Azərbaycan təkcə qaz ixrac edən yox, həm də tranzit ölkə ola bilər

Bu sözlər Litvanın Azərbaycandakı səfiri Kestutis Kudzmanasa məxsusdur.

Səfir bildirib ki, Azərbaycan Nabucco xətti ilə qaz ixrac edən əsas ölkə ola bilər ki, bu da layihənin Orta Asiya dövlətləri üçün cəlbediciliyini artırar. "Belə olan halda isə Azərbaycan təkcə qaz ixrac edən yox, həm də tranzit ölkə olar. Bu isə o deməkdir ki, Azərbaycanın Avropa Birliyi ölkələri ilə yanaşı, region dövlətləri üçün də cəlbediciliyi artar" - deyə səfir qeyd edib. Diplomat onu da vurğulayıb ki, Rusiya qazının Ukrayna ərazisi vasitəsi ilə Avropaya ötürülməsi ətrafında son vaxtlar baş vermiş qalmaqallar bir daha sübut etdi ki, buna alternativ kəmər lazımdır və Nabucco layihəsi həmin funksiyanı öz üzərinə götürə bilər.

Bu gün enerji təhlükəsizliyi və təhlükəsiz marşrutların aktual məsələyə çevrildiyini deyən səfir hər hansı inhisarçılığın bazar qanunlarına zidd olduğunu söyləyib. Onun sözlərinə görə, bu səbəbdən Avropa alternativ və stabil tərəfdaş axtarır. Avropanın vahid enerji siyasəti mümkün qədər yeni ixrac marşrutlarını tələb edir ki, bu sahədə bazar iqtisadiyyatı mexanizmi etibarlı işləsin. "Azərbaycan məhz belə bir ixracçı ölkədir. K.Kudzmanasın fikrincə, Avropa Birliyi ölkələrinin enerji təhlükəsizliyinin təminatında mühüm rol oynayan Bakı-Tbilisi-Ceyhan neft kəmərinin etibarlı işləməsi bu qənaətə gəlməyə əsas verir. Səfir hətta onu açıqlayıb ki, əgər gələcəkdə Azərbaycan neftinin ixracı üçün yeni alternativ marşrut məsələsi gündəmə gəlsə, Litva Azərbaycan neftini qəbul etməyə hazırdır.

Azərbaycan.-2009.-15 mart.-S.3.