Daxili İşlər Nazirliyində Qələbə Günü münasibətilə veteranlarla görüş keçirilmişdir

Nazirliyin mətbuat xidmətindən bildirmişlər ki, mərasimi daxili işlər naziri, general-polkovnik Ramil Usubov açaraq bütün tərəqqipərvər bəşəriyyətin faşizm üzərində Qələbənin 64-cü ildönümünü böyük təntənə ilə qeyd etdiyini bildirmişdir. Yaxın keçmişimizə nəzər salan nazir ötən əsrin 90-cı illərinin əvvəllərində müharibə veteranlarının şərəfli fəaliyyətinə, ümumbəşəri ideallar uğrunda mübarizəsinə qeyri-sağlam, laqeyd münasibətin mövcudluğunu təəssüflə xatırlatmış, məhz ulu öndərimiz Heydər Əliyevin ali hakimiyyətə tarixi qayıdışından sonra faşizm üzərində qələbənin təntənəli şəkildə qeyd edildiyini, cəmiyyətin ən dəyərli üzvləri kimi veteranlarımıza diqqət və qayğının artırıldığını, 9 May - Qələbə Gününün müstəqil Azərbaycanda dövlət səviyyəsində keçirilən bayramlar sırasına daxil olunduğunu məmnunluqla vurğulamışdır. Ümummilli liderimizin siyasi kursunun layiqli davamçısı Prezident İlham Əliyevin də Böyük Vətən müharibəsinin iştirakçılarına göstərdiyi diqqət və qayğını nəzərə çatdıran Ramil Usubov bu kateqoriyadan olanların ehtiyacları ilə maraqlanmağın, problemlərinin həllinin Daxili İşlər Nazirliyinin də mənəvi borcu olduğunu, bu istiqamətdə bir sıra işlər görüldüyünü demiş, ulu öndərimizin əsasını qoyduğu siyasətin davamlı olacağını bildirmişdir.

DİN Mərkəzi Aparatı Veteranlar Şurasının sədri Bəylər Hüseynov, 1941-1945-ci illər müharibəsinin iştirakçıları olan polis veteranları Zilli Namazov, Müseyib İlyasov, Şıxnəbi Şıxnəbiyev, Mirdaməd Seyidov, Lidiya Sevryugina və başqaları çıxış edərək keçdikləri zəngin döyüş və həyat yolu barədə danışmış, bu görüşə və ümumilikdə veteranlara göstərilən diqqət və qayğıya görə ölkəmizin rəhbərliyinə minnətdarlıqlarını bildirmişlər.

Təntənəli mərasimə yekun vuran nazir Ramil Usubov əlamətdar bayram münasibətilə müharibə veteranlarını və onların ailə üzvlərini ürəkdən təbrik etmiş, onlara cansağlığı arzulamışdır.

Mərasim iştirakçılarına mövcud kriminogen durum barədə qısa məlumat verən nazir ölkəmizdə əmin-amanlığın, ictimai asayişin nümunəvi qorunması üçün hüquq- mühafizə, o cümlədən daxili işlər orqanlarının əməkdaşları tərəfindən bütün zəruri tədbirlərin görüldüyünü vurğulamış, sabitliyin dönməzliyinin təmini, cinayətkarlıqla qətiyyətli mübarizə sahəsində müsbət nəticələrin qazanıldığını, şəxsi heyətin gərgin, fədakar əməyinin dövlətimizin başçısı tərəfindən daim yüksək qiymətləndirildiyini qeyd etmişdir.

Son illər Prezidentimizin rəhbərliyi ilə cəmiyyət həyatının bütün sahələrində geniş quruculuq işlərinin getdiyini, hüquqi-demokratik islahatların həyata keçirildiyini, Azərbaycanın dünya birliyində öz layiqli yerini tutduğunu və bölgədə lider dövlətə çevrildiyini məmnunluqla xatırladan nazir Ramil Usubov iqtisadi qüdrətimizin daha da artması üçün ölkəmizdə sabitliyin, əmin-amanlığın qorunub saxlanılmasının əsas şərtlərdən biri olması barədə ölkə Prezidentinin dəfələrlə vurğuladığı fikri tədbir iştirakçılarının diqqətinə çatdırmış, Ali Baş Komandanın daimi diqqət və qayğısı ilə əhatə olunmuş daxili işlər orqanlarının qarşıya qoyulmuş bütün məsul vəzifələrin öhdəsindən bundan sonra da layiqincə gələcəyinə, dövlətə və xalqa sədaqətlə xidmət edəcəyinə əminliyini vurğulamışdır.

AzərTAc

Azərbaycan.-2009.-13 may.-S.15.