Zərdabda Sovet İttifaqı Qəhrəmanı Məlik Məhərrəmovun büstü qoyulmuşdur

Zərdab şəhərinin "Qələbə" meydanında rayonun Bıçaqçı kəndində doğulmuş Sovet İttifaqı Qəhrəmanı Məlik Məhərrəmovun büstünün təntənəli açılış mərasimi olmuşdur.

Mərasimdə respublikamızın tanınmış elm xadimləri - Milli Məclisin (MM) İqtisadi siyasət komitəsinin sədri, akademik Ziyad Səmədzadə, akademik Böyükkişi Ağayev, MM-in deputatı, professor Jalə Əliyeva və rayon ictimaiyyətinin çoxsaylı nümayəndələri iştirak etmişlər.

İştirakçılar əvvəlcə İkinci Dünya müharibəsində həlak olan zərdablıların xatirəsinə ucaldılmış abidə kompleksinin önünə gül dəstələri qoymuşlar. Alman faşist ordularına qarşı döyüşlərdə 3500 nəfər zərdablı iştirak etmiş, onlardan 1457 nəfəri həlak olmuşdur.

"Cəsurlar" hərbi idman oyunları üzrə respublka yarışlarının qalibi olmuş Zərdab rayonunun Gəlmə kənd orta məktəbinin komandası hərbi marşla veteranların önündən keçmişlər.

Mərasimi açan Zərdab Rayon İcra Hakimiyyətinin başçısı Lütvəli Babayev son illər ölkəmizdə veteranlara göstərilən diqqət və qayğıdan, ulu öndər Heydər Əliyevin siyasi xəttinin layiqli davamçısı Prezident İlham Əliyevin bu sahədə ardıcıl və məqsədyönlü fəaliyyətindən danışmışdır.

Tədbirdə Müdafiə Nazirliyinin şöbə rəisi, Məlik Məhərrəmova həsr olunmuş "Sonuncu mogikanın xatirələri" kitabının müəllifi, polkovnik Abdulla Qurbani, "Şöhrət" ordeninin hər 3 dərəcəsi ilə təltif olunmuş Muradalı Heydərov, Respublika Veteranlar Şurası rəyasət heyətinin üzvü Əmirəli Əmirəliyev və başqaları çıxış edərək Məlik Məhərrəmovla bağlı xatirələrindən, onun keçdiyi şərəfli döyüş yolundan danışmışlar.

Akademik Milli Dram Teatrının aktyorları, xalq artistləri Laləzər Mustafayeva və İlham Əsgərov qəhrəman döyüsçüyə həsr olunmuş şeirləri səsləndirmişlər.

Sovet İttifaqı Qəhrəmanı Məlik Məhərrəmovun qızı Leyla Bayramova atasının xatirəsinin əbədiləşdirilməsinə göstərilən diqqət və qayğıya görə dövlətimizin başçısı, Ali Baş Komandan İlham Əliyevə ailələri adından minnətdarlığını bildirmişdir.

Sonra abidənin üzərindəki ağ örtük götürülmüş, önünə çiçəklər düzülmüşdür.

AzərTAc

Azərbaycan.- 2009.- 19 may.- S.7.