Dövlət Neft Akademiyasında törədilmiş qanlı faciə ilə əlaqədar başlanmış cinayət işi üzrə müvafiq tədbirlər davam etdirilir

Respublika Prokurorluğu və Daxili İşlər Nazirliyi mətbuat xidmətləri bildirmişlər ki, aprelin 30-da Dövlət Neft Akademiyasında silahlı şəxs tərəfindən adamların xüsusi amansızlıqla öldürülməsi faktı ilə əlaqədar başlanmış cinayət işi üzrə Respublika Prokurorluğunun və Daxili İşlər Nazirliyinin əməkdaşlarından ibarət istintaq-əməliyyat qrupu müvafiq tədbirləri davam etdirir.

Hadisənin şahidi olmuş Dövlət Neft Akademiyasının müəllim və tələbələri, o cümlədən Fərda Qədirovun Gürcüstandan Bakı şəhərinə gəldiyi avtobusun sürücüsü və sərnişinləri, paytaxtda olduğu müddətdə ünsiyyət saxladığı şəxslər, hərəkət marşrutu, yaşadığı binanın sakinləri və ətraf ərazilərdəki obyektlərdə işləyənlər dindirilmişlər. Həmçinin cinayətdə iştirakı ehtimal edilənlərin telefon danışıqları təhlil edilmiş, eləcə də onların mənzillərində, müxtəlif saxlanc yerlərində axtarışlar aparılmış, digər zəruri tədbirlər həyata keçirilmişdir.

Fərda Qədirovun cinayəti törətdiyi gün yaşadığı ünvandan Dövlət Neft Akademiyası istiqamətində keçdiyi yolu qeydə almış videokameraların görüntüləri, habelə onun hərəkət trayektoriyası öyrənilməkdədir.

Bununla bərabər, Fərda Qədirovun əvvəllər Rusiya və Gürcüstanda yaşaması baxımından əlaqələrinin müəyyənləşdirilməsi və iş üçün əhəmiyyət kəsb edən istintaq hərəkətlərinin aparılması məqsədi ilə istintaq qrupunun üzvləri həmin ölkələrə ezam olunmuşlar.

Gürcüstanın hüquq-mühafizə orqanları ilə birgə həyata keçirilmiş tədbirlər nəticəsində Fərda Qədirovun Daştəpə kəndində yaşadığı evdə aparılmış axtarış zamanı ona məxsus müxtəlif sənədlər, o cümlədən cinayətdə istifadə etdiyi tapançanı 2008-ci il oktyabrın 24-də "Kula ARMS Corciya" Məhdud Məsuliyyətli Cəmiyyətə məxsus Tbilisi şəhərindəki silah mağazasından alması barədə qəbz, 14 ədəd patron, güllə və giliz, hər biri 50 patron tutumu olan iki qutu, düyməli bıçaq, silah təmizləmək üçün ləvazimat, birdəfəlik istifadə üçün əlcəklər, habelə əlində silah tutduğu vəziyyətdə çəkilmiş üç fotoşəkil aşkar edilmişdir.

Fotoşəkillərdən ikisinin arxasında "24 fevralya 2009 q. Qadirov Farda Odinokiy Volk", digərində isə "U menya kajdıy şaq smert. 10 noyabrya 2008 q. Qadirov Farda" sözləri yazılmışdır.

Əşyaların içində, həmçinin müxtəlif telefon nömrələri olan qeydlər, 15 ədəd videokaset, üzərində rus dilində "Telefonun kamerasına bax, görərsən mən kiməm" yazısı olan kağız parçası, telefonunda isə "Mənim üçün məhəbbət yoxdur, yalnız nifrət var, Bakıya gəlirəm, qarşıma kim çıxsa, yaşına baxmadan bax belə vuracağam, polisə təslim olmayacağam, öldürməkdən həzz alacağam" deməsini, canavar maskası taxmasını və tapançadan atəş açmasını nümayiş etdirən videogörüntülər aşkar edilərək götürülmüşdür.

Gürcüstanın hüquq-mühafizə orqanlarının yaxından köməkliyi ilə davam etdirilən istintaq-əməliyyat tədbirləri nəticəsində Fərda Qədirovun 2008-ci ilin oktyabrında Rusiya Federasiyasından Daştəpə kəndinə qayıtdıqdan sonra oktyabr-noyabr aylarında 1961-ci il təvəllüdlü milliyyətcə erməni olan, lakin özünü gürcü kimi təqdim etmiş Gürcüstan vətəndaşı Qriqoryan Sergey Yeqoroviçlə telefon əlaqəsi yaradaraq mütəmadi görüşməsi, birlikdə silah mağazasından 500 lariyə "Makarov" tapançası və 200 lariyə 100 ədəd patron alması müəyyən edilmişdir.

Törədilmiş bu ağır cinayətlə Sergey Qriqoryanın əlaqəsinin olub-olmaması və tapançanın əldə olunmasının qanunauyğunluğunun müəyyənləşdirilməsi istiqamətində istintaq-əməliyyat tədbirləri aparılır. Eyni zamanda, Dövlət Sərhəd Xidməti ilə birlikdə həmin silahın dövlət sərhədindən Azərbaycana hansı yolla keçirilməsi faktı araşdırılır.

O da qeyd olunmalıdır ki, valideynlərinin və yaxınlarının Fərda Qədirovun meyitinin qəbulundan imtina etmələri səbəbindən cəsədi sahibsiz kimi torpağa tapşırılmışdır.

Ölkə rəhbərliyinin şəxsi nəzarətində olan cinayət işinin istintaqının tam, hərtərəfli və operativ araşdırılması üçün hüquq-mühafizə orqanları tərəfindən qısa müddətdə aşkarlanmış əhəmiyyətli maddi sübutlar, faktlar və başqa zəruri xüsusatlar barədə ictimaiyyət ətraflı məlumatlandırılsa da, təəssüf ki, müxalifət yönümlü ayrı-ayrı siyasi partiyaların nümayəndələri, onların mətbu orqanları və xaricdəki havadarları baş vermiş faciəli hadisədən öz çirkin siyasi məqsədləri üçün faydalanmağa yönələn cəhdlər edirlər.

Bunun üçün onlar müxtəlif ali məktəblərdə təhsil alan gənclər arasında həqiqətə uyğun olmayan, heç bir reallığa söykənməyən, yalnız ictimai-siyasi vəziyyəti gərginləşdirmək niyyəti güdən şayiələr yayır, vətəndaşları, hətta məktəbliləri belə aldatmağa, əsl həqiqətdən yayındırıb yanlış yola istiqamətləndirməyə səy göstərirlər.

Xalqın dövlətə, dövlətçiliyə, əmin-amanlığın dönməzliyinə olan inamını zəiflətmək üçün keçmişdə də çoxsaylı insan ölümü ilə nəticələnən cinayətlər törədilmiş, faciəli hadisələrdən istifadə etməyi özlərinə ar bilməyənlər isə bu günün özündə belə cəmiyyətin daim matəm içində yaşamasına, vətəndaşların gələcəyə ümidini itirməsinə çalışırlar.

Lakin şübhə yoxdur ki, xalq, o cümlədən Azərbaycanın gəncliyi sabaha nikbinliklə baxır və ölkənin daxilində, eləcə də xaricində olan heç bir qüvvənin öz məkrli niyyətini həyata keçirməsinə imkan verməyəcəkdir.

İctimai asayişin pozulmasına yönəlmiş hər bir cəhdin qarşısı qətiyyətlə alınacaq, onların təşkilatçıları və iştirakçıları barəsində lazımi tədbirlər görüləcəkdir.

Hazırda işin bütün hallarının araşdırılması istiqamətində zəruri istintaq hərəkətləri və əməliyyat-axtarış tədbirləri davam etdirilir.

AzərTAc

Azərbaycan.-2009.-16 may.-S.3.