D vitamini zehni və fiziki sağlamlıq üçün zəruridir

Gənclik dövründə orqanizmdə D vitamini zənginliyi yaratmaq qocalıqda zehni qabiliyyətin qorunmasına xidmət edəcək qədər faydalıdır. İngiltərə Mançester Universitetinin alimləri 40-79 yaş arası 3 min nəfər arasında keçirdikləri testdən sonra bu qənaətə gəliblər. Eksperiment zamanı orqanizmində D vitamini çox olan digərlərinə nisbətən daha yüksək neyropsixoloji nəticələr göstəriblər.

Testi keçən şəxslərin, xüsusilə qocaların zehni göstəriciləri orqanizmlərindəki D vitamininin səviyyəsinə mütənasib olub.

Alimlər bu paradoksal halın bioloji səbəblərini izah etməkdə, D vitamininin intellektlə bağlılıq mexanizmini açmaqda çətinlik çəkirlər. Onların ilkin ehtimalına görə, bu vitamin hormonal aktivliyi yüksəldir və ya beyin neyronlarını qoruyur.

D vitamini orqanizm tərəfindən günəş şüalarının dəriyə təsiri nəticəsində sintez olunur. Bu səbəbdən ona həm də günəş və ya işıq vitamini də deyilir. D vitamini süddə və balıqda da var.

Mütəxəssislər D vitamininin bir sıra xəstəliklərlə mübarizədə də xüsusi təsirə malik olduğunu aydınlaşdırıblar. London Tibb və Stomatologiya İnstitutunun, həmçinin "Trust Centre for Research in Clinical Tropical Medicine" mərkəzinin alimləri iki il qabaq D vitamininin vərəmə qarşı effektli qoruma olduğunu müəyyənləşdiriblər. Həmin tibb müəssisələri mütəxəssislərinin söylədiyinə görə, bir dəfədə 2,5 milliqram D vitamini qəbulu orqanizmi ən azı 6 həftə vərəmdən və ona oxşar xəstəlik törədicilərindən qoruyur.

Kaliforniya Universitetinin alimləri bu vitaminin qida ilə qəbulunun orqanizmi döş və bağırsaq xərçəngindən hifz etdiyi qənaətindədirlər.

Avstriyadan olan bir qrup tədqiqatçı isə D vitamini miqdarının ömür müddətinə əsaslı təsir göstərdiyini üzə çıxarıb.

Müşahidələr nəticəsində bəlli olub ki, qidasına D vitamini əlavələri qatılmış uşaqlarda sonradan birinci tip diabetə tutulma riski xeyli aşağı düşür.

Azərbaycan.-2009.-24 may.-S.7.