Bölgələrdə referendum əhalinin fəallığı və mütəşəkkilliyi ilə keçdi

Gəncə

Qədim Gəncədə dörd seçki dairəsi fəaliyyət göstərir. 31 saylı Nizami birinci və 38 saylı Nizami ikinci, həmçinin 39 saylı Kəpəz birinci və 40 saylı Kəpəz ikinci seçki dairələri. Hər şəraiti olan 112 məntəqə seçicilərin ixtiyarına verilib. Ümumən şəhər üzrə 149 min nəfərin səs verə bilməsi üçün hər şərait yaradılıb. Hər yerdə binalar geniş, avadanlıq təzə, otaqlar işıqlı.

Səhərdən dəstə-dəstə adam öz vətəndaşlıq borcunu yerinə yetirməyə gəlirdi. Əvvəlcə 38 saylı Nizami ikinci seçki dairəsinin 16 saylı məntəqəsinə baş çəkdik. Məntəqə şəhərin mərkəzindəki 5 nömrəli məktəbdə yerləşir. Seçicilərin rahatlığı üçün kabinetlərin sayı iki dəfə artırılıb. Məntəqə üzvləri, müşahidəçilərə müvafiq yerlər ayrılıb, seçkinin gedişi veb-kamera ilə izlənilir.

Respublikanın əməkdar müəllimi Firudin Nadirov söhbət zamanı dedi ki, Konstitusiyaya əlavələr və dəyişikliklər edilməsi zamanın tələbidir. Axı, bütün bunlar insan hüquq və azadlıqlarının daha etibarlı şəkildə qorunması, sosial ədalət prinsipinin daha da təkmilləşdirilməsi üçündür. Hər bir əlavə və dəyişiklik qanunvericiliyin daha da möhkəmləndirilməsinə, onların daha etibarlı qorunması mexanizminin yaradılmasına xidmət edir.

Adamlar bunu yaxşı başa düşür və referendumda fəal iştirak edirlər. Şəhərin digər məntəqələrində də seçicilərdən eyni sözləri eşitdik. Ümumən qədim Gəncə bu mühüm siyasi tədbirə tam hazırlıqla gəlib. Hər yerdə təşviqat qruplarının üzvləri, siyasi partiyaların nümayəndələri və öz təşəbbüsləri ilə gələnlər üçün hər şərait var idi. Şəhərin dörd seçki dairəsinin 26 məntəqəsində veb-kameralar qoyulub, 1116 müşahidəçi qeydə alınıb.

Gəncə Dövlət Universitetinin binasında, 38 saylı Nizami ikinci seçki dairəsinin 13 saylı məntəqəsində Böyük Britaniya səfirliyi müşahidə missiyasının nümayəndələri Kole Robert Edvard və Seçohaus Riçard ilə görüşdük. Seçkilərin təşkili, sənədlərin tərtibi, seçicilərin fəallığı ilə maraqlanırdılar. Heç bir narahatlıq, nigaranlıq olmadığını söylədilər.

Azərbaycan Kənd Təsərrüfatı Akademiyasının, "Cihaz" İstehsalat Birliyinin, 16, 24, 40 saylı məktəblərin binalarında və digər yerlərdə yerləşən məntəqələrdə də səsvermənin mütəşəkkil keçdiyinin şahidi olduq.

Günün ikinci yarısında 37 saylı Nizami birinci seçki dairəsi ilə əlaqə saxladıq. Dairə seçki komissiyasının sədri Zakir Hüseynov dedi ki, məntəqələrin çoxunda artıq səsvermə başa çatmaq üzrədir. Gün ərzində heç bir qanun pozuntusu, narahatlıq, narazılıq qeydə alınmamışdır.

Abşeron

Abşeron rayonunda da ümumxalq səsverməsi seçicilərin fəal iştirakı ilə keçmişdir. Belə ki, səhər seçki məntəqələri açılandan səsverməyə gələnlərin ardı-arası kəsilmirdi. 45 saylı Abşeron seçki dairəsinin 23 saylı seçki məntəqəsi də səsverməyə gələnlərlə dolu idi. Məntəqə komissiyasının sədri Şükür Əhmədov bildirdi ki, səsvermədə öncə məntəqə üzrə seçicilərin siyahısı dəqiqləşdirilmiş, onların məntəqəyə gəlməsi üçün bütün lazımi şərait yaradılmışdır. 1574 seçicini birləşdirən bu məntəqədə seçici siyahıları görünən yerdə vurulmuşdur. Məntəqə seçki komissiyasının üzvləri Elnur Quliyev, Vidadi Orduxanov, İzzət Tahirova, Gülzar Dəmirova və Elman Ağayev məntəqə açılandan bəri səsverməyə gələnlərin adlarını siyahıda tapmaları üçün onlara yaxından kömək göstərirdilər. Xəstə və digər səbəblərdən səsvermə məntəqəsinə gələ bilməyənlər üçün xüsusi nəqliyyat vasitəsi ayrılmışdır. Səs verib məntəqədən aralanan Şakir Muxtar oğlu Abbasov Saray qəsəbəsinin ağsaqqalları adından respublikada keçirilən referendumu dəstəklədiklərini bildirdi. O qeyd etdi ki, ölkəmizin uğurlu inkişafı bizə imkan verir ki, Konstitusiyaya əlavə və dəyişikliklər edilsin. Səsverənlər Abdulla Abdullayev, Solmaz Rəcəbova, Sədilə Babayeva və digərləri referendumdan razı qaldıqlarını bildirdilər. Müxtəlif partiyalardan olan müşahidəçilər səsvermə prosesində heç bir qanun pozuntusuna yol verilmədiyini qeyd etdilər.

Sumqayıt

Sumqayıtda seçicilər yüksək mütəşəkkillik nümayiş etdirdilər. Şəhər sakinləri seçki məntəqələrinə gələrək ümumxalq səsverməsində yaxından iştirak etdilər. Sumqayıtda şəhər 3 saylı orta məktəbin binasında yerləşən 42 saylı Sumqayıt ikinci seçki dairəsinin 7 saylı məntəqəsində olarkən bunun bir daha şahidi olduq. Məntəqə seçki komissiyasının sədri Ramil Niftalıyev prosesin kifayət qədər şəffaf keçdiyini və səsverməyə gələnlərin fəallığının yüksək olduğunu söylədi. 1055 nəfər seçicisi olan bu məntəqədə səsvermə üçün bütün şərait yaradılmışdır. Onun sözlərinə görə, burada heç bir ciddi qanun pozuntusu qeydə alınmamış, vətəndaşlar sərbəst şəkildə referenduma çıxarılan məsələlərə münasibət bildirmişlər. Məntəqə seçki komissiyasının üzvləri Mətanət Nuriyeva, Lalə Ağacanova və Leyla Nəzərova seçicilərə siyahıda adlarını tapmaqda yaxından kömək edirdilər. Səsverməyə gələnlərdən Səyalı Nəsibova, Müşviq Seyidməmmədov və Bəbir Alıxanov məntəqədə təşkil edilən şəraitdən razı qaldıqlarını bildirdilər.

Həmin seçki dairəsinin 8 saylı seçki məntəqəsinin sədri İlham Məmmədov ümumxalq səsverməsinin uğurla keçdiyini və nəticələrə təsir göstərə biləcək qanun pozuntularına rast gəlinmədiyini söylədi. 1313 seçicisi olan məntəqənin komissiya üzvləri Arzu Həşimova, Səfər Seyfullayev və Gülnarə Novruzova seçicilərin fəallığından razı qaldıqlarını bildirdilər. Cəmilə Əliyeva, Gülarə Əzizova, Firdovsi Əzizov və Cəmaləddin Əzizov seçkinin gedişatından razı qaldıqlarını bildirdilər. Məlik Əbişov ölkənin gələcəyinə xidmət edən ümumxalq səsverməsinin vacib olduğunu bildirdi. O qeyd etdi ki, respublikamızın daxili və xarici siyasətində əldə edilən uğurların davamı olan bu referendum xalqımızı daha işıqlı sabahlara aparacaqdır. Seçici Vasili Loqinov tolerantlığa nümunə olan bir ölkədə yaşamağına, inkişaf edən respublikanın vətəndaşı olmağına görə fəxr etdiyini dedi.

43 saylı Sumqayıt üçüncü seçki dairəsinin 10 saylı məntəqə seçki komissiyasının sədri Maya Abdulova bildirdi ki, 1363 seçicisi olan məntəqədə veb-kamera quraşdırılıb. Seçkidə vətəndaşların yaxından iştirak etdiyini bildirən məntəqə seçki komissiyasının sədri onu da əlavə etdi ki, məntəqə üzvləri Gülnar Ağayeva, Samirə Əzizova, Vələddin İbrahimov və Orxan Bahadurzadə üzərlərinə düşən vəzifələri layiqincə yerinə yetirirlər. Ümumxalq səsverməsində iştirak edən Afət Həsənova, Mehriban Şivəxanlı, Sona Umudova və Elza Adilova səsvermənin gedişindən razı qaldıqlarını bildirdilər.

43 saylı Sumqayıt üçüncü seçki dairəsinin 11 saylı seçki məntəqəsinin sədri Səkinə Məmmədova da səsvermənin gedişini yüksək qiymətləndirdi. 1403 seçicisi olan məntəqə seçki komissiyasının üzvləri Sevinc Cavadova, Xatirə Orucova və Zaur Baxşıyev bu səsvermədə seçicilərin daha fəal olduqlarını, əvvəlki seçkilərə nisbətdə vətəndaşlarda seçki mədəniyyətinin formalaşdığını qeyd etdilər. Məntəqə seçki komissiyasının sədri Səkinə Məmmədova onu da bildirdi ki, müşahidəçilər açıq etiraf edirlər ki, məntəqədə heç bir qanun pozuntusuna yol verilməyib. Bəhrəm Həbib oğlu Paşayev qeyd etdi ki, inkişafda olan ölkəmizin gələcəyinə inanır və onu bura gətirən də respublikamızın sabahına səs vermək istəyidir. Yaşar Qurbanov, Şəmşir Hacıyev, Xalid Abbasov və Sədaqət İsmayılova belə bir səsverməyə görə əlaqədar təşkilatlara öz minnətdarlıqlarını bildirdilər.

44 saylı Sumqayıt-Abşeron seçki dairəsinin 26 saylı məntəqə seçki komissiyasının sədri Rasim Hüseynov səsverməyə gələnlərin fəallığından danışdı. 1466 seçicini birləşdirən bu məntəqənin üzvləri Ayna Fərruxova, Xatirə Tağıyeva, Firudin Əliyev və Gülnar Mehdiyeva səsverməyə gələnlərə adlarını siyahıda tapmaqda kömək edirdilər. Səsvermədə iştirak edən Sabir Nağıyev dedi: "Bu referendumdan çox şey gözləyirik".

Digər səsverməyə gələnlər-Familə Orucova və Aygün Mustafayeva onlara belə bir şərait yadıldığı üçün əlaqədar təşkilatlara öz minnətdarlıqlarını bildirdilər.

Ağcabədi

Ağcabədililər son prezident seçkilərində olduğu kimi, "Azərbaycan Respublikasının Konstitusiyasına əlavələr və dəyişikliklər edilməsi haqqında" referendumda da fəal iştirak edirdilər. Rayon mərkəzində, eləcə də ayrı - ayrı kəndlərdəki səsvermə Seçki Məcəlləsinin tələblərinə uyğun şəffaf və demokratik prinsiplər əsasında aparılırdı. Hər kəsin öz iradəsini sərbəst həyata keçirməsi üçün əlverişli şərait yaradılmışdı. 82 saylı Ağcabədi dairə seçki komissiyasının sədri Nadir Qürbətov bildirdi ki, dairə 43 məntəqəni əhatə edir. Dairə üzrə seçici siyahılarına 38.814 nəfərin adı daxil edilmişdir. Dairənin tərkibində 14 şəhər və 29 kənd məntəqəsi vardır.

Məntəqələr zəruri avadanlıqlarla təchiz olunmuş, yüksək səviyyədə rabitə təminatı yaradılmışdır. 2 və 11 saylı seçki məntəqələrində seçicilərin fəallığı daha çox hiss olunurdu. Yenicə səs vermiş şəhər sakini Vəli Camalxanov seçki təəssüratlarını bizimlə belə bölüşürdü:

-Mən ilk dəfə deyil səs verirəm. Görürəm ki, seçki prosesi seçkidən - seçkiyə daha da təkmilləşir, sivil, demokratik və şəffaf xarakter alır. Bu, bizdə hədsiz dərəcədə razılıq hissi doğurur. Biz Ağcabədinin timsalında ölkəmizdə baş verən genişmiqyaslı yeniliklərin, tərəqqinin şahidi və iştirakçılarıyıq. Mən bu gün Azərbaycanın daha işıqlı sabahına səs verdim. İnanıram ki, Əsas Qanunumuza ediləcək əlavələr və dəyişikliklər dinamik inkişafımıza yeni stimul verəcək.

Lənkəran

Referendum Lənkəranda da əhalinin yüksək siyasi fəallığı şəraitində keçdi. 73 saylı Lənkəran şəhər, 74 saylı Lənkəran kənd, 75 saylı Lənkəran-Masallı və 76 saylı Lənkəran-Astara seçki dairələri üzrə bütün məntəqələr Seçki Məcəlləsinin tələblərinə uyğun şəkildə referenduma hazırlaşmış, yerlərdə Konstitusiyaya təklif olunmuş əlavələr və dəyişikliklərlə bağlı təbliğat və təşviqat kampaniyası yüksək səviyyədə aparılmış, seçicilərə bu barədə ətraflı məlumatlar verilmişdir. Bu siyasi fəallıq seçki günündə məntəqələrin hamısında özünü əyani şəkildə göstərdi.

Lənkəranda 4 dairə üzrə 117 seçki məntəqəsi yaradılmışdır. Bütün məntəqələr lazımi inventarlar, texniki avadanlıqlar və təşviqat materialları ilə təchiz edilmişdir.

73 saylı Lənkəran şəhər seçki dairəsinin şəhər 4 saylı humanitar- məktəb liseyində yerləşən 17 saylı məntəqəsində olduq. Böyük qələbəlik var idi. Seçicilərin aktivliyi yüksək idi. İlk səs verən seçici ilə görüşdük. Özünü təqdim etdi:

- İş adamı Mirakif Abbasov. Mən məntəqədə birinci səs verənlərdənəm. Konstitusiyaya təklif olunan əlavə və dəyişiliklərə münasibətimi bildirdim. Bunu özümün vətəndaşlıq borcu hesab edirəm.

17 saylı məntəqədə 1450 nəfər seçici səs verməlidir. Saat 11 radələrində səs verənlərin sayı artıq 550 nəfəri keçmişdi. Bütöv Azərbaycan Xalq Cəbhəsi Partiyasından olan müşahidəçi Firudin Quliyev:

- Məntəqə açılandan səsvermə prosesini müşahidə edirəm. Heç bir qanun pozuntusuna yol verilmir. Səsvermə prosesinə kənar müdaxilələr yoxdur.

Şəmkir

Ölkəmizin ən iri yaşayış bölgələrindən sayılan Şəmkir rayonunda üç seçki dairəsi fəaliyyət göstərir. 98 saylı Şəmkir şəhər, 99 saylı Şəmkir kənd və 100 saylı Şəmkir-Daşkəsən seçki dairələri. Rayon əhalisinin bir qismi 102 saylı Samux-Şəmkir seçki dairəsində səs verib.

Hər yerdə bu kampaniyaya ciddi hazırlıq görülüb. Dairə seçki komissiyalarının, demək olar, hamısı yeni binalarla, müasir avadanlıqla təmin olunub. Məntəqələr sahmana salınıb, yollar düzəldilib, telefon çəkilib. Dairə və məntəqə seçki komissiyaları siyasi dünya görüşündən asılı olmayaraq duyan, düşünən insanlarla formalaşıb.

Referendumda əhalinin fəal iştirakı üçün geniş izahat-təbliğat işləri aparılıb. Müşahidəçilər qeydə alınıb. Rayonun mərkəzində hər şey nümunəvi qurulub. Ucqar kəndlərdə də həmçinin. 99 saylı Şəmkir kənd seçki dairəsi Zəyəm qəsəbəsində yerləşir, 36 məntəqəni əhatə edir.

Son vaxtlarda bu seçki dairəsinin də, məntəqələrinin də görkəmi tamamilə dəyişilib. Hamısı müasir avadanlıqla, müvafiq mebellə, kompüterlə, faksla, internet xidməti ilə təmin olunub. Ona görə də hər yerdə səsvermə normal gedib. Çaparlı, Düyərli, Dəllər Cəyir kəndlərinin əhalisi günün birinci yarısında fəallıqları ilə seçilib.

100 saylı Şəmkir-Daşkəsən seçki dairəsi isə Kür qəsəbəsində yerləşir. Buradakı 41 məntəqədə 32494 nəfərin səs verə bilməsi üçün hər şərait yaradılmışdı.

Seçkilərə nəzarətin təmin edilməsi üçün 29, 30, 31 və 32 saylı məntəqələrdə veb-kameralar qurulub. Təşviqat qruplarının nümayəndələrinə sərbəst müşahidə apara bilmələri üçün də normal şərait yaradılmışdı. Günün ikinci yarısında 100 saylı Şəmkir-Daşkəsən seçki dairəsinin sədri Şahin Pənahovla əlaqə saxladıq. "Səsvermə mütəşəkkil, yüksək siyasi fəallıq şəraitində keçir - heç bir narahatlıq yoxdur", - dedi.

Göyçay

Göyçaylı seçicilər də respublika Konstitusiyasına əlavələr və dəyişikliklər edilməsi ilə bağlı keçirilən referenduma aktiv vətəndaş münasibəti bildirmək üçün mütəşəkkil şəkildə seçki məntəqələrinə üz tutdular. Bu günə qədər şəhər, qəsəbə və kəndlərdə keçirilmiş çoxsaylı görüşlərdə seçicilər üçün lazımi izahat işləri aparılmış, Konstitusiyaya əlavələr və dəyişikliklərin mahiyyəti izah edilmiş, aydınlaşdırılmış, ümumxalq səsverməsinin Azərbaycan dövlətinin taleyindəki rolu diqqətə çatdırılmışdır. Keçirilən görüşlərdən böyük bir ruh yüksəkliyi ilə ayrılan göyçaylılar referendum günü öz doğru seçimlərini edəcəklərinə əmin olmuş və yəqinləşdirmişdilər ki, dövlətçilik təməllərini daha da möhkəmlədən, sabitliyə, inkişafa imkan verən yeniliyə tərəddüdlü münasibət göstərmək olmaz. Hər bir göyçaylı seçici yaxşı bilir ki, regionların sürətli inkişafından geri qalmayan Göyçayın da sabahkı taleyində, tərəqqi və inkişafında bugünkü ümumxalq səsverməsində göstərilən fəallığın əhəmiyyəti böyükdür.

88 saylı Göyçay və 89 saylı Göyçay-Ağdaş seçki dairələri üzrə 55 məntəqədə səs verən göyçaylılar bir həqiqəti də yaxşı dərk edirlər ki, ölkənin, dövlətin inkişafı ilə bağlı məsələlərdə heç vaxt səhv etmək olmaz.

Seçki məntəqələrində ab-hava, yaradılan şərait, o cümlədən 7 seçki məntəqəsində veb-kameraların quraşdırılması səsvermənin problemsiz, Seçki Məcəlləsinin tələblərinə uyğun keçirilməsində heç bir çətinlik yaratmadı. Seçki məntəqələrinin əksəriyyətində seçicilərin fəallığı diqqəti cəlb edirdi.

Tovuz

Qərb bölgəsinin sərhəd rayonlarında da seçkinin şəffaf, azad və demokratik keçirilməsi üçün lazımi hazırlıq görülüb.

106 saylı Tovuz-Qazax-Ağstafa dairəsinin məntəqələrində 42312 nəfərin sərbəst səs verə bilməsi üçün hər şərait yaradılıb. Dairə seçki komissiyasının sədri Xəqani Vəliyev dedi ki, məntəqələrdə səsvermə kabinələrinin sayı artırılıb, işıqlandırma sistemi gücləndirilib. Tusi adına məktəbdəki 1, M.Ələkbərov adına məktəbdəki 2, Puşkin adına məktəbdəki 3 və Aşağı Öysüzlü kənd mədəniyyət evindəki 8 saylı məntəqələrdə veb-kameralar qurulub. Təşviqat qruplarının üzvləri, siyasi partiyaların nümayəndələri və öz təşəbbüsü ilə gələn müşahidəçilər sərbəst surətdə səsvermənin gedişini izləyə bilib.

8 saylı məntəqədə səhərdən qələbəlik idi. "Oğuz" təşviqat qrupunun səlahiyyətli nümayəndəsi Nizami Abdullayevlə görüşdük. Təmkinli, tədbirli insan kimi tanınır. Neçə ildir Tusi adına məktəbdə dərs deyir. Keçən il respublikanın "Əməkdar müəllim"i adına layiq görülüb. Dedi ki, səhərdən burdayam. Çox adamla fikir mübadiləsi aparmışam. Əksəri mənim kimi Konstitusiyaya edilən əlavələr və dəyişiklikləri zamanın tələbi kimi qiymətləndirir, hər bir müddəanı dəstəkləyir.

105 saylı Tovuz, 107 saylı Qazax və 108 saylı Ağstafa seçki dairəsinin məntəqələrində də səsvermə şəffaf, azad və demokratik şəraitdə keçmişdir.

Cəlilabad

67 saylı Cəlilabad şəhər seçki dairəsinin ən böyük seçki məntəqələrindən biri - 5 saylı seçki məntəqəsi yenicə təmirdən çıxmış mədəniyyət və turizm şöbəsinin binasında yerləşir. Məntəqə müasir texniki avadanlıqlarla təchiz edilib, burada veb-kamera quraşdırılıb. Əvvəlcədən seçicilər arasında yüksək səviyyədə hüquqi maarifləndirmə işləri aparıldığından, onlara Konstitusiyaya təklif edilən əlavə və dəyişikliklər barədə müfəssəl bilgi verildiyindən seçicilərin fəallığının yüksək olması hiss olunurdu.

Ayaq saxlayıb səsvermənin gedişini izləyirik. Hər şey normaldır. Komissiya üzvləri öz işlərini peşəkarçasına icra edirlər. Bundan əvvəl keçirilən prezident seçkilərinin müsbət iş təcrübəsi özünü göstərir. Səriştəlik, operativlik ardı-arası kəsilməyən seçicilərin vaxt itkisinə imkan vermir.

Səs verib məntəqədən çıxan bir neçə seçici ilə - Hacı Qərib Musayevlə, Əliheydər Əsədovla, Sabir Məmmədovla, Adıgözəl Yarməmmədovla söhbətdən məlum oldu ki, onlar səs vermək üçün yaradılan şəraitdən razıdırlar.

Məntəqənin sədri Əminağa İsparov isə bildirdi ki, səsvermə zamanı heç bir narahatlıq, narazılıq müşahidə olunmayıb. Saat 12-yəcən seçicilərin, demək olar ki, 30 faizi gəlib təklif olunan əlavə və dəyişikliklərə öz münasibətlərini bildirib. "Tərəqqi" təşviqat qrupunun üzvü Mehdi Kərimov da vətəndaşların fəallığını qeyd etdi. Xüsusən gənclərin daha aktiv olduğunu, onların səsvermədə mütəşəkkillik göstərdiklərini bildirdi.

67 saylı Cəlilabad şəhər seçki dairəsində işlər dəqiq qurulub. Məntəqələrdən verilən hesabatlar dərhal kompüter vasitəsi ilə internet şəbəkəsinə ötürülür. DSK-nın sədri Xandadaş Əliyev məlumat verib dedi ki, prezident seçkilərində olduğu kimi, referendumda da rayonumuzun seçiciləri fəallıq göstərirlər. Cəlilabad şəhəri üzrə 14 seçki məntəqəsi fəaliyyət göstərir. Məntəqələrin 8-də veb-kamera quraşdırılıb. Hamısında müşahidəçilər üçün normal şərait yaradılıb.

Kəndlərdə yerləşən secki məntəqələrində də referendum aktiv keçib. Rayonun ən böyük yaşayış məntəqələrindən olan Privolnoye kəndində yaşayan ruslarla azərbaycanlılar mehriban bir ailəni xatırladır. Bu səmimiyyəti Privolnoye kənd 6 saylı seçki məntəqəsində də hiss etdik. Seçicilər böyük həvəslə məntəqəyə gəlib təklif olunan əlavə və dəyişikliklərə münasibətlərini bildirirdilər. Kənd 1 saylı uşaq bağçasının müdiri, əməkdar mədəniyyət işcisi, "Ruçye" rus folklor ansamblının solisti və bədii rəhbəri Lübov Danilova:

- Biz əlamətdar günləri əsl bayram kimi qeyd edirik. Bu gün isə bizimçün ikiqat bayramdır. Privolnoyelilər prezident seçkilərində olduğu kimi, referendumda da nümunə göstərməyə çalışır. Axşama hələ xeyli qalıb. Amma məntəqəmizdə səsvermə müvəffəqiyyətlə başa çatmaq üzrədir.

...Axşamüstü rayon mərkəzində olarkən öyrəndik ki, Cəlilabadda ümumxalq səsverməsi müvəffəqiyyətlə başa çatmaq üzrədir. Rayon üzrə 84 seçki məntəqəsində seçicilərin böyük əskəriyyəti yüksək vətəndaşlıq nümunəsi göstərərək öz iradələrini ifadə etmişlər.

Hacıqabul

58 saylı Hacıqabul-Kürdəmir dairə seçki komissiyasına Hacıqabul rayonunda 37 seçki məntəqəsi daxildir.

Dairə üzrə seçicilərin siyahısı artıq səsvermə proseslərinə hazırlıq dövründə tam dəqiqləşdirilmiş və qrafikə uyğun olaraq MSK-nın Seçkilər İnformasiya Mərkəzinə verilmişdir. Siyahıların dəqiqləşdirilməsi zamanı seçki dairəsi üzrə seçicilərin ümumi sayının 38 min 657 nəfər olduğu müəyyən edilmişdir. O cümlədən Hacıqabul rayonu üzrə səsvermə hüquqlu şəxslərin sayının 34 min 25 nəfər olması dəqiqləşdirilmişdir.

Seçki dairəsinin əhatə etdiyi bütün seçki məntəqələrində səs vermək üçün normal iş şəraiti yaradılmışdır. Hacıqabul rayonu ərazisində yerləşən bütün məntəqələr lazım olan telefon-rabitə, fasiləsiz enerji təminatı və digər kommunikasiya ilə təmin olunmuşdur. Həmçinin seçki praktikasının təkmilləşdirilməsi ilə əlaqədar olaraq rayon mərkəzində yerləşən 1, 2, 3, 4, 5, 10 və 11 saylı məntəqələrdə veb-kameralar quraşdırılmışdır.

Gündüz 12.00-a olan məlumata əsasən, şəhərin 1, 2, 4, 5, 10 və 11 saylı Muğan qəsəbə, 16 saylı Abdulyan kənd, 19 saylı Talış kənd seçki məntəqələrində seçicilərin 30 faizdən çoxu səsvermədə iştirak etmişdir.

Biləsuvar

66 saylı Biləsuvar seçki dairəsinin əhatə etdiyi 41 seçki məntəqəsində 40815 nəfər seçici qeydə alınıb. 2, 3, 4, 5, 6, 7, 8 saylı Biləsuvar şəhər, 21 saylı Nəsimi, 24 saylı Nərimankənd, 14 saylı Ağayrı, 40 saylı Əsgərabad, 35 saylı Əmənkənd kənd seçki məntəqələrində referendum daha böyük mütəşəkkilliklə keçdi.

3 saylı Biləsuvar şəhər seçki məntəqəsində də seçicilərə öz iradələrini sərbəst şəkildə bildirmələri üçün hər cür şərait yaradılmışdı. Saat 8.30-da məntəqəyə gəlmiş seçici Sahibəli Mirzəyevlə görüşdük. S.Mirzəyev dedi:

- Mən neçə illərdi ki, bu məntəqədə səs verirəm. Bu ilki referenduma hazırlıq yüksək səviyyədə təşkil olunmuşdu. Seçicilərin öz iradələrini sərbəst ifadə etmələri üçün heç bir problem yoxdur. Mən indicə bir seçici kimi səs verdim, referenduma çıxarılan məsələlərə münasibətimi bildirdim.

21 saylı Nəsimi seçki məntəqəsində saat 12 radələrində artıq seçicilərin 30 faizindən çoxu referendumda iştirak etmişdi. Onlardan biri - 70 yaşlı Hazarxan Əliyev idi:

- Referendumun gedişindən razıyam. Mən də, ailə üzvlərim də səs verdik.

Seçki məntəqələrində müxtəlif təşviqat qruplarını təmsil edən komissiya üzvləri də referendumun gedişindən razılıq etdilər. Şəhər 8 saylı seçki məntəqəsində onlardan biri - Vətəndaş Həmrəyliyi Partiyasından komissiya üzvü Anar Cəfərovun rəyini soruşduq.

- Mən bu məntəqədə Vətəndaş Həmrəyliyi Partiyasından üzv kimi iştirak edirəm. İndiyədək heç bir qanun pozuntusu qeydə alınmayıb.

Azərbaycan.-2009.-19 mart.-S. 8-9.