Beynəlxalq Muğam Mərkəzi ilə tanışlıq

Gürcüstan Prezidenti Mixeil Saakaşvili mayın 21-də Beynəlxalq Muğam Mərkəzi ilə tanış olmuşdur.

Gürcüstan Prezidentinə dənizkənarı Milli Parkda yerləşən Mərkəz haqqında ətraflı məlumat verildi. Bildirildi ki, Heydər Əliyev Fondunun milli-mənəvi dəyərlərimizin qorunması və dünyada geniş təbliği ilə bağlı reallaşdırdığı layihələr sırasında xüsusi əhəmiyyəti olan bu Mərkəzin inşası Fondun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə həyata keçirilmişdir. 2005-ci il aprelin 6-da Prezident İlham Əliyev Bakıda Beynəlxalq Muğam Mərkəzinin yaradılması haqqında sərəncam imzalamışdır. Azərbaycan muğamının bəşər mədəniyyətinin nadir inciləri ilə bir sırada YUNESKO-nun dünya qeyri-maddi mədəni irs siyahısına daxil edilməsi onun nə dərəcədə bənzərsiz sənət növü olduğunu bir daha təsdiqləyir.

Mərkəz ilə yaxından tanış olan Prezident Mixeil Saakaşvili burada Azərbaycanın görkəmli muğam ifaçılarının büstlərinə baxdı.

AzərTAc

Azərbaycan.- 2009.- 22 may.- S. 2.