Bakıda Dünya Türk Gəncləri Birliyinin VIII liderlər toplantısı keçirilir

Bakıda Dünya Türk Gəncləri Birliyinin (DTGB) VIII liderlər toplantısı keçirilir. Toplantını giriş sözü ilə açan DTGB İcraiyyə Komitəsinin sədri, Milli Məclisin deputatı Əkrəm Abdullayev toplantı haqqında geniş məlumat vermiş və onun əhəmiyyətini diqqətə çatdırmışdır. Bildirmişdir ki, bugünkü toplantıda 28 dövlət toplumunun, muxtar dövlətin və Avropanın müxtəlif ölkələrində yaşayan türk soydaşlarımızın nümayəndələri iştirak edirlər.

Birliyin əsas məqsədi türksoylu xalqların gənclərini bir-birinə yaxınlaşdırmaq, bu xalqların böyük bir ərazidə yaratdıqları ortaq mədəniyyəti öyrənmək və təbliğ etmək, türk dövlət və topluluqlarında baş verən ictimai-siyasi, elmi-mədəni, ekoloji-sosial problemlərə öz münasibətini bildirmək, azsaylı türk xalqlarının hüquqlarının dünya birliyi tərəfindən qorunması işinə kömək etməkdən ibarətdir.

Ə.Abdullayev vurğulamışdır ki, bu toplantı türk dövlət və cəmiyyətlərinin dostluq, qardaşlıq və əməkdaşlıq əlaqələrini inkişaf etdirmək, onların arasında informasiya mübadiləsini təmin etmək, iqtisadi inkişaf sahəsində qarşılıqlı əməkdaşlığı genişləndirmək və türk dövlətlərinin ümumi problemlərini birlikdə həll etmək yollarını araşdırmaq baxımından əhəmiyyətlidir.

DTGB-nin sədri Həsən Əli Karasar (Türkiyə) qurumun yaranma tarixi və onun gördüyü işlər barədə ətraflı məlumat vermişdir. Bildirmişdir ki, bu təşkilat 13 qurultay və bu tədbirlə birlikdə 8 liderlər toplantısı keçirmişdir. Sonuncu qurultay və gənclik günləri 2007-ci ildə Makedoniyanın Ohri şəhərində keçirilmişdir. Növbəti qurultay bu ilin iyulunda Krımın Baxçasaray şəhərində təşkil ediləcəkdir. İndiyədək bir dəfə Türk Dünyası Gənclik günləri və qurultayı (2000-ci il), iki dəfə isə liderlər toplantısı (1993, 1997-ci illər) Bakıda keçirilmişdir. DTGB Çində, Qərbi və Şərqi Avropada, ABŞ-da fəaliyyət göstərən bir sıra türk təşkilatları ilə daimi əlaqələr qura bilmişdir.

Gənclər və idman naziri Azad Rəhimov dövlət tərəfindən gənclərə göstərilən diqqət və qayğıdan bəhs etmiş, toplantının əhəmiyyətini vurğulamışdır. Bildirmişdir ki, bu toplantı türk dünyası gəncliyi, o cümlədən Azərbaycan gənclərinin həyatında əlamətdar hadisəyə çevriləcəkdir. Bu tədbirdə ayrı-ayrı dövlət və topluluqları təmsil edən 50-dən çox gənc lider iştirak edir. Toplantıda aparılacaq müzakirələr, verilən qərarlar yeni layihələrin həyata keçirilməsinə yol açacaqdır. Hazırda respublikamızı DTGB-də Gənclər Təşkilatlarının Milli Şurası və Dünya Gənc Türk Yazarlar Birliyi təmsil edir.

A.Rəhimov vurğulamışdır ki, təkcə son 5 ildə ölkəmizdə 70-ə yaxın beynəlxalq tədbir keçirilmişdir. Bu tədbirlərdə müxtəlif ölkələri təmsil edən 5 minə yaxın gənc iştirak etmişdir. DTGB-nin hər toplantısında Azərbaycanın ərazi bütövlüyü məsələsi, qaçqın və məcburi köçkünlərin durumu, işğal olunmuş ərazilərimizdəki abidələrin vəziyyəti diqqət mərkəzində olmuşdur. Ümummilli lider Heydər Əliyev həmişə gənclərlə işə, onların təşkilatlanmasına böyük diqqət və qayğı ilə yanaşırdı. Bu gün ulu öndərimizin siyasi kursunu uğurla davam etdirən Prezident İlham Əliyev tərəfindən gənc kadrların irəli çəkilməsi, onların təhsil imkanlarının genişləndirilməsi, təhsildə, elm və iqtisadiyyatda yeni texnologiyaların tətbiqi, habelə xüsusi dövlət proqramının qəbulu gənc nəslin önündə yeni perspektivlər açmışdır.

Diqqətə çatdırılmışdır ki, bu gün ölkəmizin ictimai həyatında fəal gənclərin ön sıralarında birləşən 170 qeyri-hökumət təşkilatı fəaliyyət göstərir. 2015-ci ilədək müxtəlif ölkələrin 100-ə yaxın nüfuzlu ali təhsil ocaqlarında 5 min gənc mütəxəsissin hazırlanmasını nəzərdə tutan müvafiq dövlət proqramının icrasına başlanılmışdır.

Türk dünyasının sıx birliyindən danışan Türkiyənin Azərbaycandakı səfiri Hulusi Kılıç vurğulamışdır ki, türk dünyası beynəlxalq siyasi arenada böyük nüfuz qazanmış və kifayət qədər güclənmişdir. Elə bu ilin ikinci yarısında türkdilli ölkələrin parlamentariləri Bakıda bir araya gələcəklər.

Prezident Administrasiyasının sektor müdiri Tahir Süleymanov, Milli Məclisin deputatları Fəttah Heydərov, Qənirə Paşayeva, Gültəkin Hacıyeva, Dünya Gənc Türk Yazarlar Birliyinin sədri Əkbər Qoşalı Azərbaycan gənclərinin ictimai-siyasi proseslərdə rolundan danışmış, türk dövlətlərinin daha da sıx birləşməsinin vacibliyini diqqətə çatdırmış, türk dünyasının böyüklüyündən və əzəmətindən bəhs etmişlər.

Vurğulanmışdır ki, təşkilatın əsas məqsədlərindən biri də türksoylu insanların yaşadığı ölkədən asılı olmayaraq hüquqlarını müdafiə etməkdir.Diqqətə çatdırılmışdır ki, Azərbaycan artıq türk dünyasının mərkəzinə çevrilmişdir. Ölkəmiz bu cür tədbirlərin keçirilməsinə böyük önəm verir. Toplantının rəsmi açılışından sonra türkiyəli gəncin ifasında muğam səslənmişdir.

Toplantı mayın 26-da başa çatacaqdır.

AzərTAc

Azərbaycan.-2009.-24 may.-S.3.