Son illər Bakıda aparılan yenidənqurma işləri nəticəsində magistral yolların, prospekt və küçələrin görkəmi xeyli dəyişib. Yollarda hər saat müşayiət olunan tıxaclar xeyli aradan qaldırılıb. Beynəlxalq standartlara uyğun tikilmiş körpülər, yolayırıcı zolaqlar, piyada və dəmir yolu keçidləri, dekorativ yaşıllıqlar, müasir işıqlandırma sistemi zövq oxşayır. Bu günlərdə paytaxtın müxtəlif yerlərində yeni yolötürücü, körpü-tunel və əsaslı şəkildə yenidən qurulmuş yeraltı piyada keçidlərinin istifadəyə verilməsini şəhər sakinləri böyük razılıq hissi ilə qarşılamışlar.
Montin qəsəbəsində, Heydər
Əliyev prospekti ilə Ağa Nemətulla küçəsinin
kəsişməsində yerləşən
tunel tipli yolötürücünün inşasına
ötən ilin iyulunda başlanmışdı.
Açılışında ölkə Prezidentinin
iştirak etdiyi bu yolötürücünun
tikintisində yerli xammalla yanaşı, İtaliya, İspaniya, Türkiyə və Hindistandan gətirilmiş
materiallardan da istifadə olunub. Yagış və qrunt sularının
axıdılması üçün
drenaj xətləri çəkilib, müasir işıqlandırma sistemi
quraşdırılıb, yardımçı
yollar salınıb.
Ən başlıcası isə,
Ağa Nemətulla küçəsi və Heydər Əliyev prospekti ilə hərəkət edən nəqliyyat vasitələri
bir-birinə mane olmadan
keçib gedə biləcək.
Bu barədə minnətdarlıq
hissiylə danışan paytaxt sakini Eldar Cəbrayılov
deyir:
- Evimiz Heydər Əliyev
prospektinə yaxındır. Əvvəllər ətrafda
yaşayan insanlar, avtomobil sürücüləri çətinliklərlə
qarşılaşır, xeyli vaxt itirirdilər. Ancaq
bugünkü ürəkaçan mənzərə,
rahatlıq çətinlikləri unutdurub. Var olsun bu cür
qurub-yaradan əllər.
Heydər Əliyev
prospektində dəmiryol körpüsünün
yanındakı ikinci yardımçı körpü-tunelin
açılışı da şəhər sakinləri tərəfindən
razılıqla qarşılanıb. Milli memarlıq elementləri
ilə işlənmiş bir istiqamətli, hər birinin eni 3,5
metr olan iki hərəkət zolaqlı körpü-tunelin eni 7
metr, ümumi uzunluğu 400 metr, qapalı hissəsinin
uzunluğu 88 metrdir.
Bakı sakini Çərkəz
Rzayev deyir ki, Heydər Əliyev prospektində
aparılmış yenidənqurma işlərindən sonra yol
12 zolaqlı olmuşdu. Amma prospektin bu hissəsində yolun 6
zolaqlı olması bəzi çətinliklər
yaradırdı. Çox məmnunuq ki, həmin ərazidə
iki yardımçı körpü-tunelin istifadəyə
verilməsi ilə bu çətinliklərə birdəfəlik
son qoyulub.
Heydər Əliyev
prospektində əsaslı yenidənqurmadan sonra istifadəyə
verilmiş yeraltı piyada keçidi bu ərazidə
yaşayan sakinlərə rahatlıq gətirmişdir. Nəqliyyatın
hərəkətinin sıx olduğu massivdə yerləşən
bu keçid uzun illər idi ki, yararsız vəziyyətdə
idi. Piyadalar ondan çox az istfadə edirdilər, axşamlar
ümumiyyətlə buradan keçməyə camaat ehtiyat
edirdi.
Yenidənqurmadan sonra
dörd çıxışı olan bu keçidin
çıxışlarının hər birinin üstü
sınmayan şüşə ilə örtülüb. Burada əlillərə
qayğı da unudulmayıb. Uzunluğu 57,5 metr, eni 6 metr,
hündürlüyü isə 2,2 metr olan keçidin pilləkənlərində
əlil arabalarının hərəkəti üçün
ayrıca yol var. Milli memarlıq ənənələrini
özündə birləşdirən bu keçiddə istifadə
olunan üzlük materiallar İtaliya, İspaniya, Türkiyə
və Hindistandan gətirilib. Keçiddə zövqlə
quraşdırılmış müasir işıqlandırma
sistemi hava qaralan kimi avtomatik işə düşür.
Montin qəsəbə
sakini Hüsniyyə Əliyeva bildirdi ki, Heydər Əliyev
prospektinə yaxın məhəllədə
yaşayırıq. Uşaqlarımızı 193 saylı orta
məktəbə aparıb gətirmək üçün hər
gün bu yolu iki-üç dəfə o yan-bu yana keçməli
olurduq. Bu, təhlükəli idi. Dəfələrlə burada
yol-qəza hadisəsi baş vermişdi. İndi yeraltı
keçiddən rahat istifadə edirik. Məktəblilərin,
biz valideynlərin, qocaların razılığının həddi-hüdudu
yoxdur. Bizə bu rahatlığı, bu sevinci bəxş edən
ölkə başçısına minnətdarlığımızı
bildiririk.
Bakı şəhərində
nəqliyyat sisteminin təkmilləşdirilməsi tədbirləri
çərçivəsində digər prospekt və
küçələrdə də paytaxtımıza
müasirlik, insanlara rahatlıq gətirəcək yeraltı
keçid və yol qovşaqlarının tikintisi uğurla
davam etdirilir.
Rəhman SALMANLI
Azərbaycan.- 2009.- 22 may.- S. 7.
