Biz ümummilli liderin yolunu davam etdiririk

"İRƏLİ" İctimai Birliyi müstəqil Azərbaycan dövlətinin qurucusu, ümummilli lider Heydər Əliyevin anadan olmasının 86-cı ildönümü münasibətilə "Heydər Əliyev həftəsi" elan etmişdir. Həftə çərçivəsində ilk tədbir Bakı Slavyan Universitetində keçirilmişdir. Universitetin akt salonunda "Öndərimizin yolu ilə gedirik" mövzusunda interaktiv mühazirələr oxunmuşdur.

BSU-nun rektoru, professor Kamal Abdullayev bildirmişdir ki, müasir müstəqil Azərbaycan dövlətinin yaradılmasında və inkişafında dahi Heydər Əliyevin rolu və xidmətləri əvəzsizdir. Bu mövzunun mütəmadi və tam işıqlandırılması üçün BSU-da "Heydər Əliyev məktəbi" tələbə teleradio studiyası fəaliyyət göstərir. K.Abdullayev demişdir: "Bugünkü mühazirələr dinləyicilərin böyük marağına səbəb olacaqdır".

Milli Məclisin İqtisadi siyasət komitəsinin sədri, akademik Ziyad Səmədzadə "Heydər Əliyev - liderlikdən ümummilli liderliyə gedən yol" mövzusunda mühazirə oxumuşdur. O demişdir: "Hər bir dövlətin öz lideri var, lakin onların heç də hamısı ümummilli lider səviyyəsinə yüksələrək, öz ölkəsinin tarixində Heydər Əliyev kimi yer tuta bilməmişdir".

Z.Səmədzadə bildirmişdir ki, "Azərbaycan iqtisadiyyatı XX əsrdə" adlı nəşrə hazırlanan kitabda Heydər Əliyevin Azərbaycan iqtisadiyyatının inkişafında rolu və xidmətləri barədə ətraflı söhbət açılır. Qeyd olunur ki, ulu öndərin səyləri sayəsində ölkəmiz keçmiş SSRİ respublikaları iqtisadiyyatlarının reytinqindəki 15-ci yerdən ön sıralara yüksəlmiş və iqtisadiyyatını inkişaf etdirmişdir.

Sonra Milli Məclisin deputatı Məlahət Həsənovanın "Heydər Əliyev haqqında bilmədiklərimiz", Yeni Azərbaycan Partiyası Gənclər Birliyinin sədri Ramil Həsənovun "Heydər Əliyev - gənclərin xatirələri" mövzularında məruzələri dinlənilmişdir.

Tədbirdə Bakının Nəsimi Rayon İcra Hakimiyyətinin başçısı Nəsib Məhəməliyev iştirak etmişdir.

AzərTAc

Azərbaycan.-2009.-5 may.-S.5.