Heydər Əliyevin anadan olmasının 86-cı ildönümü İstanbulda qeyd olunmuşdur

AzərTAc-ın xüsusi müxbiri xəbər verir ki, ulu öndər Heydər Əliyevin anadan olmasının 86-cı ildönümü münasibətilə İstanbuldakı Sarıyer rayonundakı Heydər Əliyev parkında mərasim keçirilmişdir.

Mərasimdə iştirak edən Azərbaycan Prezidenti Administrasiyasının İctimai-siyasi məsələlər şöbəsinin müdiri Əli Həsənov, ölkəmizin İstanbuldakı baş konsulu Səyyad Salahlı, Sarıyer bələdiyyəsinin sədri Şükrü Gənc, iş adamı Ərdal Aksoy, hər iki ölkənin ziyalıları, mətbuat nümayəndələri və burada yaşayan azərbaycanlılar ümummilli liderimizin abidəsinin önünə tər çiçəklər düzmüşlər.

Azərbaycan və Türkiyənin dövlət himnləri səslənmişdir.

Prezident Administrasiyasının şöbə müdiri Əli Həsənov mərasimdə çıxış edərək bildirmişdir ki, Azərbaycan xalqı qarşısında müstəsna xidmətləri olan dahi şəxsiyyət Heydər Əliyevin zəngin dövlətçilik təcrübəsi və uzaqgörən siyasəti nəticəsində Azərbaycanın müstəqilliyi qorunmuş, möhkəmlənmiş və dönməz xarakter almışdır. Bugünkü güclü və gündən-günə tərəqqi edən Azərbaycan dövləti ulu öndərin şah əsəridir. Heydər Əliyevin möhkəm siyasi iradəsi nəticəsində həyata keçirilən və bu gün uğurla fəaliyyət göstərən Bakı-Tbilisi-Ceyhan neft kəməri layihəsi neft tankerləri üzündən təhlükə yaşayan İstanbul şəhərini də xilas etmişdir.

Mərasimdən sonra Azərbaycan və Türkiyənin incəsənət ustalarının, folklor qruplarının konserti olmuşdur.

Azərbaycan.-2009.-8 may.-S.2.