Heydər Əliyev Fondunun prezidenti, YUNESKO-nun xoşməramlı
səfiri Mehriban Əliyevanın çıxışı
- Hörmətli dostlar!
Ötən il Heydər Əliyev Fondu üçün dinamik və məhsuldar olmuşdur. Mədəniyyət, təhsil və sosial sahələrdə bir sıra böyük layihələr uğurla həyata keçirilmişdir. Bir neçə gün bundan öncə, biz Heydər Əliyev Fondunun beş illiyini qeyd etdik. Bu münasibətlə biz beş il ərzində fond tərəfindən görülən işləri əks etdirən kitab nəşr etmişik. Kitab Heydər Əliyev Fondunun məqsədlərini açıqlayır və həyata keçirilmiş layihələr haqqında ətraflı məlumat verir. Bu gün həmin kitabın nüsxələri sizə paylanıb, zənnimcə, bizim qeyri-hökumət təşkilatı kimi əldə etdiyimiz nailiyyətlər haqqında məlumatlarla tanış olmaq sizin üçün maraqlı olacaqdır. Təhsil, səhiyyə və mədəniyyət sahələrində son beş il ərzində gördüyümüz işlər Heydər Əliyev Fonduna həm Azərbaycanda, həm də beynəlxalq ictimaiyyət arasında hörmət və ehtiram qazandırmışdır. Təqdirəlayiq haldır ki, Heydər Əliyev Fondu və Azərbaycan Mədəniyyətinin Dostları Fondu YUNESKO kimi nüfuzlu beynəlxalq təşkilatla sıx əməkdaşlıq etmişdir.
Ötən görüşümüzdən sonra həyata keçirdiyimiz bir sıra birgə layihələr haqqında məlumat vermək istərdim. Cənab Matsuuranın qeyd etdiyi kimi, birinci Beynəlxalq Muğam Festivalı Heydər Əliyev Fondunun dəstəyi ilə mart ayında Bakıda keçirilmişdir. Beynəlxalq Muğam Mərkəzi rəsmən açılmışdır. Bu mərkəzin tikintisinə 2005-ci ilin avqust ayında başlanmış və cənab Matsuura təməlqoyma mərasimində iştirak etmişdir. Söz verdiyi kimi, o, mart ayında Beynəlxalq Muğam Festivalının açılışında da iştirak etmişdir. Bakıdakı birinci Beynəlxalq Muğam Festivalı əlamətdar hadisə idi və muğam daha geniş auditoriyaya təqdim edildi. Muğam festivalı 14 ölkədən ifaçıları bir araya gətirdi. Beynəlxalq ictimaiyyətin bu tədbirə böyük marağı onun gözəl perspektivlərə malik olduğuna dəlalət edir. Bu səbəbdən biz festivalı hər iki ildən bir keçirmək qərarına gəldik.
Heydər Əliyev
Fondu digər xalqların da mədəni irsinin qorunmasına
yardım etməyi arzulayır və böyük məmnuniyyətlə
qeyd etmək istəyirəm ki, Afrika dövlətlərinin
qeyri-maddi mədəni irsinin qorunması layihəsinə maliyyə
yardımı göstərməyə hazırdır. Dörd ay üçün nəzərdə
tutulmuş bu layihə Afrika dövlətlərindən 26
mütəxəssisi mədəni irsin qorunması sahəsində
formalaşdırmaq məqsədi daşıyır. Onlar Afrika
dövləti Benində yerləşən məktəbdə
kurslara gedəcəklər. Bu məktəb Afrikanın 6
dövləti üçün mütəxəssislər
hazırlamaq məqsədi ilə regional təhsil-tədqiqat mərkəzi
kimi 1998-ci ildə yaradılmışdır. Layihənin məqsədi
Afrikanın mədəni irsinin qorunması və təşviqi
sahəsində bacarıqlı mütəxəssislər
hazırlamaqdan ibarətdir. Bundan başqa, layihə Afrika
ölkələri arasında bu sahədə əməkdaşlıq
və təcrübə mübadiləsinə xidmət edir. Əminəm
ki, Heydər Əliyev Fondu onun uğurlu olmasına dəyərli
töhfə verəcəkdir.
Hörmətli həmkarlar!
Artıq beş il ərzində
YUNESKO-nun xoşməramlı səfiri kimi, fəaliyyətimə
əsaslanaraq bildirmək istəyirəm ki, YUNESKO ailəsinin
üzvü olmaqdan böyük şərəf hissi duyuram.
Eyni zamanda, bildirmək istəyirəm ki, bu illər ərzində
sizinlə işləyərək göstərdiyimiz səylər,
əldə etdiyimiz nailiyyətlər şəxsi həyatımın
və peşə fəaliyyətimin ayrılmaz hissəsinə
çevrilmişdir. Burada bacarıqlı, istedadlı və
çox yaxşı insanlarla, dostlarla tanış olduğuma
görə YUNESKO-ya olduqca minnətdaram. Onlar nə isə etməyə,
dəyişməyə və ya kiməsə yardım etməyə,
ehtiyacı olanları dinləməyə və köməyə
hazır olan şəxslərdir.
Yekun olaraq burada gözəl
mühit yaratdığına görə YUNESKO-nun baş
direktoru cənab Matsuuraya dərin təşəkkürümü
bildirmək istəyirəm. Eyni zamanda, YUNESKO
ideallarının, prinsiplərinin həyata keçirilməsində
göstərdiyi şəxsi səylərinə görə
ona minnətdaram. Hamınızın adından humanizm
ideallarına sadiqliyinə görə cənab Matsuuraya təşəkkürümü
bildirmək istəyirəm. Sizə gələcəkdə
uğurlar və xoşbəxtlik arzulayıram. Diqqətinizə
görə minnətdaram.
YUNESKO-nun xoşməramlı səfirləri
- İordaniya şahzadəsi xanım Ferial, Litva Prezidenti Valdas
Adamkus, Kamerunun birinci xanımı Şantal Biya
çıxış edərək öz ölkələrində
gördükləri işlər barədə məlumat verdilər,
dünyada təhsil, səhiyyə sahələrində problemlərin
aradan qaldırılması istiqamətində səylərin
artırılmasının vacibliyini vurğuladılar.
Xoşməramlı səfirlər dünyanın
münaqişələrdən əziyyət çəkən
bölgələrində təhsil, səhiyyə və mədəni
irsin qorunması ilə bağlı layihələrin həyata
keçirilməsi, bu istiqamətdə fəaliyyətin daha da
gücləndirilməsi təşəbbüsünə
qoşulduqlarını bəyan etmişlər.
YUNESKO-nun xoşməramlı səfiri
Marianna Vardinoyannis səhiyyə sahəsində görülən
işlərə diqqət çəkdi. O, ölkəsində
- Yunanıstanda onkoloji xəstəliklərdən əziyyət
çəkən uşaqlar üçün yaradılan şərait
və onlara qayğı layihələrindən bəhs etdi.
Prezident İlham Əliyevin bu ilin əvvəlində
Yunanıstana dövlət səfəri zamanı Azərbaycanın
birinci xanımı Mehriban Əliyevanın həmin
uşaqları ziyarət etdiyini, onların valideynləri ilə
görüşdüyünü diqqətə
çatdırdı.
Toplantının sonunda xoşməramlı
səfirlər xatirə şəkli çəkdirdilər.
Yeri gəlmişkən qeyd edək
ki, YUNESKO-nun nəşrlərində ölkəmiz və Azərbaycanın
birinci xanımı, xoşməramlı səfir Mehriban Əliyevanın
fəaliyyəti haqqında geniş məlumatlar yer
almışdır. YUNESKO-da Azərbaycanla bağlı
keçirilən mərasimlər, ölkəmizin zəngin mədəniyyəti,
tarixi irsi haqqındakı bu nəşrlərdə
böyük Avropa ailəsinin üzvü olan respublikamızda
Heydər Əliyev Fondunun çoxşaxəli fəaliyyətindən,
həyata keçirdiyi layihələrdən və onların əhəmiyyətindən
söhbət açılır.
Toplantı başa çatandan
sonra YUNESKO-nun baş direktorunun adından xoşməramlı
səfirlərin şərəfinə verilən nahar
zamanı Koişiro Matsuuranın fəaliyyətindən, onun
ölkəmizə səfərlərindən bəhs edən
filmin nümayişi oldu. Heydər Əliyev Fondunun təqdim
etdiyi filmdə Koişiro Matsuuranın fəaliyyətinin
müxtəlif istiqamətlərinə nəzər
salınmış, YUNESKO-nun inkişafındakı xidmətləri
xüsusi vurğulanmışdır.
Filmin nümayişindən sonra
Koişiro Matsuura Mehriban xanım Əliyevaya təşəkkürünü
bildirdi.
Mehriban Əliyeva Heydər Əliyev
Fondunun hazırladığı filmin diskini Koişiro Matsuuraya
hədiyyə etdi.
Əsgər Əliyev,
AzərTAc-ın xüsusi müxbiri
Paris
Azərbaycan.-2009.-16 may.-S.2.