Prezident İlham Əliyev Bakının Yasamal rayonundakı İzmir parkının əsaslı təmir və yenidənqurmadan sonrakı vəziyyəti ilə tanış olmuşdur

Azərbaycan Prezidenti İlham Əliyev mayın 10-da paytaxtın Yasamal rayonundakı İzmir parkına gələrək bu istirahət guşəsinin əsaslı təmir və yenidənqurmadan sonrakı vəziyyəti ilə tanış olmuşdur.

Dövlətimizin başçısı xanımı Mehriban Əliyeva və qızları ilə birlikdə parkı gəzdi.

Prezident İlham Əliyevə parkda aparılmış əsaslı təmir və yenidənqurma işləri barədə ətraflı məlumat verildi.

Bildirildi ki, sakinlərin istirahəti üçün yararsız vəziyyətdə olan park dövlətimizin başçısının Bakı şəhərində park və xiyabanların əsaslı təmiri və yenidən qurulması ilə bağlı tapşırıqlarına əsasən abadlaşdırılmışdır. Bu ilin fevralında başlanılmış yenidənqurma işləri qısa vaxtda yüksək keyfiyyətlə başa çatdırılmışdır. İndi İzmir parkı paytaxtımızın bu hissəsinə xüsusi yaraşıq verir.

Bir hektara yaxın ərazini əhatə edən parkda hündürlüyü 8 metr, diametri 14 metr, çəkisi 10 ton olan qranit daşdan və çuqundan hazırlanmış yeni müasir fəvvarə quraşdırılmışdır. Beş iş rejimi olan fəvvarə 300 lampa ilə işıqlandırılmışdır.

Parkın ərazisinə Hindistanda istehsal olunmuş təbii daşlar və plitələr döşənmişdir. Ərazidə Belçika və İtaliyadan gətirilmiş müxtəlif ağaclar və gül kolları, o cümlədən taksus, banzay və sərv ağacları, qızılgüllər, azaliyalar və digər dekorativ bitkilər əkilmiş, yaşıllıq salınmışdır. Axşam saatlarında bu ağacların hamısı işıqlandırılır. Yaşıllaşdırılmış ərazidə avtomatik suvarma sistemi quraşdırılmışdır. Parkın xarici divarları Abşeron daşından, istinad divarları isə xaricdən gətirilən travertin və mərmərdən inşa olunmuşdur.

Ərazidə yeni yollar və cığırlar salınmış, daş heykəlciklər qoyulmuşdur.

Müasir tələblər səviyyəsində qurulan parkın işıqlandırma sistemi Almaniya istehsalı olan yüksək keyfiyyətli avadanlıqdan yığılmışdır. Ərazidə 85 orijinal çıraq quraşdırılmış, 85 rahat oturacaq qoyulmuşdur.

Dövlətimizin başçısı parkda görülmüş əsaslı təmir və yenidənqurma işlərindən razı qalmışdır.

AzərTAc

Azərbaycan.-2009.-13 may.-S.3.