Uşaqları yeni tamaşalarla sevindiririk

Salyan Dövlət Kukla Teatrında uşaqlar üçün maraqlı, baxımlı tamaşalar hazırlanır. Onlardan Tofiq Kərimin "Meşədə əhvalat", Sevinc Nuruqızının "Gəlinciklər", Rafiq Mirzənin "Yetim Fatma", Firudin Ağayevin "Cırtdan və Sehirbaz", Abdulla Şaiqin "Danışan kukla", Təzahür Mehdiyevin "Keçəlin toyu" və başqa səhnə nümunələrini göstərmək olar.

Bu günlərdə "Uşaq ili" ilə əlaqədar daha yeni bir tamaşa uşaqların ixtiyarına verilmişdir. Rəhman Əlizadənin Mədəniyyət və Turizm Nazirliyinin sifarişi ilə hazırlanan "Tülkünün uçuşu" tamaşasına ictimai baxış keçirilmişdir. Baxışda teatrın şura üzvləri, Mədəniyyət və Turizm Nazirliyinin və Salyan Rayon İcra Hakimiyyətinin əməkdaşları iştirak etmişlər.

Tamaşanın rejissoru Cahangir Qaraşov, quruluşçu rəssamı Ceyhun Rüstəmbəyli, musiqi tərtibatçısı Təzahür Mehdiyevdir. Əsas rollarda Mədinə Ramazanova, Maytab Gözəlova, Rauf Həsənov, Əlizamin Həsənli, Elmir Muradov, Aygül Muradova, Leyla Vəliyeva iştirak edirlər.

Ümumiyyətlə, Salyan Dövlət Kukla Teatrının yaradıcı heyəti "Uşaq ili" ilə əlaqədar rəngarəng tədbirlər həyata keçirir. Rayonun məktəblərində çıxışlar etməklə yanaşı, qonşu Biləsuvar və Cəlilabad rayonlarında da qastrol tamaşaları göstərirlər.

Yavər Cəbrayılov,

Salyan Dövlət Kukla

Teatrının direktoru

Azərbaycan.-2009.-5 may.-S.8.