Prezident İlham Əliyev Aeroport kəsişməsində yol qovşağının, Heydər Əliyev adına Beynəlxalq hava limanı - Bilgəh qəsəbəsi avtomobil yolunun və piyada keçidlərinin tikintisi ilə tanış olmuşdur

Azərbaycan Respublikasının Prezidenti İlham Əliyev mayın 19-da Aeroport kəsişməsində yol qovşağının, Heydər Əliyev adına Beynəlxalq hava limanı - Bilgəh qəsəbəsi avtomobil yolunun və piyada keçidlərinin tikintisi ilə tanış olmuşdur.

Prezident İlham Əliyevin Bakı şəhərinin yol-nəqliyyat infrastrukturunun təkmilləşdirilməsi ilə bağlı sərəncam və göstərişlərinə uyğun olaraq Aeroport kəsişməsində yeni yol qovşağının, Heydər Əliyev adına Beynəlxalq hava limanı - Bilgəh qəsəbəsi avtomobil yolunun və bu ərazidə olan piyada keçidlərinin tikintisinə başlanılmışdır.

Dövlətimizin başçısı tikinti işlərinin gedişi ilə yaxından tanış olmaq üçün buraya gəldi.

Nəqliyyat Nazirliyinin "Azəryolservis" Açıq Səhmdar Cəmiyyətinin sifarişi ilə inşa olunan yolun baş podratçısı "AZVİRT" Məhdud Məsuliyyətli Cəmiyyətidir.

Prezidentə yolun texniki göstəriciləri ilə bağlı məlumat verildi. Bildirildi ki, yolun ümumi uzunluğu 19 kilometrə bərabərdir. Əsas yolda 6, köməkçi yolda isə 2 hərəkət zolağı vardır. Hərəkət zolaqlarının eni 3,75 metrdir. Asfalt-beton örtüklü yolun ümumi sahəsi 822 min kvadratmetr, asfalt-beton örtüyünün qalınlığı isə 270 millimetrə bərabər olacaqdır. Qeyd olundu ki, yolda hərəkətin tənzimlənməsi üçün Aeroport kəsişməsində müxtəlif səviyyəli yolötürücü qovşağın və 5 yerüstü piyada keçidinin tikilməsi nəzərdə tutulur. Aeroport kəsişməsindəki körpü 8 hərəkət zolaqlı olmaqla uzunluğu 127 metr, sahəsi isə 5080 kvadratmetrdir. Burada drenaj sisteminin və ehtiyat boru keçidlərinin inşası da nəzərdə tutulmuşdur.

Tikintinin 20 ay ərzində başa çatdırılacağı bildirildi.

İnşaat işlərinin gedişi ilə yaxından maraqlanan Prezident İlham Əliyev tikintinin vaxtında və yüksək keyfiyyətlə icra olunması ilə bağlı tapşırıq və tövsiyələrini verdi.

Sonra dövlətimizin başçısı əvvəllər "Binə" və "Sədərək" ticarət mərkəzlərinin yerləşdiyi əraziyə gəldi. Prezident İlham Əliyev burada aparılan abadlıq və quruculuq işləri ilə də tanış oldu, ərazinin yenidən qurulmasının yüksək səviyyədə həyata keçirilməsi ilə əlaqədar müvafiq tapşırıqlarını verdi.

AzərTAc

Azərbaycan.-2009.-20 may.-S.1.