Referendumun gedişini internetdən birbaşa izləmək mümkün idi

Azərbaycanda ilk dəfə 2008-ci ilin prezident seçkilərində səsvermənin internet vasitəsilə birbaşa izlənməsi təcrübəsi sınaqdan uğurla çıxdı. O zaman təxminən 80-dən artıq seçki dairəsini əhatə edən seçki məntəqələrinə quraşdırılan veb-kameralar vasitəsilə gün ərzində səsvermə məntəqəsində baş verən bütün prosesləri (səsvermə kabinəsində bülletenlərin doldurulması prosesi istisna olmaqla) Mərkəzi Seçki komissiyasının (MSK) internet saytından izləmək mümkün oldu.

Ötən ilin prezident seçkilərində olduğu kimi, dünən keçirilən referendumda da səsvermənin gedişinin müşahidə edilməsi, məntəqə seçki komissiyası üzvləri tərəfindən sənədlərlə işin aparılması, seçicilərə səsvermə günü zəruri şəraitin yaradılması, seçki bülletenlərinin seçki qutusuna salınması, səslərin sayılması, nəticələrin müəyyənləşdirilərək rəsmiləşdirilməsi prosesinin izlənilməsi və bununla da aşkarlığın daha geniş surətdə təmin edilməsi məqsədilə 500 seçki məntəqəsində veb-kamera quraşdırılmışdı.

Veb-kameralar MSK-nın sifarişi ilə Rabitə və İnformasiya Texnologiyaları Nazirliyi tərəfindən quraşdırılmışdı. Tələb olunan qaydada yerləşdirilən veb-kameralar səsvermə günü seçki məntəqələrinin açılması anından səsvermənin yekunlarının müəyyənləşdirilməsi və nəticələr haqqında protokolun doldurulmasınadək fasiləsiz fəaliyyət göstərdilər. Veb-kameralar vasitəsilə seçki məntəqələrindəki görüntülər (səsvermə kabinələri istisna olmaqla) birbaşa internetə ötürüldü.

Qeyd edək ki, veb-kameralarla əldə edilən videogörüntülər mərkəzləşdirilmiş qaydada yazılır. Bu görüntülər şikayətlərin araşdırılması zamanı da sübut kimi istifadə edilə bilər. Kameraları quraşdıran Rabitə və İnformasiya Texnologiyaları Nazirliyi həmin videogörüntülərin saxlanılmasını təmin edir.

Azərbaycan.-2009.-19 mart.-S.10.