edir. Məqalənin epiqrafında dövlət başçısının dediyi kimi: "Biz hücuma keçməliyik!".

Şahin Sayılov,

Əsir və itkin düşmüş, girov götürülmüş

vətəndaşlarla əlaqədar Dövlət Komissiyasının katibi

Azərbaycan.-2009.-14 mart.-S.4.