Milli Təhlükəsizlik Nazirliyinin "N" hərbi hissəsində ümummilli lider Heydər Əliyevin abidəsinin açılışı və hərbi hissəyə döyüş bayrağının təqdim edilməsi mərasimi olmuşdur

Martın 14-də Milli Təhlükəsizlik Nazirliyinin "N" hərbi hissəsində ümummilli lider Heydər Əliyevin abidəsinin açılışı və hərbi hissəyə döyüş bayrağının təqdim edilməsi mərasimi olmuşdur.

Azərbaycan Prezidenti, Silahlı Qüvvələrin Ali baş komandanı İlham Əliyev mərasimdə iştirak etmişdir.

Milli təhlükəsizlik naziri, general-leytenant Eldar Mahmudov Ali baş komandana raport verdi.

Prezident İlham Əliyev əvvəlcə ulu öndər Heydər Əliyevin abidəsini açdı, önünə gül dəstəsi qoydu.

Milli təhlükəsizlik orqanlarına göstərilən diqqət və qayğıya, yaradılan şəraitə görə dövlətimizin başçısına təşəkkür edən milli təhlükəsizlik naziri bildirdi ki, son illərdə nazirliyin maddi-texniki bazasının möhkəmləndirilməsi üçün mühüm işlər görülmüşdür. Ali baş komandan İlham Əliyev ölkənin milli təhlükəsizlik orqanlarının işinin təkmilləşdirilməsi üzrə kompleks tədbirlərin həyata keçirilməsini daim diqqətdə saxlayır. Bu məqsədlə bütün zəruri tədbirlər həyata keçirilir.

Hərbi hissə ilə tanış olan Prezident İlham Əliyevə məlumat verildi ki, burada hərbi xidmətin nümunəvi səviyyədə təşkili üçün hər cür şərait var. Əsgər yataqxanası yüksək standartlar səviyyəsində qurulmuş, şəxsi heyətin istirahətinin təşkili üçün də lazımi işlər görülmüşdür.

Ali baş komandan ümummilli lider Heydər Əliyevin Azərbaycanda ordu quruculuğu, milli təhlükəsizlik orqanlarının fəaliyyətinin təkmilləşdirilməsi və inkişafı sahəsində gördüyü işləri əks etdirən fotoguşəyə baxdı. Burada Prezident İlham Əliyevin Milli Təhlükəsizlik Nazirliyinin və onun strukturlarının maddi texniki bazasının möhkəmləndirilməsi ilə bağlı tədbirlərini əks etdirən fotolar da vardır. Nazir dövlətimizin başçısına hərbi hissədə gələcəkdə görüləcək işlər barədə də məlumat verdi.

Hərbi hissə ilə tanışlıq zamanı Prezident İlham Əliyev əsgər yeməkxanasında yaradılan şəraitlə də tanış oldu. Bildirildi ki, şəxsi heyətin yüksək standartlar tətbiq olunmaqla qidalanması diqqət mərkəzində saxlanılır.

Hərbi hissənin klubunda isə müxtəlif tədbirlərin keçirilməsi üçün akt salonu var, kitabxana latın qrafikası ilə nəşr olunmuş ədəbiyyatla təchiz edilmişdir. Burada əsgərlər Azərbaycanın tarixi, mədəniyyəti və ədəbiyyatına dair nəşrlər, habelə vətənpərvərlik mövzusunda kitablar əldə edə bilərlər.

Dövlətimizin başçısı hərbi hissənin əvvəlki və indiki vəziyyətini əks etdirən fotostendə də baxdı.

Sonra hərbi hissənin ərazisi ilə tanış olan Ali baş komandana məlumat verildi ki, burada əsgərlərin yüksək fiziki hazırlığına nail olunması üçün zəruri avadanlıqla təchiz edilmiş idman şəhərciyi yaradılmış və hərbi hissənin ərazisində geniş abadlıq işləri aparılmış, bəzək ağacları əkilmişdir.

Daha sonra hərbi hissəyə döyüş bayrağının təqdim olunması ilə bağlı təntənəli mərasim keçirildi.

Prezident İlham Əliyev əsgərləri salamladı.

Milli Təhlükəsizlik Nazirliyinin "N" hərbi hissəsinin döyüş bayrağı haqqında Azərbaycan Prezidentinin Sərəncamı oxundu.

Azərbaycan Prezidenti, Ali baş komandan İlham Əliyev hərbi hissəyə döyüş bayrağını təqdim etdi, şəxsi heyəti bu münasibətlə təbrik etdi. Şəxsi heyət əsgəri şərəf, şücaət və şöhrət rəmzi olan döyüş bayrağını göz bəbəyi kimi qoruyacağına, Vətənə, xalqa sədaqətlə xidmət edəcəyinə, Ali baş komandanın əmrlərinin icrasına daim hazır olacağına and içdi.

Hərbi orkestrin ifasında Azərbaycanın dövlət himni səsləndi.

Şəxsi heyət təntənəli marşın sədaları altında tribunanın qarşısından keçdi.

AzərTAc

Azərbaycan.-2009.-15 mart.-S.2.