“Şuşa Azərbaycanın mədəniyyət və tarix incisidir” mövzusunda konfrans

Mayın 8-də R.Behbudov adına Dövlət Mahnı Teatrında “Şuşa Azərbaycanın mədəniyyət və tarix incisidr” mövzusunda elmi konfrans keçirildi.

Konfransı açan Şuşa rayon Mədəniyyət və Turizm şöbəsinin müdiri Zahid Abbasov “Şuşa şəhərinin tarixi və memarlığı” mövzusunda çıxış etdi.

Bakı Musiqi Akademiyasının rektoru Fərhad Bədəlbəyli “Şuşa şəhərinin musiqisi” mövzusunda fikirlərini tədbir iştirakçıları ilə bölüşərək bildirdi: “Bəllidir ki, Şuşa Azərbaycan musiqisinin vətənidir. Şuşasız Azərbaycan mədəniyyətini təsəvvür etmək olmaz.

Bir-iki il əvvəl Şuşaya gedəndə məni çoxları qınamışdı. Amma mən ora gedəndə gördüm ki, burada heç bir tikinti, inkişaf getməyib. Şuşa müharibə zamanı necə idisə, elə də qalıb. Orada bir erməni qadını ilə rastlaşdıq. Onun gözlərində qorxudan başqa heç nə yox idi. O da başqa ermənilər kimi bilir ki, bir gün azərbaycanlılar Şuşaya mutləq qayıdacaqlar. Mən bu gün optimist hisslərlə bura gəlmişəm. İnanıram ki, biz Cıdır düzündə çox gözəl konsert verəcəyik”.

Konfransda sənətşünaslıq elmləri doktoru, professor Röya Tağıyeva “Şüşanın sənət inciləri”, AMEA-nın müxbir üzvü Cəfər Qiyasi “Şuşanın tarixi abidələri” mövzusunda çıxış etdilər.

Konfransda erməni işğalçıları tərəfindən Şuşanın dağıdılmış tarixi memarlıq abidələri haqqında sənədli film nümayiş olundu və Şuşa rayon Mədəniyyət və Turizm şöbəsinin hazırladığı xüsusi kompozisiya səsləndi.

Tədbirdə Mədəniyyət və Turizm Nazirliyinin aparat rəhbəri Firudun Qurbanov, nazirlik əməkdaşları, mədəniyyət və incəsənət xadimləri də iştirak edirdilər.

Mədəniyyət. - 2009.- 9 may.- S. 2.