Beynəlxalq müşahidəçilər ümumxalq səsverməsi prosesinin gedişindən tam razıdırlar, referendumun açıq və şəffaf keçirildiyini bəyan edirlər

Avropa ölkələrinin parlament nümayəndələrindən ibarət beynəlxalq qrup Azərbaycan Respublikası Konstitusiyasına əlavələr və dəyişikliklərlə bağlı martın 18-də keçirilmiş ümumxalq səsverməsində (referendum) apardıqları müşahidənin nəticələri ilə əlaqədar "Hyatt Park" mehmanxanasında mətbuat konfransı keçirmişdir.

Tədbirdə Azərbaycan Milli Məclisi tərəfindən dəvət olunmuş və Avropanın 6 ölkəsini (İspaniya, Böyük Britaniya, Belçika, Fransa, Estoniya və Finlandiya) təmsil edən 20 nəfərlik qrupun üzvləri adından Belçika parlamentinin deputatı, bu ölkənin Avropa Şurası Parlament Assambleyasında nümayəndə heyətinin üzvü Alan Deştex Azərbaycanda referendumun beynəlxalq demokratik standartlara cavab verdiyini, fəal, sakit və peşəkarlıqla keçirildiyini bildirmişdir. Beynəlxalq müşahidəçilər onların səfər etdikləri bütün seçki məntəqələrində səsvermə prosesinin yaxşı keçirildiyini və qanun pozuntusu hallarının müşahidə olunmadığını diqqətə çatdırmışlar.

Mətbuat konfransında müşahidəçi qrupunun referendumla bağlı bəyanatı oxunmuşdur.

Bəyanatda deyilir ki, seçki məntəqələrinə giriş sərbəst olmuş və seçicilər bütün sualları ayrı-ayrılıqda cavablandırmaq imkanına malik idilər. Səsvermə prosesi zamanı gecikdirmə və mümkün problemlərin qarşısını almaq üçün kifayət qədər heyət və seçki qutuları var idi. Səslərin hesablanması açıq, şəffaf şəkildə aparılmış və heç bir problem aşkar edilməmişdir.

Müşahidəçi qrupu belə bir nəticəyə gəlmişdir ki, referendumun nəticəsi Azərbaycan xalqının iradəsini tam əks etdirir. Bu referendum Azərbaycanın mürəkkəb regionda inkişaf edən, sabit və dinc ölkə kimi mövqeyini möhkəmləndirir.

Bəyanatın sonunda beynəlxalq müşahidəçilər bu missiyaya edilən köməyə görə Milli Məclisə və Mərkəzi Seçki Komissiyasına təşəkkürlərini bildirmişlər.

AzərTAc

Azərbaycan.-2009.-20 mart.-S.3.