Gürcüstan Prezidenti Mixeil Saakaşvilinin Azərbaycanın Baş naziri Artur Rasizadə ilə görüşü

Gürcüstan dövlətinin başçısı Bakıda aparılmış danışıqlardan məmnun olduğunu bildirərək qeyd etmişdir ki, neft-qaz və energetika sahəsində əməkdaşlığa dair, o cümlədən Gürcüstan ərazisində qaz anbarları tikilməsi barədə razılaşma əldə edilmişdir. M.Saakaşvili demişdir ki, həmin anbarlar ölkəsinin təbii qaz ilə təchizatına çoxillik təminat olacaqdır.

Gürcüstan Prezidenti qış dövründə qaz verilməsində fasilələr olmadığına görə Azərbaycana təşəkkürünü bildirmişdir. Prezident Mixeil Saakaşvili demişdir: "Azərbaycan Gürcüstanın ən yaxın dostudur".

Azərbaycanın Baş naziri Artur Rasizadə vurğulamışdır ki, iki ölkənin müxtəlif idarələri arasında tənzimlənmiş geniş əlaqələr qarşıya çıxan məsələləri operativ həll etməyə imkan verir. Baş nazir ölkələrimiz arasında ikitərəfli iqtisadi əməkdaşlığın yaxşı dinamikaya malik olduğunu qeyd etmişdir.

AzərTAc

Azərbaycan.- 2009.- 22 may.- S. 1.