Ombudsmanın səlahiyyət müddətinin artırılması məsələsi parlamentdə müzakirə olunacaqdır

Mayın 20-də Milli Məclisin Hüquq siyasəti və dövlət quruculuğu və İnsan hüquqları komitələrinin birgə iclası keçirildi. İclası açan parlamentin Hüquq siyasəti və dövlət quruculuğu komitəsinin sədri Əli Hüseynov gündəlikdəki birinci məsələnin "Azərbaycan Respublikasının İnsan hüquqları üzrə müvəkkili (Ombudsman) haqqında" Konstitusiya Qanununa dəyişikliklər edilməsi barədə qanun layihəsi olduğunu diqqətə çatdırdı. Əli Hüseynov bildirdi ki, dəyişikliyə əsasən bu qanunun 4.2-ci maddəsində əksini tapan bir nəfərin yalnız bir dəfə Ombudsman seçilə bilməsi normasının "eyni şəxs iki dəfədən artıq seçilə bilməz" redaksiyasında verilməsi təklif olunur.

Qanunun 4.3-cü maddəsindəki düzəliş isə müvəkkilin fəaliyyətində praktik halda meydana çıxa biləcək boşluğun aradan qaldırılmasına xidmət edir. Əli Hüseynovun sözlərinə görə, bu, Ombudsmanın fəaliyyətinin davamlılığını təmin edən əlavə düzəlişdir.

Müzakirələr zamanı deputat Qüdrət Həsənquliyev Ombudsmanın səlahiyyət müddətinin məhdudlaşması ilə razılaşmadığını qeyd etdi. Deputat Rafael Cəbrayılov isə xalqın aktiv seçki hüququna məhdudiyyətin qoyulmasını düzgün hesab etmədi. Onun sözlərinə görə, zaman keçdikcə qanunlara, insan hüquqlarına yeni prizmadan yanaşmaq zərurəti ortaya çıxır.

Müzakirələrin sonunda qanun layihəsi Milli Məclisin plenar iclasının müzakirəsinə tövsiyə edildi.

İclasda Əli Hüseynov "Azərbaycan Respublikasının Mülki-Prosessual Məcəlləsinə dəyişikliklər və əlavələr edilməsi haqqında" qanun layihəsini də müzakirəyə təqdim etdi.

Layihənin Azərbaycan Prezidentinin qanunvericilik təşəbbüsü qaydasında Milli Məclisə təqdim olunduğunu deyən komitə sədri onu da əlavə etdi ki, Məcəlləyə dəyişikliklə bağlı Azərbaycan Respublikası Ali Məhkəməsində uzun müddətdir ki, işçi qrup yaradılıb. Bu prosesə sonrakı mərhələdə alman mütəxəssislər də cəlb olunub.

İclasda iştirak edən Ali Məhkəmənin hakimi Əsəd Mirzəliyev əlavə və dəyişikliklərin mahiyyəti barədə məlumat verdi. Qanun layihəsi parlamentin plenar iclasına tövsiyə edildi.

İclasda "Polis haqqında" Azərbaycan Respublikasının Qanununa əlavə edilməsi barədə" qanun layihəsi də müzakirə edildi. Qanuna təklif olunan əlavəyə əsasən, yaşayış yeri üzrə ictimai asayişin və təhlükəsizliyin təmin edilməsi ilə bağlı yaranan sosial problemlərin birgə həlli üçün ayrı-ayrı şəxslər könüllülük əsasında ictimai asayişin və təhlükəsizliyin təmin olunması işinə cəlb edilə bilər. Bu işdə iştirak edən şəxslərin fəaliyyətinin əlaqələndirilməsi üçün yerli polis orqanlarının yanında ictimai şuralar yaradılacaq.

Komitə sədri Əli Hüseynov bildirdi ki, ictimai şuraların yaradılması polisin işinə kömək edəcək. Hazırda polis orqanlarında ictimai şuraların yaradılması üçün hazırlıq işləri başa çatmaq üzrədir. Könüllü ictimai fəaliyyət hüquqazidd və cəmiyyətə qarşı hörmətsiz davranışın qarşısının alınması məqsədi ilə maarifləndirmə və təbliğat işinin aparılması, narkomaniyanın və alkoqolizmin, həmçinin yetkinlik yaşına çatmayanların baxımsızlığının və hüquq pozuntularının profilaktikası, cinayətlərin və digər hüquqpozmaların qarşısının alınmasını, araşdırılmasını təmin etmək məqsədilə zəruri məlumatların polis orqanlarına verilməsi istiqamətlərini əhatə edəcək.

Qanun layihəsi Milli Məclisin plenar iclasının müzakirəsinə tövsiyə edildi. İclasda "Dövlət qulluğu haqqında" Azərbaycan Respublikasının Qanununa əlavə edilməsi barədə", "Azərbaycan Respublikası Mülki Məcəlləsinə, Azərbaycan Respublikasının İnzibati Xətalar Məcəlləsinə, "Banklar haqqında" Azərbaycan Respublikasının Qanununa və "Azərbaycan Respublikasının Milli Bankı haqqında" Azərbaycan Respublikasının Qanununa əlavələr və dəyişiklik edilməsi barədə", "Saxta və keyfiyyətsiz malların idxal edilməsinə, habelə gömrük qaydaları əleyhinə olan inzibati xətalara görə məsuliyyətin gücləndirilməsi məqsədi ilə Azərbaycan Respublikasının İnzibati Xətalar Məcəlləsinə əlavələr və dəyişikliklər edilməsi haqqında" qanun layihələri Milli Məclisin plenar iclasına tövsiyə edildi.

Anar RASİMOĞLU

Azərbaycan.- 2009.- 21 may.- S. 4.