"Bakı" futbol üzrə XVII Azərbaycan çempionatının qalibi oldu

Bu günlərdə futbol üzrə XVII milli çempionatın son turunun oyunları başa çatmışdır. "Bakı"nın eyni adlı klubu keçirdiyi görüşlərdə 62 xal toplayaraq tarixində ikinci dəfə ölkə çempionu adına layiq görülmüşdür.

Milli çempionatda II yeri paytaxtın digər təmsilçisi "İnter" tutmuşdur. Gümüş mükafatçılar "Bakı"dan cəmi 1 xal geri qalmışlar. Zaqatalanın "Simurq" klubu 53 xalla bürünc medal əldə etmişdir.

Builki Azərbaycan çempionu 1997-ci ildə "Çinar Polis Akademiyası" və "Qartal - 95" klublarının birləşməsindən yaranmışdır. Sonradan "Polis Akademiyası" və "Dinamo" adlandırılan klubu 2004-cü ildə "Baghlan Group" şirkətlər qrupu himayəsinə götürmüşdür. Həmin ildən "Bakı" futbol komandasının yüksəlişi başlayıb. Qısa müddət ərzində klub Azərbaycan çempionu (2006), Azərbaycan kubokunun sahibi (2005) titullarını qazanmış, 2007-ci ildə XV milli çempionatın bürünc mükafatçısı olmuşdur.

"Bakı" komandasının az bir zamanda böyük uğurlar əldə etməsində, heç şübhəsiz, onun prezidenti Hafiz Məmmədovun böyük rolu var. O, komandanı səviyyəli yerli futbolçularla və legionerlərlə komplektləşdirmiş, klubun sükanı arxasına tanınmış makedoniyalı mütəxəssis C.Hacıyevski baş məşqçi kimi gətirilmişdir. Çempionat başa çatdıqdan sonra klubun rəhbəri mətbuata verdiyi açıqlamasında komandanın oyunundan və göstərdiyi nəticədən razı qaldığını bildirmişdir: "Bakı"da işini bilən baş məşqçi və kifayət qədər səviyyəli futbolçular var. Bir kollektiv olaraq birləşdik və öz oyunumuzla bu yerə gəlib çıxdıq... Elə dönəm oldu ki, qeyri-sabit çıxış etdik. Lakin çətin günlərdə də komandadan əlimi üzməmişdim".

Qeyd edək ki, bu il "Bakı" ölkəmizi Avropa çempionlar liqasında təmsil edəcək və artıq məlum olduğu kimi, mübarizəyə II təsnifat mərhələsindən qoşulacaq. H.Məmmədovun dediyinə görə, klub Avropa yarışlarında bacardıqca irəli getməyə çalışacaq. Heyətin indikindən də xeyli güclü olacağını vurğulayan klub rəhbəri yaxınlarda komandanın bazasının və məşq üçün meydançaların istifadəyə veriləcəyini qeyd etmişdir. O vurğulamışdır ki, futbolsevərlərimiz Avropada daha müasir, sürətli futbol oynayan "Bakı" komandasını görəcəklər.

Onu da bildirək ki, bu ildən etibarən UEFA kuboku və İntertoto yarışları birləşdirilərək Avropa liqasına çevrilmişdir. Avropa liqasında ölkəmizi çempionatın gümüş və bürünc mükafatçıları "İnter" və "Simurq", habelə mayın 23-də baş tutacaq Azərbaycan kubokunun final görüşü - "İnter" - "Qarabağ" matçının qalibi təmsil etməlidir. Kuboku Ağdam təmsilçisi qazanarsa, Qarabağ Avropa liqasında çıxış edəcək. "İnter"in kuboka sahib çıxacağı təqdirdə isə Avroliqaya milli çempionatda IV yeri tutmuş "Xəzər-Lənkəran" gedəcək.

Artıq premyer-liqamızın səviyyəsinin artdığına və klublarımızın iddiasının xeyli yüksəlməsinə şübhə yoxdur. Buna görə builki Avropa miqyaslı yarışlarda komandalarımızdan layiqli çıxış gözləməyə dəyər. İnanırıq ki, ölkəmizi Avropa çempionlar liqasında təmsil edəcək "Bakı" və Avropa liqasında iştirak edəcək komandalarımız digər idman növlərində olduğu kimi, beynəlxalq arenada da böyük əzmkarlıq və ustalıq nümayiş etdirərək layiqli çıxışları və yüksək nəticələri ilə çoxsaylı azarkeşləri sevindirəcəklər.

Azərbaycan.-2009.-20 may.-S.8.