"Seçkilər" İnformasiya Mərkəzi səsvermə ilə bağlı məlumatların ictimaiyyətə operativ ötürülməsini təmin etdi

Mərkəzi Seçki Komissiyasının nəzdində fəaliyyət göstərən "Seçkilər" İnformasiya Mərkəzi referendum günü səsvermənin gedişatı ilə bağlı informasiyaları gün ərzində operativ şəkildə ictimaiyyətə təqdim etdi. Mərkəz ötən seçkilərdə olduğu kimi, referendumda da öz fəaliyyətini çevik və dəqiq şəkildə quraraq vəzifəsini yerinə yetirdi.

Qeyd edək ki, ulu öndər Heydər Əliyevin imzaladığı 2000-ci il 3 sentyabr tarixli "Azərbaycan Respublikasında Dövlət Avtomatlaşdırılmış "Seçkilər" İnformasiya Sisteminin yaradılması haqqında" sərəncama əsasən Azərbaycan Respublikasında seçki sisteminin təkmilləşdirilməsi, onun informasiya təminatının müasir tələblər səviyyəsində qurulması və seçki prosesində aşkarlığın və şəffaflığın təmin olunması məqsədilə Azərbaycan Respublikasında Dövlət Avtomatlaşdırılmış "Seçkilər" İnformasiya Sistemi yaradılmışdır. Sərəncamın 2-ci bəndində isə MSK-ya təklif edilmişdir ki, sistemin fəaliyyətini təşkil etmək üçün öz nəzdində İnformasiya Mərkəzi yaratsın, sistemə aid tələbləri və ondan istifadə qaydalarını müəyyən etsin, həmçinin sistemin daxilində informasiya mübadiləsi və mühafizəni təmin etmək üçün müvafiq icra hakimiyyəti orqanları ilə birgə zəruri tədbirlər hazırlayıb həyata keçirsin.

2000-ci il noyabrın 2-də "Seçkilər" İnformasiya Mərkəzinin rəsmi açılışı olmuşdu. Açılış mərasimində iştirak edən ulu öndər Heydər Əliyev Mərkəzin iş rejimi ilə maraqlanmış, burada quraşdırılmış müasir avadanlıqlarla, kompüter və digər texniki vasitələrlə tanış olmuşdur.

Dövlət Avtomatlaşdırılmış İnformasiya Sisteminin funksiyalarını Seçki Məcəllələrinə uyğun olaraq MSK müəyyənləşdirir. DAİS-in texniki baxımdan iş icraçılığını isə "Seçkilər" İnformasiya Mərkəzi yerinə yetirir. Seçki dövrü olmadığı müddətlərdə də mərkəz daim fəaliyyət göstərir. Məlum olduğu kimi, Seçki Məcəlləsinin tələblərinə uyğun olaraq hər il seçici siyahıları tərtib olunur. Bu siyahılar tərtib edilərkən Dövlət Avtomatlaşdırılmış İnformasiya Sistemlərindən istifadə edilir.

Seçki və ya referendum günü isə "Seçkilər" İnformasiya Mərkəzinin fəaliyyəti xüsusilə ölkə ictimaiyyətinin diqqət mərkəzində olur. Çünki səsvermənin gedişatı və əhalinin seçkidə iştirakı ilə bağlı informasiyalar dairə seçki komissiyalarından buraya ötürülür. Səsvermə günü Mərkəz beş hesabat dövründə - saat 10.00, 12.00, 15.00, 17.00 və 19.00-da səsvermənin gedişatı ilə bağlı ən son informasiyaları verir. Səsvermə başa çatdıqdan sonra dairə seçki komissiyalarından protokollar "Seçkilər" İnformasiya Mərkəzinə daxil olur.

Dünən "Seçkilər" İnformasiya Mərkəzinin direktoru Ramil Hüseynovla görüşdük. Söhbət zamanı R.Hüseynov bütün dairə seçki komissiyaları ilə fasiləsiz əlaqənin olduğunu və hər hesabat dövründə yeni məlumatların ictimaiyyətə çatdırıldığını dedi. R.Hüseynov onu da bildirdi ki, fəaliyyət göstərdiyi 8 ildən artıq müddətdə "Seçkilər" İnformasiya Mərkəzi daim iş təcrübəsini artırıb, seçkidən- seçkiyə öz fəaliyyətini ən müasir metodlar çərçivəsində qurub. "Seçkilər" İnformasiya Mərkəzi Konstitusiyaya nəzərdə tutulan əlavələr və dəyişikliklərlə bağlı keçirilən referendumda da vəzifəsinin öhdəsindən uğurla gəlib.

"Seçkilər" İnformasiya Mərkəzində olduğumuz zaman burada məlumatların ötürülməsi ilə bağlı fəaliyyət prosesinin ən müasir metodlar çərçivəsində qurulmasının əyani şahidi olduq. Mərkəzin qapısı hər bir jurnalistin və müşahidəçinin üzünə açıq idi. Onların rahat şəkildə referendumun gedişini izləmələri, məlumat toplamaları üçün bütün texniki imkanlar var idi. Müşahidə zalındakı bütün texniki avadanlıqlar ötən seçkilər zamanı quraşdırılmış avadanlıqlardan müasirliyi ilə fərqlənirdi. Divarda quraşdırılmış monitorlar vasitəsilə kompüter arxasına əyləşmədən gün ərzində dairələr üzrə səsvermənin gedişatını izləmək mümkün idi. Hər bir şəxs zalda quraşdırılmış ən müasir kompüterlərin arxasına əyləşib son məlumatları əldə edə bilərdi. Kütləvi informasiya vasitələri nümayəndələrinin, müşahidəçilərin operativ şəkildə internet, telefon və faks vasitəsilə informasiya ötürə bilmələri, o cümlədən televiziya kanallarının əməkdaşlarının birbaşa efirə çıxmaları üçün bütün şərait yaradılmışdır. Mərkəzin rəhbərliyi və əməkdaşları səsvermənin gedişini izləyən hər kəsin müraciətinə həssaslıqla yanaşırdılar.

Dünən keçirilən referendumda "Seçkilər" İnformasiya Mərkəzi gün ərzində səsvermənin gedişatı ilə bağlı bütün informasiyaları ictimaiyyətə çatdıraraq öz vəzifəsinin öhdəsindən layiqincə gəldi.

Rəşad Cəfərli

Azərbaycan.-2009.-19 mart.-S.10.