İKT sahəsində beynəlxalq əlaqələr genişlənir

Rabitə və informasiya texnologiyaları naziri Əli Abbasov İsveçrənin Cenevrə şəhərində keçirilən İnformasiya cəmiyyəti üzrə ümumdünya sammitinin 2009-cu il üzrə forumunun (WSIS Forum 2009) açılış mərasimində iştirak edib.

"Minilliyin inkişaf hədəfləri üçün İKT" mövzusuna həsr olunmuş mərasimdə çıxış edən nazir Azərbaycan Respublikasının Prezidenti İlham Əliyev tərəfindən informasiya-kommunikasiya texnologiyaları sahəsinin prioritet elan edilməsindən sonra hökumətin informasiya və kommunikasiya texnologiyalarına xüsusi önəm verdiyini və Azərbaycanın regionda bu sahə üzrə aparıcı ölkələrdən birinə çevrildiyini xüsusi vurğulamışdır. Nazir Transmilli Avrasiya Super İnformasiya Magistralı (TASİM) layihəsi barədə də konfrans iştirakçılarına geniş məlumat vermişdir.

Səfər çərçivəsində nazir Beynəlxalq Telekommunikasiya İttifaqının (BTİ) Baş katibi, BTİ-nin Radiorabitə bürosunun direktoru, YUNESKO-nun Baş direktorunun rabitə və informasiya üzrə müavini, Ümumdünya Poçt İttifaqının (ÜPİ) baş direktoru, BMT-nin ticarət və inkişaf konfransının (UNCTAD) Baş katibi ilə görüşmüşdür. Keçirilən görüşlərdə elm, təhsil və İKT vasitəsilə mədəniyyətlərarası dialoqun qurulmasında ölkə rəhbərliyinin bu sahəyə göstərdiyi diqqətin əhəmiyyətindən, transmilli Avrasiya super informasiya magistralı layihəsinin ölkəmiz, həmçinin region üçün önəmindən, bu layihənin regionda ticarətin inkişafı üçün əhəmiyyətli infrastrukturun yaradılmasında əvəzsiz rolundan, Azərbaycan Milli Peykinin orbitə buraxılması üçün geostasionar resursların ayrılmasından və Azərbaycanın poçt sahəsində nail olduğu uğurlardan bəhs edilmişdir. Eyni zamanda, Azərbaycanda Heydər Əliyev Fondu və RİTN-in birgə həyata keçirdiyi "Məhdud imkanlı şəxslər üçün tədris mərkəzi" layihəsi rəğbətlə qarşılanmış və bu tədbirlərdə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri Mehriban xanım Əliyevanın rolu xüsusi vurğulanmışdır.

Azərbaycan.-2009.-24 may.-S.4.