Azərbaycanın baş prokuroru Türkiyə Ali Məhkəməsinin sədri ilə görüşmüşdür

Azərbaycanın baş prokuroru Zakir Qaralov ölkəmizdə səfərdə olan Türkiyə Ali Məhkəməsinin sədri Hasan Gerçəkərin rəhbərlik etdiyi nümayəndə heyəti ilə görüşmüşdür.

Prokurorluğun mətbuat xidmətindən bildirmişlər ki, Zakir Qaralov bu səfərin Azərbaycanın hüquq ictimaiyyəti üçün böyük maraq doğurduğunu diqqətə çatdırmışdır. Baş prokuror bu günlərdə Ali Məhkəmənin yeni inzibati binasının istifadəyə verilməsini əlamətdar hadisə kimi dəyərləndirmişdir.

Xalqlarımız arasında qədim köklərə söykənən münasibətlərin siyasi, iqtisadi, mədəni və digər sahələrdə müvəffəqiyyətlə inkişaf etdirildiyi, nəhəng enerji və nəqliyyat layihələrinin ölkələrimizi daha da yaxınlaşdıracağı, xalqlarımızın rifahına xidmət göstərəcəyi xüsusi vurğulanmışdır.

Baş prokuror ölkəmizin məhkəmə-hüquq sisteminin müasirləşdirilməsi istiqamətində Azərbaycan Prezidenti İlham Əliyev tərəfindən imzalanan mütərəqqi qanunvericilik aktlarının, o cümlədən prokurorluğun fəaliyyəti üçün zəruri hüquqi bazanın yaradılması, prokurorluq orqanlarında yeniləşmə prosesinin həyata keçirilməsi və köklü islahatların aparılması, eyni zamanda, kadr siyasətində ciddi dönüşün yaradılması və şəffaflığın təmin edilməsi, Dövlət İttihamının Müdafiəsi üzrə İdarənin yenidən qurulması, Baş prokuror yanında Korrupsiyaya Qarşı Mübarizə İdarəsinin fəaliyyəti, "İnsan hüquqlarının və əsas azadlıqlarının müdafiəsi haqqında" Avropa Konvensiyasının və İnsan Hüquqları üzrə Avropa Məhkəməsinin presedent hüququnun prokurorluq orqanlarında ciddi öyrənilməsi, həmçinin prokurorluq orqanlarının qarşısında duran digər vəzifələr barədə ətraflı məlumat vermişdir.

Hasan Gerçəkər təmsil etdiyi təşkilatın Azərbaycanla əlaqələrin inkişafına böyük önəm verdiyini vurğulamışdır. O, səfər müddətində Azərbaycanda keçirdiyi görüşlərdən söhbət açaraq, ölkələrimiz arasında iqtisadi, siyasi, sosial, mədəni əlaqələrin yüksək səviyyədə olmasını və xalqlarımızın bütün məsələlərdə bir-birinə dəstək verməsini xüsusi qeyd etmişdir.

Görüşdə ölkələrimizin prokurorluq orqanları arasındakı əməkdaşlığının perspektivlərinə dair, həmçinin tərəfləri maraqlandıran məsələlər ətrafında fikir mübadiləsi aparılmışdır. Hər iki ölkənin hüquq-mühafizə orqanlarının səmərəli münasibətlərinin davamı kimi Azərbaycan və Türkiyə prokurorluqları arasında ikitərəfli qarşılıqlı əlaqələrin genişləndirilməsinin və daha da inkişaf etdirilməsinin zəruriliyi qeyd edilmişdir.

AzərTAc

Azərbaycan.-2009.-17 may.-S.4.