Türkiyə-Azərbaycan dostluğu daimidir

Mayın 12-də Milli Məclisin Sədri Oqtay Əsədov Türkiyə Ali Məhkəməsinin sədri Hasan Gerçəkərin başçılıq etdiyi nümayəndə heyəti ilə görüşmüşdür.

Səmimilik şəraitində keçən söhbət əsnasında qeyd edildi ki, bu cür səfərlər dost və qardaş olan ölkələrimiz arasında münasibətlərin daha da inkişaf etməsinə xidmət edir. Bildirildi ki, dövlət başçılarının qarşılıqlı səfərləri zamanı aparılan danışıqlar və imzalanmış sənədlər dərin tarixi köklərlə bir-birinə bağlı olan ölkələrimiz və xalqlarımız arasında əlaqələrin hüquqi bazasının möhkəmlənməsi, qarşılıqlı faydalı əməkdaşlığın daha da dərinləşməsi üçün yaxşı zəmin yaratmışdır.

Parlamentin Sədri xüsusi vurğuladı ki, ümummilli lider Heydər Əliyevin məqsədyönlü siyasəti sayəsində Azərbaycanda demokratik hüquqi dövlət qurulmuş, ölkədə hüquq sisteminin inkişafı üçün lazımi şərait yaradılmışdır. Aparılan islahatlar nəticəsində Azərbaycanda yeni məhkəmə sistemi qurulmuş, qısa müddət ərzində beynəlxalq standartlara cavab verən qanunlar qəbul edilmişdir. Milli Məclisin Sədri qonaqların Azərbaycan Ali Məhkəməsinin yeni inzibati binasının açılış mərasimində iştirakını dövlətçilik sistemində mühüm yer tutan iki qurum arasında əməkdaşlığın inkişafı baxımından yüksək qiymətləndirdi.

Müstəqil Azərbaycanın Ali Məhkəməsinin yeni inzibati binasının açılış mərasiminə dəvət olunduqları üçün təşəkkürünü bildirərək Türkiyə Ali Məhkəməsinin sədri bu mötəbər tədbirdə iştirakdan məmnun qaldıqlarını söyləyərək dedi: "Biz həmişə Azərbaycanın yanında olmaqla fərəh hissi keçirir və belə dostluq, qardaşlıq münasibətlərimizlə qürur duyuruq".

Qəbulda bildirildi ki, Türkiyə-Azərbaycan əlaqələri daimidir, bu əlaqələrin daha da inkişafı və möhkəmlənməsi üçün gələcəkdə də bütün imkanlardan istifadə ediləcəkdir.

Söhbətdə parlamentlərarası əlaqələr və tərəfləri maraqlandıran digər aktual məsələlər barədə də ətraflı fikir mübadiləsi aparıldı.

Görüşdə Milli Məclis Aparatının rəhbəri Səfa Mirzəyev, Türkiyənin Azərbaycandakı səfiri Hulusi Kılıc iştirak edirdilər.

Milli Məclisin

mətbuat xidməti

Azərbaycan.-2009.-13 may.-S.7.