Ekoloji tarazlıq sağlam gələcək üçün mühüm şərtdir

Ölkəmiz müstəqillik əldə etdikdən sonra ulu öndər Heydər Əliyevin ekologiya və ətraf mühitin mühafizəsi sahəsinə qayğıkeş münasibəti nəticəsində 2001-ci il 23 may tarixli sərəncamla Ekologiya və Təbii Sərvətlər Nazirliyi yaradılmışdır. Azərbaycan Respublikasının Prezidenti İlham Əliyevin imzaladığı sərəncama əsasən isə, ölkəmizdə hər il 23 may Ekologiya və Təbii Sərvətlər Nazirliyi işçilərinin peşə bayramı günü kimi qeyd olunur.

İndiki və gələcək nəsillərin sağlamlığının təmin edilməsi, iqtisadi potensialın qorunması, təbii ehtiyatlardan səmərəli istifadə edilməsi nazirliyin qarşısında duran başlıca məsələlərdir. Bu struktur yarandığı vaxtda hələ sovet dövründən qalmış bir sıra ekoloji problemlərin həlli, ətraf mühitin çirklənməsinin qarşısının alınması, ekoloji tarazlığın bərpası həllini gözləyən işlər idi. Azərbaycan hökuməti bu problemlərin aradan qaldırılması üçün zəruri tədbirlər həyata keçirmişdir. Azərbaycan Prezidentinin 2003-cü ildə təsdiq etdiyi "Ekoloji cəhətdən dayanıqlı sosial-iqtisadi inkişafa dair", "Meşələrin bərpa edilməsi və artırılmasına dair" milli proqramları və "Azərbaycan Respublikasında hidrometeorologiyanın inkişafına dair" Dövlət Proqramı çərçivəsində ölkəmizdə ekoloji çirklənmənin aradan qaldırılması və ekoloji tarazlığın bərpa edilməsi istiqamətində mühüm işlər görülmüşdür.

Azərbaycan Respublikası Prezidentinin 2006-cı il 28 sentyabr tarixli sərəncamı ilə təsdiq edilmiş "Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün kompleks Tədbirlər Planı"nda bir çox tələblərlə yanaşı, meşələrin seyrəkləşməsinin, torpağın erroziyasının, meşə massivlərinin azalmasının və təbii biosenozların yoxa çıxması təhlükəsinin yaranmasının qarşısının alınması barədə tədbirlərin də həyata keçirilməsi nəzərdə tutulmuşdur. Ötən illərdə bu istiqamətdə bir sıra işlər görülmüşdür. Cari ildə də həmin işlər davam etdirilmiş, yanvar-mart aylarında 1052 hektar sahədə meşə bərpa işləri aparılmışdır.

Tədbirlər planı çərçivəsində ölkənin gərgin ekoloji vəziyyətdə olan bölgələrində, xüsusən Bakı şəhərinin və Abşeron yarımadasının sağlamlaşdırılması istiqamətində konkret tədbirlər həyata keçirilmişdir. Bakı Buxtasının, Bibiheybət zonasının, Heydər Əliyev Beynəlxalq Hava Limanının ətrafının, Abşeron yarımadasındakı göllərin, neftlə çirklənmiş torpaqların, çay suları altında qalmış sahələrin və digər istehsalat tullantıları ilə çirklənmiş ərazilərin ekoloji vəziyyətinin yaxşılaşdırılması, Bakı və Sumqayıt şəhərlərində tullantıların idarə olunmasının təkmilləşdirilməsi və başqa tədbirlərin həyata keçirilməsi üçün Azərbaycan Prezidenti İlham Əliyevin göstərişinə əsasən maliyyə vəsaitlərinin ayrılması bu problemlərin vaxtında həll edilməsini reallaşdırmışdır.

Aprel ayının 22-də Azərbaycan Prezidenti İlham Əliyevin sədrliyi ilə Nazirlər Kabinetinin 2009-cu ilin birinci rübünün sosial-iqtisadi inkişafının yekunlarına həsr olunmuş iclasında digər problemlərlə yanaşı, ölkə başçısı ekoloji məsələlərə də toxunmuş, Bakıda, Abşeron yarımadasında 3 milyon ağac əkilməsi ilə bağlı tədbirlər hazırlandığını bildirmişdir. Prezidentin 3 milyon ağac əkmək təşəbbüsü ilə çıxış etməsi hər yerdə bir canlanma yaradıb. Şəhərin bir sıra rayonlarında bununla bağlı xüsusi qərargahlar təşkil olunub və tədbirlər həyata keçirilir.

Ekologiya və Təbii Sərvətlər Nazirliyinin kollektivi əsası ulu öndər Heydər Əliyev tərəfindən qoyulmuş ətraf mühitin sağlamlaşdırılması və təbii sərvətlərdən davamlı istifadə olunması siyasətini uğurla davam etdirərək üzərinə düşən vəzifələrin öhdəsindən layiqincə gəlmək, respublika əhalisinin sağlam ətraf mühitdə yaşamasının təmin edilməsində bütün imkanlarını səfərbər etmək əzmindədir.

Azərbaycan.- 2009.- 23 may.- S. 5.