Konstitusiya Məhkəməsində xalq yazıçısı Anarla görüş

Mayın 6-da Konstitusiya Məhkəməsində Azərbaycan Yazıçılar Birliyinin (AYB) sədri, xalq yazıçısı Anarla görüş keçirilmişdir.

Tədbiri giriş sözü ilə açan Konstitusiya Məhkəməsinin sədri Fərhad Abdullayev qurumda ölkənin tanınmış şəxsləri ilə görüşlərin artıq ənənə halını aldığını və AYB-nin sədri, xalq yazıçısı, Dövlət mükafatı laureatı, dramaturq Anarın bu gün Konstitusiya Məhkəməsi kollektivinin qonağı olduğunu diqqətə çatdırmışdır. Görkəmli yazıçının yaradıcılığı barədə qısa məlumat verən Fərhad Abdullayev demişdir ki, əsərləri dünyanın bir çox ölkələrində çap edilmiş, haqqında tanınmış tədqiqatçıların fikir söylədiyi xalq yazıçısı Anar bir çox romanların, "Torpaq. Dəniz. Od. Səma", "Gün keçdi", "Dədə Qorqud", "Qəm pəncərəsi", "Təhminə" və digər filmlərin ssenari müəllifidir. Onun ssenariləri əsasında televiziya, sənədli və cizgi filmləri çəkilmişdir. Xalq yazıçısının 10-a yaxın pyesi təkcə Azərbaycan teatr səhnəsində deyil, eləcə də bir çox xarici ölkələrdə tamaşaya qoyulmuşdur.

Xalqımızın ümummilli lideri Heydər Əliyevin anadan olmasının 86-cı ildönümü ilə bağlı hazırda Azərbaycanın bütün bölgələrində ulu öndərin xatirəsinə həsr olunmuş tədbirlərin keçirildiyini söyləyən Konstitusiya Məhkəməsinin sədri bu günlərdə xalq yazıçısı Anarın görkəmli dövlət xadimi Heydər Əliyevə həsr olunmuş "Unudulmaz görüşlər" kitabının çapdan çıxdığını da vurğulamışdır.

AYB-nin sədri Anar rəhbərlik etdiyi qurum barədə danışmış və memuar janrında yazılmış yeni kitabı barədə ətraflı məlumat vermişdir. Qeyd etmişdir ki, kitabda ulu öndər Heydər Əliyevlə görüşlər, mükalimələr, yazıçıların qurultaylarındakı çıxışlar, ədəbi mübahisələr və s. öz əksini tapmışdır. Yazıçı bildirmişdir ki, kitabda heç bir mübaliğə yoxdur. Ümummilli liderin ədəbiyyat və incəsənət adamlarına diqqət və qayğısı, yazıçılara həssaslığı hamıya bəlli idi. Heydər Əliyevin yaradıcı insanlara xeyirxah münasibəti onların istedadının məhsulu olan neçə-neçə əsərin, yüksək sənət nümunəsinin taleyində həlledici rol oynamışdır. İkinci dəfə hakimiyyətə qayıtdıqdan sonra da bu dahi şəxsiyyət sənət adamlarından qayğısını əsirgəməmişdir. Bütün bu faktları mən olduğu kimi kitabda əks etdirməyə çalışmışam. Ümummilli lider Heydər Əliyevin yaradıcı adamlara diqqət və qayğısı hazırda Prezident İlham Əliyev tərəfindən uğurla davam etdirilir.

Tədbirdə çıxış edənlər görkəmli yazıçının yaradıcılığı haqqında fikirlərini söyləmiş, onun müasir Azərbaycan ədəbiyyatında özünəməxsus yer tutduğunu bildirmişlər. Çox səmimi yazılmış "Unudulmaz görüşlər" kitabının müasir gənclik üçün maraqlı olacağı qeyd edilmişdir. Diqqətə çatdırılmışdır ki, ulu öndər Heydər Əliyevlə eyni dövrdə, birlikdə çalışmış nəslin nümayəndələri xoşbəxtdir.

Xalq yazıçısı Anar iştirakçıları maraqlandıran sualları cavablandırmış və tədbirin təşkilatçılarına minnətdarlığını bildirmişdir.

AzərTAc

Azərbaycan.-2009.-7 may.-S.5.